Read Toraja-Sa'dan PA’TENDENG BALLO 8 Bible Online

PA’TENDENG BALLO 8 - Toraja-Sa'dan bible

PA’TENDENG BALLO 8

¹E kemmi susiora tu anak muaneku, tu dipasusu dio indo’ku! Iake sitammuki’ dio lu salian, manassa kuudungkomi, anna moi misa’ tau tae’ ussayuna’ tu diona to.

²Manassa kusolangkomi sia kuanta’komi lako banuanna indo’ku, tu umpalobo’na’; manassa la kupairu’komi uai anggoro’ dipasito’bo’ rampa-rampa busarungngu’, sia uai dalima mangura.

³Iatu lima kairinna ussare ulungku sia iatu lima kananna urraka’na’.

⁴Umpalaona’ sumpa umpokadangkomi, e anak dara Yerusalem, kumua: Ma’apai ammi popengkilalai sia mitundan tu kamamaliran, ke tae’pi nasae kamoraianna?

⁵Mindara iatu sae lan mai padang aak anna mennambe lako andi’ pa’kaboro’na? — Diong garonto’ lemo datu kuni umpamillikko, inde to dio nanii indo’mu umpanguriasangko, inde to dio nanii umpanguriasangko tu to undadiangko.

⁶— Toke’na’ dio ara’mi susi misa’ sissin peca’, sia susi misa’ peca’ dio takia’mi. Belanna iatu kamatotoranna kamamaliran susi kamawatanganna kamatean, tang disaka’ tu tukka’na kamamaliran susi pattalo’-talo’na lino tomate, iatu mellepa’na susi mellepa’na api, api ma’lulu-luluNa PUANG.

⁷Moi anna iatu uai buda tae’ nakullei umpa’dei tu kamamaliran sia mintu’ salu tae’ nakullei untu’ba’i male. Moi namintu’ iananna tau nabutungananni, kumua nalolongan pa’kaboro’, manassa la ditumpu sia kasirisan.

⁸— Den misa’ adinta baine, tu anak dara’-dara’pa. La tapatumbai tu adinta, ke attunnamo la napotumai tau?

⁹Iake susii benteng tembo’, la tabangun dao tu menara salaka dipopassora-sora lolokna; apa iake susii ba’ba, la tasalli’ papan kayu arasi’.

¹⁰— Iatu aku butung benteng tembo’ na iatu susungku sangtinti menara. Attu iato butungna’ to mengkanorong dio pentirona.

¹¹Iatu Salomo unnampui misa’ pa’lak anggoro’ dio Baal-Hamon. Iatu pa’lak anggoro’ iato naben mintu’ to ma’kampa; morai tau la umbaya’i tu burana sangsa’bu sikele’ salaka.

¹²Iatu pa’lak anggoro’ku, iamoto tu apangku, lan limangku; iatu sangsa’bu sikele’ kupopa’elo’namo lako kalemi, e Salomo, na iatu duaratu’ sikele’ la lu lako to ungkampai burana.

¹³— E iko tu untorroi pa’lak bunga iatu mintu’ sangmane la umperangii gamarammu, pa’perangiammi to lako kaleku.

¹⁴— Madoi’komi, e andi’ pa’kaboro’ku, sia susikomi kijang ba’tu susi anak donga dao lu buntu nasitutu’i oto’ pebangki’.