Read Toraja-Sa'dan TOMANGADA’ 9 Bible Online

TOMANGADA’ 9 - Toraja-Sa'dan bible

TOMANGADA’ 9

¹Tonganna, mintu’na te kupalan nasangmo penaangku sia kuparessa nasang, kumua mintu’ to malambu’ sia to kinaa sia mintu’ pengkaranganna lan nasang limanNa Puang Matua, susi dukato tu kamamaliran sia kasikabirisan; tae’ apa natandai tolino tu diona apa natingayona lako.

²Pada bangsia mintu’na tu napotaanna mintu’ tolino, pada tu dalle’ urrampoi to malambu’ sia to tang mekaaluk, to melo sia to masero, susi duka tu to maruttak, to memala’ sia to tang memala’; susitu apa urrampoi to melo, ten dukamoto tu to kadake gau’na; susitu apa urrampoi to umpalao sumpa, ten dukamoto tu to mataku’ umpalao sumpa.

³Inde sia tu apa tarru’ kadake tu mintu’na dadi lan naarrang matanna allo, iamotu pada tu dalle’ urrampoi sola nasang; iamoto iatu penaanna ma’rupa tau ponno kakadakean, sia kapusan lan penaanna lan mintu’ allo katuoanna; sia undinnato mintu’ tau ma’palulako inan tomate.

⁴Belanna iatu mintu’ to tama bilanganna totuo den kapa’rannuanna, saba’ losong ia tu misa’ asu tuo na iatu misa’ singa mate.

⁵Belanna iatu to tuo naissan kumua la mate, apa iatu tomatemo tae’ apa naissan, sia tae’mo narannuanni tu poleanna, moi iatu kapengkilalanna pa’de dukamo.

⁶Susimoto tu kamamaliranna sia kasikabirisanna sia kamangimburuanna masaimo pa’de; sia tae’mo apa napotaa sae lakona tu mintu’na dadi lan naarrang matanna allo.

⁷Iamoto parannuko ungkandei tu kandemu sia pasendei tu penaammu unniru’i tu uai anggoro’mu, belanna iake mupogau’i tu iannato, inang masai allomo pa’poraianNa Puang Matua susito.

⁸La tontong bang masero tu pakeammu sia da nasalai minna’ busarungngu’ tu ulummu.

⁹La muperasai tu melona lan katuoan sola tu baine mukamali’, lan mintu’ allo katuoammu tu tae’ gai’na, tu Nakamaseangko Puang Matua lan naarrang matanna allo, iamotu mintu’ allomu tae’ gai’na, belanna iamoto tu taamu dio lu to tuo sia lan sara’mu, tu munii mara’ta’ lan naarrang matanna allo.

¹⁰Mintu’na tu narumbu limammu la mupogau’ sitinaya mukullena, pogau’i belanna tae’ tu pengkarangan, ba’tu pa’timbangan, ba’tu kapaissanan, ba’tu kakinaan lan lino tomate, tu mupatu lako.

¹¹Kutiro pole’omi lan naarrang matanna allo, kumua iatu polean disilombai tangia tomalinta’ tongan unnalai, sia iatu kapataloan lan kasirarian tangia to matoto’ tongan unnalai, sia iatu kande tangia tokinaa unnalai, sia iatu kasugiran tangia tomanarang unnalai, sia iatu pa’kamase tangia tounnampui tangnga’ kinaa unnalai, belanna attu sia upa’ urrampoi sola nasangi.

¹²Belanna iatu tolino tae’ duka natandai tu dalle’na, susito bale tiramban diala lan dalla’ sia susito manuk-manuk ditingkan lan porro’. Susi dukamoto tu mintu’ ma’rupa tau dipoya, lan attu kamandasan, ke ta’pa narampoi te iannate.

¹³Ia dukamote kutiro tu misa’ apa lan naarrang matanna allo iato tu kakinaan, tu umpatiakka’ tongan penaangku.

¹⁴Iamotu, den misa’ kota bitti’ sia sidi’ri tau lan, anna sae misa’ datu kapua ullaoi sia umpatama limbui, anna pabendan ba’tu pira-pira tambakuku malangka’ la ullaoi.

¹⁵Lan kota iato den misa’ tobongko kinaa tu ma’din ullendokanni tu kota iato bannang dio kakinaanna, apa moi misa’ tau tae’ ungkilalai tu tobongko iato.

¹⁶Ma’kadamo’ kukua: La’biran ia tu kakinaan na ia tu kamabukuan, apa iatu kakinaanna to bongko nasayu liu tau sia tae’ duka naperangii tu kadanna.

¹⁷Iatu kadanna to kinaa, ke naperangii tau situang karapasan mandu melo anna pelallak-lallakna to ma’parenta dio lu to baga.

¹⁸Iatu kakinaan mandu melo na iatu pa’buno rari, apa misa’ to kadake gau’na ussanggangi buda apa melo.