Read Toraja-Sa'dan YESAYA 11 Bible Online

YESAYA 11 - Toraja-Sa'dan bible

YESAYA 11

¹La mentaruk tu garempongna Isai sia mellolo namembua tu taruk uaka’na.

²Ia la Nanii ta’pa PenaanNa PUANG, iamotu Penaa kakinaan sia tangnga’ kinaa, Penaa pa’timbangan sia kamatotoran, Penaa kapaissanan sia kamatakuran lako PUANG.

³Iamo pa’poraianna tu ungkataku’ PUANG. Tae’ anna la ma’paolai salu unturu’ pentirona sia tae’ anna la mangra’ta’ unturu’ paranginna.

⁴Sangadinna iatu to bitti’ la napaolai malolo salunna sia nasanda tonganni situang kamalamburan tu to umpamadiong penaanna; apa tete dio pebamba tongka’ dililana la napa’dikan lino, sia penaa sun dipudukna la napateanni tu to tang mekaaluk.

⁵La umpopa’bakkan kamaloloan sia la umpotambeke’ kamarurusan.

⁶Attu iato guruk la sikananaran anak domba, sia iatu arimau buluh sanglengaran bembe’ laki’-laki’, na iatu anak sapi sia anak singa sia sapi passoma la sangbala sia pia’-pia’ la umpasangkambiranni.

⁷Attu iato beruang birang sola sapi la sibaa ungkande riu sia iatu mai anakna sibaa unno’ko’, sia iatu singa la ungkande dalame susi sapi.

⁸Attu iato iatu pia sumusupa la maningo dio to’ baba to’tok ula’ rame sia iatu pia mane sarak susu unnulu limanna tama lo’ko’ ula’ keipo.

⁹Tae’mo tau la umpogau’ kakadakean ba’tu la umpabu’tu mesangganginna dao lili’na buntu maindanKu. Belanna la naponnoi kapaissanan diona PUANG tu mintu’ lino susi uai buda ussamboi salinna tasik.

¹⁰Allo ia dukato anna iatu taruk uaka’na Isai la tulangdan napobate-bate mintu’ bangsa sia la napengkaa’i mintu’ to sangpetayanan; sia iatu inan nanii mari’pi la mala’bi’.

¹¹Allo ia dukato la dadi kumua Puang la unnete’ pole limanNa la ulla’bakki sule tu taunNa tu mai torronapa, tu mai torronapa dio Asyur, dio Mesir, dio Patros, dio Etiopia, dio Elam, dio Sinear, dio Hamat na dio lu tondok ma’randan tasik.

¹²La Naangkaran bate-bate tu mintu’ bangsa sia la Napasipulung sae tu mintu’ to Israel mangka diula’i male, sia la Napopa’misa sule dio mai tetuk a’pa’na lino tu mintu’ baine to Yehuda mangka dipatisambo’-sambo’.

¹³Attu iato la pa’de kamagallianna Efraim sia iatu to ussussai Yehuda la diroto’i; tae’mo anna la ungkagalli Efraim tu Yehuda sia tae’mo anna la ussussai Yehuda tu Efraim.

¹⁴Sangadinna la sanginaa sola duai la ma’palulako matampu’ undammak palempengna to Filistin, anna pangrampai tu to rampe matallo; iatu limanna la ussabak to Edom sola to Moab sia mintu’ to Amon la mengkanorong lako kalena.

¹⁵La Nagatai PUANG tu tasik mengkokona Mesir sia la Naaak lima tu Salu iato anna marangke napobua’ anginNa, sia la Napopempitu tu salu iato, sia Napalingkai tau ma’sepatu.

¹⁶Attu iato la den tu batatta naola taunNa tu torrona siapa, iamotu torrona siapa dio Asyur, susito pirambongi’ dipadenan to Israel tonna tassu’ lan mai tondok Mesir.