Read Toraja-Sa'dan PA’TENDENG BALLO 7 Bible Online

PA’TENDENG BALLO 7 - Toraja-Sa'dan bible

PA’TENDENG BALLO 7

¹Lendu’ ia melona tu tengkamu ma’sepatu, e anak datu! Iatu bangun pupummu susito apa dipobelo, panggaraga lima to pande.

²Iatu posi’mu susito irusan malepong, dennoupa’ anna tang ma’ti’ tu uai na anggoro’ dipasito’bo’ lan, iatu pa’tambukammu sang tinti patuku gandung, natalimbung tama danga-danga.

³Iatu susummu patomali sangtinti da’dua anak kijang rapi’.

⁴Iatu barokomu susi menara gading, iatu matammu sangtinti limbong dio Hesbon, sikandappi’ babangan Batrabim, iatu illongmu susi menara dao Libanon, mentingo lu lako Damsyik.

⁵Iatu ulummu daona lu kalemu susi Karmel, iatu ampinni’ beluakmu sangtinti lango-lango: misa’ datu mangka napoya elong beluakmu.

⁶— Lendu’ maelona tu kamamaliran; lendu’ mala’bi’na tu mintu’na apa nakamorai tau!

⁷— Kamala’biranna pati’mu sangtinti koroma, sia susummu susito eteng bua koroma.

⁸Ma’kadana’ kukua: la kuteka’ tu koroma iato sia kuala eteng buanna. Lala sia manii na iatu susummu susi bure anggoro’, sia iatu penaammu busarungngu’ sangtinti lemo datu.

⁹Iatu lingaromu susito uai anggoro’ mandu mala’bi’ tu lolong tarru’ lako pa’kaboro’ku, sia lembo’ lako pudukna ke mamma’i.

¹⁰Iatu aku te, andi’ pa’kaboro’ku puangna, sia lu lako kaleku nanii rampo tu kamamaliranna.

¹¹Maikomi, e andi’ pa’laboro’ku, anta tassu’ lako padang, da’ito tama’bongi dio lu to’ bunga enna.

¹²La melambi’ki’ male lako pa’lak anggoro’, la untiroi, ba’tu la mentaruk siai tu garonto’ anggoro’, sia ba’tu la tiballa’ siai tu ta’binna, sia ba’tu la menta’bi siai tu dalima. Indemo to dio la kunii umpatiroangkomi tu mali’ku.

¹³Busarungngu’ tu bua dudain, sia dio to’ ba’bata nanii tuo ma’rupa-rupa bua melo, ba’runna sia masainna, tu kuparandanangkomi, e andi’ pa’kaboro’ku.