Read Toraja-Sa'dan PA’TENDENG BALLO 4 Bible Online

PA’TENDENG BALLO 4 - Toraja-Sa'dan bible

PA’TENDENG BALLO 4

¹Tonganna, lendu’ ia maelomu, e rindungku, manassa, lendu’ ia maballomu; iatu matammu susi dangan-dangan, tu payan ullendu’i bobongmu, beluakmu susito sangbaanan bembe’, songlo’ tikalulun-lulun dao mai buntu Gilead.

²Iatu isimmu susito sangbaanan domba tu mane mangka digontingi bulunnna, anna kendek diong mai pa’baseanna, mintu’i sibaa anak rapi’na, na moi misa’ tae’ sisayuran anak.

³Iatu pudukmu susito bannang karamisi sia melo rarek sadangmu. Iatu pili’mu susito bua dalima dipiak, tu payan ullendu’i bobongmu.

⁴Iatu barokomu susi menarana Daud, dipabendan massora-sora lolokna, iatu balulang sangsa’bu ditoke’ dio, mintu’nato iamo pakolongna to lalong.

⁵Iatu susummu patomali sangtinti da’dua anak kijang rapi’ tu undaka’ kande dio lu to’ danga-danga.

⁶Sae lako mangiri’na angin makaroen sia pa’dena mintu’ ongan-ongan la malena’ lako buntu nanii muru, lako tanete nanii dupa.

⁷Melo tu pa’kaleammu, e rindungku, sia moi sidi’ tae’ sayuammu.

⁸Songlo’ko mai dao mai Libanon, e dodo’ sangkalamma’ku, songlo’ko dao mai Libanon, songlo’ko dao mai botto Amana, dao mai botto Senir sia dao mai Hermon, tu nanii lo’ko’ singa, tu buntu natorroi arimau buluh.

⁹Mupatiludak tu penaangku, e adingku, e dodo’ sangkalamma’ku, mupatiludak tu penaangku moi mupissanri umpata’paina’ mata, moi nasangtintingri manik lan barokomu.

¹⁰Lendu’ ia keangga’na, tu mali’mu, e adingku, e dodo’ sangkalamma’ku, lendu’ ia marasanna tu mali’mu na uai anggoro’ sia la’bi busarungngu’ ia tu minna’ pandere’mu na iatu mintu’ pebangki’.

¹¹Pudukmu umpato’do uai tani’ enoan, e dodo’ sangkalamma’ku, iatu tani’ enoan sia pangandu’ diongna lu lilamu; sia iatu busarungngu’na pakeammu susi busarungngu’na Libanon.

¹²Iatu iko sangtinti pa’lak tu dibala tiku lao, e adingku, e dodo’ sangkalamma’ku, butung to kalimbuang dirompo, sia mata uai digonting sia dica’.

¹³Iatu mintu’ tarukmu susito pa’lak kamanamanan, nasitutu’i garonto’ dalima, tu maelo buanna sia bunga enna sia oto’ narawastu,

¹⁴narawastu, kuni’, bangle sia kayu matappa’, sia mintu’ oto’ dupa, muru sia aloe kayu busarungngu’ sia mintu’ rupanna pebangki’ melo.

¹⁵E uai tikula’dakna mintu’ pa’lak bunga, e kalimbuang boba, e salu’-salu’ dao mai Libanon!

¹⁶— Ke’de’ko, e angin ma’paludaa mai, maiko e angin ma’palulo’ mai, mangiri’ko lan pa’lak bungangku, anna tipamaen-maen tu busarungngu’na mintu’ pebangki’na! La tama pa’lak bunganna tu andi’ pa’kaboro’ku, anna kandei tu mai bua-bua maelona.