Read Toraja-Sa'dan PA’TENDENG BALLO 3 Bible Online

PA’TENDENG BALLO 3 - Toraja-Sa'dan bible

PA’TENDENG BALLO 3

¹Den sangbongi tongku dao patindoangku angku daka’i tu andi’ pa’kaboro’ inaangku, kudaka’, apa tae’ kukabu’tui.

²La millikna’ sia male sumalong lan lu kota, dio lu mintu’ batatta sia tana lapang, angku daka’i tu andi’ pa’kaboro’ inaangku; kudaka’, apa tae’ kukabu’tui.

³Naapparanmo’ to ma’ronda’, tu sumalong lan lu kota iato, angku ma’kada kukua: Tae’raka mitiroi tu andi’ pa’kaboro’ inaangku?

⁴Mane ra’pa’na lendu’ dio mai tau iato mai, kukabu’tuimi tu andi’ pa’kaboro’ inaangku. Kula’ka’imi, sia tae’ kurampananni male, ke tae’pi kubaai tama banuanna indo’ku, tama bilikna to padadiangku.

⁵Umpalaona’ sumpa ussa’bu’ sanganna kijang sia donga birang dio lu padang, unnada’ikomi, e mintu’ anak dara Yerusalem, kumua da mipopengkilalai sia da mitundanni tu kamamaliran, ke tae’pi nasae kamoraianna.

⁶Apara ia tu sae dio mai padang aak, susito lentong rambu, ma’bau muru sia dupa sia mintu’ pebangki’ busarungngu’na to ma’balili?

⁷Tiromi, iamote tu bulleanna Salomo, natikui annan pulona to lalong dio mai mintu’ lalongna to Israel.

⁸Ma’pa’dang nasang sia manakkamo lan tananan ra’, pantan untakin pa’dangna belanna apa megiangan ke bongi.

⁹Mangkamo tu datu Salomo unggaragan kalena misa’ bullean datu kayu Libanon.

¹⁰Mintu’ lentongna salaka nagaragai sia sanderanna bulaan, o’koranna sampin lango-lango, na iatu lanna lu dibeloi sampin pa’kamasena mintu’ anak dara Yerusalem.

¹¹Tassu’komi, e mintu’ anak dara Sion. Tiroi tu datu Salomo, ma’makota, tu napasongkoranni indo’na, tonna tidukun tama rampanan kapa’, tonna allo kasendeanna penaanna datu.