Read Toraja-Sa'dan YESAYA 18 Bible Online

YESAYA 18 - Toraja-Sa'dan bible

YESAYA 18

¹A’a dikka’ tu tondok naba’bakki kasisi’, tu nabala salu Etiopia,

²tu ussua sumbungan puduk ullamban tasik, ma’lembang tallang unnola salu. Malekomi, e lentek maringan lako misa’ bangsa kalando sia pandillak, lako bangsa masarrang sia patengko lullu’, sia iatu padangna naruak tangnga salu.

³E kamu mintu’ issinna lino sia mintu’ to untorroi kuli’na padang, iake naosokki tau tu bandera dao ma’buntunna, sipatu la mitiro, sia iake dipannonii tu napiri tanduk, sipatu la miperangii.

⁴Belanna nakua tu kadanNa PUANG lako kaleku: La mari’piNa’, angKu ma’penunu lan mai inanKu, susi ke mapana’i sarrang allo, sia susi rambu roya ke mapana’i allo lan attu peparean.

⁵Belanna iake tae’pi anna pebuanna, ke rondon nasangmi tu ta’binna bua anggoro’ mamata, attu iato la Natarotoi piso Puang tu mintu’ tangke membuanna sia Nata’takki anNa tibei tu mintu’ ongi’na.

⁶Mintu’na tau iato mai dipatorroan manuk-manuk pa’duku’ dao lu buntu sia olo’-olo’ lan kuli’na padang, anna torro dao tu manuk-manuk pa’duku’, ke pealloanni sia mintu’ olo’-olo’ lan kuli’na padang torro dao, ke attu kamadinginan.

⁷Attu iato la umpennoloan ba’tu pira-pira pamengan lako PUANGna mintu’ ma’dandan maritik tu bangsa kalando sia pandillak, misa’ bangsa dikataku’ tiku lao, misa’ bangsa masarrang sia patengko lullu’ sia iatu padangna naruak tangnga salu-napennoloan lako to’ inan nanii sanganNa PUANGna ma’dandan maritik, iamotu buntu Sion.