Read Toraja-Sa'dan YESAYA 13 Bible Online

YESAYA 13 - Toraja-Sa'dan bible

YESAYA 13

¹Inde sia tu kada Napa’petanggungan Puang Matua diona Babel, tu mangka dipasombo lako Yesaya, anakna Amos:

²Osokki tu bate-bate dao buntu tang karerungan, pekapuai tu gamarammi metamba lako tau iato mai; popangayoi tu limammi, anna unnola dio to’ ba’bana to la’bi’.

³Mangkamo Kukuan tu mintu’ to marimbangangKu, sia Kutambai dukamo tu mintu’ pa’baraningKu la umpalalo kasengkeangKu, tu unnarrak-arrak belanna nasau penaanna.

⁴Dirangimi tu ongngo’ dao buntu susito ongngo’na tau buda, gamara tipio padangna mintu’ bangsa sita’pa dio mai mintu’ parenta. PUANGna kalena mintu’ ma’dandan maritik tu umparessa sangtuntunan surodadu.

⁵Tau iato mai lu dio mai padang mambela, dio mai randan langi’, PUANG sola parea kasengkeanNa tu la ussanggangi tu mintu’ lino.

⁶Sitangirangkomi, belanna mandappi’mo tu alloNa PUANG; sae butung kasanggangan dio mai To umpoissan angge maritik.

⁷Iamoto anna la langga’ tu mintu’ lima sia la bonnong tu penaanna mintu’ tolino.

⁸Sia tiramban tu tau iato mai, ma’paganggang sia narampoi kamaparrisan, mangumbero susito baine manguria’; buyu’ sitiro len tu tau iato mai sia iatu lindona borrong susito api.

⁹Inang la sae tu alloNa PUANG sitonda kamaparrangan sia kamagallian anna iatu kasengkean dukku-dukku, tu la umpopempadang lo’bangi tu mintu’ lino, sia la nasabu’i tu mintu’ to umpogau’ kasalan lan te lino.

¹⁰Belanna mintu’ bintoen dao langi’ sia bintoen ma’karupu tae’mo anna la umpatiarrang arrangna; ia duka tu allo la dipamalillin, ke dellekki sia iatu bulan tae’mo anna la umpamian arrangna.

¹¹Belanna la Kupapakkanni lako mintu’ issinna lino tu kakadakeanna sia iatu kakelokanna la Kupapakkanni lako mintu’ to tang mekaaluk, sia la Kuputtai tu kamadongngaranna to matampo sia la Kupampa lu rokko tu kamadaoan penaanna to kelok.

¹²La Kupamasuli’ ia tu tolino anna bulaan massang, sia keangga’ kapua iatu rupa tau anna bulaan tasak dio mai Ofir.

¹³Iamoto angKu la umpatigega’ i tu langi’ sia iatu lino la lino’ sia tilele dio mai inanna, napobua’ kare’dekanna ara’Na PUANGna mintu’ ma’dandan maritik tonna allo kadukkuanna kasengkeanNa.

¹⁴Tau iato mai la ten kijang diula’ sia la sangtinti domba tang dikambi’ pantan la sule umpengkara’pai bangsana sia pantan mallai umpengkaa’i tondokna.

¹⁵Minda-minda tu dikabu’tui la dirauk, sia minda-minda tu dila’ka’i la mate nakande bassi.

¹⁶Sia iatu mintu’ anakna la dipessambakan dio tingayona tau iato mai, mintu’ banuanna la dilo’do’i sia mintu’ bainena la ditoro’-buku.

¹⁷La Kupare’dek ara’na tu to Madai unnea tau iato mai, tu misa’ bangsa tang ungkabudai salaka sia tang ungkaduangi bulaan.

¹⁸Sangadinna iatu tinaranna ussanggang pia muane sia tae’ anna katirinnai tu mai lanna pa’tambukan, sia tang mamase untiro pia’-pia’.

¹⁹Na iatu Babel tu napotarompo’ mintu’ kadatuan sia kamala’biran nasattuan mintu’ to Kasdim la susi Sodom na Gomora, tonna palumbangi Puang Matua.

²⁰Tae’mo nala umpa’tondokki tau tontong sae lakona sia tae’mo inan nanii ma’tondok landa’ lako disituran-turananni, moi to Arab tae’mo nama’tenda dio sia moi to manglaa tae’ dukamo la umpakande pangkambi’na dio.

²¹Sangadinna la nanii serigala buriko’ torro sia iatu mai banuanna la ponno langau, sia nanii torro anak burung unta dio sia ampu padang silo’dok-lo’dokan.

²²Sia lan mintu’ tambakukunna la nanii ungnguang-nguang asu lampung sia lan tongkonan layukna nanii ma’pema’mik-ma’mik la nanii serigala; iatu attunna mandappi’mo sia iatu allona tang la dipapodo’mo.