Read Toraja-Sa'dan PA’TENDENG BALLO 5 Bible Online

PA’TENDENG BALLO 5 - Toraja-Sa'dan bible

PA’TENDENG BALLO 5

¹— Saemo’ lako pa’lak bungangku, e adingku, e dodo’ sangkalamma’ku, kururukmo tu murungku sia pebangki’ku, kukandemo tu tallo’ merangku sola tani’ enoangku, kuiru’mo tu uai anggoro’ku sia pangandu’ku. E mintu’ sangmaneku, la kumandekomi sia mangiru’, sanabossami, e sangmane karra’ku.

²Mamma’mo’, apa iatu penaangku pasa’dingpa. Perangiimi, iatu andi’ pa’kaboro’ku undedek ba’ba, nakua: Bungkaranna’ ba’ba, e adingku, e rindungku, e dangan-danganku, e baine adang-adangku, tu tae’ sayuanna, belanna iatu ulungku nabonakki ambun, sia iatu mintu’ beluak ma’lendongku narandangi pini-pini malillin.

³Mangkamo kualai tu bayungku, naumba la kukua umpopake pole’i sule? Kubaseimo tu lette’ku, naumba la kukua urruttakki pole’i?

⁴Iatu andi’ pa’kaboro’ku tonna ulu limanna dio to’tok ba’ba, natukka’mo’ penaangku ungkamali’i.

⁵Millikmo’i la umbungkaranni ba’ba tu andi’ pa’kaboro’ku, anna nii muru to’do-to’do tu limangku, sia nale’ke’i muru lolong tu rakka’ku, dio toean salli’ ba’ba.

⁶Kubungkarammi ba’ba tu andi’ pa’kaboro’ku, apa leakmo male! Mallaimi tu deatangku tonna ma’kada, malemo’ undaka’i, apa tae’ kukabu’tui, kutambai apa tae’mo napebaliina’.

⁷Naapparammo’ pa’ronda’, tu male sumalong lan lu kota, anna bambana’ sia nakambeina’, sia naalaina’ tu lullungku, iamotu to ma’kampa dao lu benteng tembo’.

⁸Umpalaona’ sumpa umpokadangkomi, e mintu’ anak dara Yerusalem, ke miapparanni tu andi’ pa’kaboro’ku, apara la mipokada lako? Pokadanni, kumua littuna’ napobua’ kamamaliran.

⁹— Apara losongna tu andi’ pa’kaboro’mu na iatu mintu’ muane senga’, e iko tu tarru’ maelo dio lu mintu’ baine? Apara losongna tu andi’ pa’kaboro’mu na iatu mintu’ muane senga’, ammu palao sumpa umpokadangkanni susito?

¹⁰— Iatu andi’ pa’kaboro’ku mabusa sia mararang rupanna, iatu rupanna ussau’ tau sangpulo sa’bunna.

¹¹Iatu ulunna susito bulaan massang sia bulaan tasak, iatu beluak ma’lendongna tikalulun-lulun sia malotong susi kadoya.

¹²Iatu matanna susito dangan-dangan dio biring salu’-salu’, tu mendio’ lan pangandu’ sia unno’ko’ dio to’ kalimbuang boba.

¹³Iatu popona susito sangtampang oto’ pebangki’, susito sangtempe’ oto’ rampa-rampa, iatu pudukna susito danga-danga, nanii to’do-to’do muru lolong.

¹⁴Iatu takia’na susito bulaan kalebu, diparimatai parimata Tarsis, iatu kalena susito gading nagaraga to pande paliu, nasitutu’i parimata lasuri’.

¹⁵Iatu lette’na susito lentong marmar toppo’ dao parandangan bulaan tasak; iatu pati’na susito Libanon, mala’bi’ sangtinti garonto’ arasi’.

¹⁶Iatu mai lingarona kamatapparan manna, sia iatu mintu’ dio kalena mepasendena manna. Susimo a’ganna to tu andi’ pa’kaboro’ku, susimo garaganna to tu sangkalamma’ku e, mintu’ anak dara Yerusalem.