Read Toraja-Sa'dan YESAYA 16 Bible Online

YESAYA 16 - Toraja-Sa'dan bible

YESAYA 16

¹Melo ke napa’peai to ma’parenta tu anak domba dio mai to’ buntu batu unnola padang aak tarru’ lako buntu anak dara Sion.

²La den attu anna iatu mai anak dara Moab la torro dio kalambanan Arnon, sangtinti to manuk-manuk kaguririk-ririk, susito serang manuk-manuk tisea’-sea’.

³Pabu’tui tu tangnga’ maelo, pa’benni tu kada mata’tak; pemakambanni tu onganmu ketangngai allo, susi ke mabongii; bunii tu to diula’, da mupa’peturoanni tu to mallai.

⁴Melo ke mupakendekki banuammu tu mintu’ to Moab mallai, la napopentirerungangko dio mai mintu’ to pasanggangan. Iake purami tu to ma’pakario-rio, upu’mo tu kasanggangan, pa’demi lan mai tondok tu to pasanggangan,

⁵la dipabendan tana’ misa’ isungan kapayungan diparandanganni kamasokanan, anna dao to lan tendana Daud la nanii unnisung situang kamarurusan misa’ to la mangra’ta’ sia untuntun katonganan, tu matira’ umpogau’ sanda salunna.

⁶Kirangimo tu kamadaoan penaanna to Moab, kumua matampo maro’ ia, sia kamatampoanna sia kamadoanna penaanna sia kamasa’garanna sia kada tang kebattuanna.

⁷Iamoto anna tangi’i to Moab tu diona Moab, la sitangiran sola nasang; siangleankomi belanna sisayurammo deppa bua anggoro’na Kir-Hareset, tu kamunna to disabu’imo.

⁸Belanna mintu’ tananan dio Hesbon marangkemo: iamotu mintu’ kayu anggoro’na Sibma tu napasiapanammo mintu’ to ma’parentana bangsa iato mai tu bua melona, iatu mai tangkena sae lako Yaezer, kumpang lako padang aak, iatu mai takke’-takke’na mendolok tama tasik.

⁹Iamoto angku tumangi’ untangi’i Yaezer sola garonto’ anggoro’ Sibma; kupato’doiko uai matangku, e Hesbon sola Eleale, belanna nalambi’mo arrak rari tu to mangliu bua kayummu sia to mebua anggoro’mu.

¹⁰Mintu’ kasendean sia arrak pa’demo lan mai to’ pa’lak sia tae’mo tau mela’tek ba’tu unnarrak lan pa’lak anggoro’; tae’mo anna parrai tu anggoro’ lan to’ pa’parranna; Kupapu’du’mo tu la’tek silelean.

¹¹Iamoto anna ma’rundede tu penaangku susi oni katapi diona Moab sia ba’tengku lan diona Kir-Heres.

¹²Belanna iake saei tu Moab, sia tang mengkata’ka’ dao inan madao, anna sae tama inan maindanna la mangimbo, tae’ duka naappa’i tu lalan penaanna.

¹³Iamote tu kada masaimo Napokada PUANG tu diona Moab.

¹⁴Apa totemo nakua tu kadanNa PUANG: Tallung taunpi, susitu taun to sumaro, anna mintu’ kamala’biranna Moab membali kamatunan sola mintu’ kamapuluranna; iatu torronapa la sidi’ sia la bitti’ sia tang keangga’.