Read Toraja-Sa'dan YESAYA 17 Bible Online

YESAYA 17 - Toraja-Sa'dan bible

YESAYA 17

¹Inde sia tu kada Napa’petanggungan Puang Matua diona Damsyik. Iatu Damsyik la disanggang, anna tae’mo na mengkota, anna daun lauan sia sangtinti to batu disaeran.

²Mintu’ kota Aroër la lo’bang, nanii panglambaran domba, tu silengaran dio natae’ tau la umpatumba lenni.

³Iatu tambakukunna Efraim sia parenta Damsyik sia iatu to Aram dennapa la roto’ nasang; iatu kamala’biranna la bali kamala’biranna to Israel, kadanNa PUANGna mintu’ ma’dandan maritik.

⁴Attu iato iatu kamala’biranna Yakub la sosso’ sia iatu kamalompoanna kalena la tilao.

⁵La susi a’ganna to umpopa’uyun gandung, anna sae’i limanna tu buli gandung, sia susito ma’kalolang dio rante Refaim.

⁶La ia manna tinampe tu diala undinna susito ke naremba’i tau tu bua-bua zaitun, tinampe da’dua tallu tu buanna dao lolokna, a’pa’ ba’tu lima dio tangke membuanna, kadanNa PUANG, Kapenombanna to Israel.

⁷Allo iato iatu tolino la mentingara lako To menampana sia iatu matanna la mentiro lako To maserona to Israel.

⁸Tae’mo anna mentingara tu tau iato mai lako inan pemalaran, panggaraga limanna; sia tae’mo anna la mentiro lako tu apa nagaraga rangka’na, iamo lentong dipodeata sia inan pemalaran dinii untunu dupa.

⁹Allo iato iatu mai tambakukunna la ten tondok talo lan pangala’ sia dao lu buntu, tu natampe tau, belanna natalo to Israel sia la mempadang lo’bang.

¹⁰Belanna mukalupai tu Puang Matua oto’na kasalamarammu sia tang mukilalaimo tu Buntu batu pentirerungammu. Iamoto ammu garaga pa’lak ballo, sia mutananni tananan to salian lembang.

¹¹Iato allo munii untananni ia bangsiamo munii umpatuoi sia iatonna melambi’ ta’pa mupopenta’bi tu pangambo’mu — pa’de tu burana, ke allo nalambi’ saki sia pa’di’ tang sirua-rua.

¹²A’a lendu’mo rukkana mintu’ bangsa, tu marukka susi mariakna tasik, sia lendu’ mongngo’na tu mintu’ sangpetayanan susi mongngo’na uai buda.

¹³Da’ito anna marukka tu mintu’ bangsa susi uai kapua mariak, apa Nata’tan, anna mallai toyang tu tau iato mai sia sisarombonan lao susi ta’pian napettiaran angin langngan buntu sia susi daun tallang naguririkan talimpuru’.

¹⁴Iake makaroenni inang manassa den katirambanan, anna iake tae’pi natilalek masiang, pa’demi tu tau iato mai. Iamote tu serongna to mangka umpanglo’do’iki’ sia dalle’na mintu’ to umpangrampaiki’.