Read Toraja-Sa'dan TOMANGADA’ 8 Bible Online

TOMANGADA’ 8 - Toraja-Sa'dan bible

TOMANGADA’ 8

¹Mindara la susito kinaa? Sia mindara untandai tu battuananna mintu’ apa? Iatu kakinaanna tau umpaparrang lindona, anna pamalutei tu lindo matorona.

²Palan penaai tu parentana datu, tu belanna iamora tu sumpa mangka muposumpa ussa’bu’ sanganNa Puang Matua.

³Da musasa tassu’ dio mai olona, da mutama misa’ kara-kara kadake, belanna napogau’ tu mintu’ apa naala penaanna.

⁴Belanna patalo tu kadanna datu sia mindara ma’din ma’kada lako kalena. Kumua: Matumbari tu penggaurammi?

⁵Minda-minda unturu’ pepasan, iamo tae’ narampoi kadake, sia iatu penaanna to kinaa unnissan attu sia a’gan.

⁶Belanna mintu’ apa den attunna sia a’ganna; belanna magasa tongan tu kadakena natanggung tau.

⁷Apa moi misa’ tau tae’ natandai tu apa la dadi; belanna mindara la umpokadanni, umba nakua tu lalanna.

⁸Moi misa’ tau tae’ duka ungkuasai angin la umpatadangi; sia moi misa’ tau tae’ duka ungkuasai lampakna sia tae’ duka kadirampanan lan kasirarian; susi dukato iatu katangmekaalukan tae’ nala urrampananni tu to umpogau’i.

⁹Mintu’nate kutiromo tongku nannungi tu mintu’ penggauran dipogau’ lan naarrang matanna allo, ke attunna misa’ tolino ungkuasai senga’na anna pomandasai tu to dikuasai.

¹⁰Susi dukato kutiromo tu mai to tang mekaaluk tamamo batu dilobang dipasola nene’ to dolona, na iatu to malolo gau’na diparuku male untampei tu inan maindan sia tae’mo nakilalai sangtondokna. Ia duka tu apa iato tae’ gai’na.

¹¹Belanna tae’ namadomi’ dipaolai ukungan tu penggauran kadake, iamoto na iatu penaanna mintu’na ma’rupa tau morai bang la umpogau’ kadake.

¹²Belanna iatu to kadake gau’na umpogau’ kakadakean pessaratu’, anna malambe’ siapa tu sunga’na. Moi nasusito kuissan, kumua la salama’ tu to mengkaola lako Puang Matua belanna mataku’ dio oloNa.

¹³Apa iatu to tang mekaaluk tae’ nasalama’, sia tae’ namalambe’ sunga’na, sangadinna susi bangri to bayo-bayo, belanna tae’ namataku’ dio oloNa Puang Matua.

¹⁴Den tu misa’ apa tae’ gai’na dadi dao kuli’na padang, iamotu den to malambu’ dipakkan penggauranna susi pakkanna penggauranna to tang mekaaluk sia den to tang mekaaluk dipakkan penggauranna susi pakkanna penggauranna to malambu’; iamoto angku ma’kada kukua: ia duka tu iannato tae’ gai’na.

¹⁵Iamoto kupudii tu kaparannuan, belanna tae’ ia misa’ tu mandu melo lako tolino lan naarrang matanna allo na iatu kumande sia mangiru’ sia sende; anna sikambi’mora tu iannato umposara’ mintu’ sara’na lan allo katuoanna, tu Nakamaseanni Puang Matua lan naarrang matanna allo.

¹⁶Iatongku palan penaami la untandai kakinaan sia la untiroi tu mintu’ sara’, tu dadi dao kuli’na padang, anna tae’ natandai kamammaran tu tolino keallo sia kebongi — ,

¹⁷attu ia dukato kutiro tu mintu’ pengkaranganNa Puang Matua, tae’ nalambi’ tangnga’na tolino, iamotu mintu’ penggauran lan naarrang matanna allo; belanna moi umba nakua mara’ta’ tu tolino undaka’i, tae’ duka nalambi’i, ondongpi moi anna ma’kada tu misa’ to kinaa, kumua naissanni, tae’ duka nalambi’i tangnga’na.