Read Toraja-Sa'dan YESAYA 10 Bible Online

YESAYA 10 - Toraja-Sa'dan bible

YESAYA 10

¹Upu’ allona tu mintu’ to umpatassu’ parenta tang malambu’ sia to massura’ tu umpalao pesua matana’,

²la umpatoyang to mase-mase dio mai salunna sia urrampa katongananna taungKu tu tang pa’bela, anna ala rampai tu baine balu sia ullo’do’ pia biung.

³Apa apara la mipogau’, ke allo kadiukungan sia ke naruakomi kasanggangan bu’tu mambela? Mindara la minii mallai umpalaku pa’tunduan sia umbara la minii umpalumpunni meloi tu kamala’birammi?

⁴Tae’ anna salai tu tau iato mai tang tuttu susi to dipattang; tibambang butung to dipatei. Moi anna susito iate mintu’na, tae’ anna poradanni kasengkeanNa Puang sangadinna tontong bangpa tie’te’ tu limanNa.

⁵Upu’ allona Asyur, tu pebamba sengkeKu, sia lan lisu pala’na tu kamare’dekangKu butung pelonga’.

⁶Kusuamo umpandasa misa’ bangsa tang mekaaluk sia Kukuan la ullaoi misa’ to sangpetayanan narua kasengkeangKu, la umpangrampai sia umpanglo’do’i anna lullu’i tu tau iato mai susi so’mak dio lu lalan.

⁷Apa iatu passanganna tae’ anna susito, sia iatu pa’inayanna tang ten to, sangadinna iatu lalan penaanna la ussanggang sia la urroto’i ba’tu sangapa bangsa.

⁸Belanna nakua tu kadanna: Tang sibaaraka datu tu mintu’ arungku?

⁹Tang baliraka Karkemis tu Kalno, sia Arpad tu Hamat? Tang baliraka Damsyik tu Samaria?

¹⁰Susi limangku ussau’ parentana dipa’deatainna, moi anna mandu maballo iatu rapang-rapang dipodeata dipa’na anna rapang-rapang dipodeata dio Yerusalem sia dio Samaria;

¹¹sia tumba tu kupogau’na lako Samaria sia lako tumai rapang-rapang napodeatanna tae’raka anna la susito tu la kupogau’ lako Yerusalem sia lako tu mai rapang-rapang dipodeatanna?

¹²Apa la dadi ke tepumi tu Puang umpogau’ pengkaranganNa dao buntu Sion sia dio Yerusalem, la rampoNa’ unnukungi tu napabu’tunna penaa madaona datu Asyur sia matampo patiro solo’na.

¹³Belanna nakua: Diona kamawatanganna kalena limangku, sia diona kamatarrusangku angku pogau’i susito, belanna unnampuina’ tangnga’ kinaa; iamoto angku lampi’i tu katonan padangna tau, angku rampai tu mai barang apanna sia butungna’ to tedong lampung laki ussembangi tu pa’tondokan.

¹⁴Sia iatu limangku ulla’ka’i barang apanna ba’tu pira-pira bangsa ten to serang manuk-manuk; sangtinti to to ulliu tallo’ natampe indo’na, ten dukato tu mintu’ lino kurampa na moi misa’ tae’ napanggega’ tu pani’na ba’tu umpopenganga tillokna ba’tu kumissak-missak.

¹⁵Denraka tu uase madongnga’ lako to umpemba’tanni? Denraka tu gare’ge’ matampo lako to ussorongi? Butung to pebamba umpopangayo to untoei; butung to tekken unnangka’i tu tangia kayu.

¹⁶Iamoto anNa popembali madokoi Puang, iamotu PUANGna mintu’ ma’dandan maritik tu kale malompona sia diongna lu kamala’biranna den tu apa ma’lana-lana susi api dukku.

¹⁷Attu iato Arrangna to Israel la bali to api sia iatu To maserona la bali dukku api, tu la umballa sia ungkande durinna sia a’da’na Asyur lan sangallo bangri.

¹⁸La Nasopui duka Puang tu kamala’biranna pangala’na sia pa’lakna, la deatanna la batang kalena, — la bali misa’ to marangke kale.

¹⁹Iatu kayu torropa lan pangala’na tae’mo anna marian, naurunganni ma’dinmo napatama sura’ misa’ pia tu bilanganna.

²⁰La dadi to allo iato, kumua iatu to Israel tu torronapa sia bati’na Yakub tu tilendoknamo tae’mo anna la sande’ lako to umpandasai, sangadinna la sande’ bulo lollong lako PUANG, To maserona to Israel.

²¹Iatu to torropa la tibalik sule, sia bati’ torronapa Yakub, la sule umpengkara’pai Puang Matua matoto’.

²²Belanna, moi anna iatu bilanganna bangsamu, e Israel, susito karangan dio biring tasik, ia manna tibalik sule tu torronapa; inang tilampakmo tu kasanggangan situang kamaloloan lempan.

²³Belanna misa’ kasanggangan tilampakmo la Napaden Puang, PUANGna mintu’ ma’dandan maritik lan lili’na lino.

²⁴Iamoto anna ma’kada tu Puang, PUANGna mintu’ ma’dandan maritik, Nakua: Da mikataku’i tu to Asyur, e taungKu lan Sion, ke nalongkankomi pelonga’, sia napata’paikomi pebamba, susito Mesir pirambongi’.

²⁵Belanna sangattu’mora sia tae’mo namasai anna tappu tu kare’dekan, nalu lako kasangganganna tau iato mai tu kasengkeangKu.

²⁶Belanna iatu PUANGna mintu’ ma’dandan maritik umpopangayo pebamba lako tau iato mai susi tonna dipasiapanan tu to Midian dio buntu batu Oreb, sia Napopangayo tu tekkenNa dao tasik sia Natadedangan susi tonna lako Mesir.

²⁷La dadi allo iato kumua iatu pamaanna la tilendok dao mai palempengmi sia iatu ayokana la tilendok dao mai sokkongmi, la sanggang tu ayoka dao palempengmi.

²⁸Saemi lako Ayat, anna tarru’ lako Migron, anna tampei tu mai apanna di Mikhmas.

²⁹Tau iato mai unnola kumila’: Geba tanii ma’bongi; anna ma’parondo tu Rama; mallai duka tu pa’tondokan Gibea-Saul.

³⁰Silallakangko, e anak dara Galim, matangkinko, Laisya, sosoko, Anatot.

³¹Iatu pa’tondokan Madmena mallai, sia ia duka tu pa’tondokan Gebim mallai membuni.

³²Iate allo torropa dio Nob, naka’panan pebusuk tu buntunna anak dara Sion, tanetena Yerusalem.

³³Apa ta’pa Nata’takki Puang, PUANGna mintu’ ma’dandan maritik situang kalalonganNa tu mintu’ tangkena sia lolokna, sia iatu batang kalandona Nalelleng sia iatu kapuana Nasongkan rokko padang.

³⁴Attu iato pangala’ tamman la Nalelleng uase Puang, sia iatu Libanon la Napasiapanan Puang sumpu mala’bi’.