Read Toraja-Sa'dan YESAYA 19 Bible Online

YESAYA 19 - Toraja-Sa'dan bible

YESAYA 19

¹Inde sia tu kada Napa’petanggungan Puang Matua diona Mesir. Inang la sae lako Mesir tu PUANG dao saliu’ mandirri’; anna mintu’ napa’deatainna to Mesir, la ma’parondo dio oloNa sia soyang lan tu sumanga’na mintu’ to Mesir.

²Belanna la Kupasisaung tu pada to Mesir, naurunganni sirari siulu’na, sia unnea solana sia kota sirari bali kotana anna lembang sirari bali lembangna.

³Attu iato iatu tangnga’na to Mesir la putta, sia la Kudampa tu tanan penaanna; anna male mekutana lako dipa’deatainna sia mintu’ to ma’basa-basa sia bombo to mate sia to sola deata.

⁴AngKu sorongi tama lisu pala’na puang masago-sago tu to Mesir sia lako datu masa’ga’ anna parentai, kadanNa Puang, PUANGna mintu’ ma’dandan maritik.

⁵Iatu uai tasik la lamma’, sia iatu salu la mere sia marangke.

⁶Iatu mintu’ salu bubosi sia iatu messarakna salu Nil dio Mesir mere sia marangke, sia iatu tille sia ria silayuan.

⁷Iatu mintu’ kapadanganna siupu’ randanan Nil sia mintu’ to tiambo’na dio lu randan salu Nil malayu nasang, anna sisarombonan male, tae’mo dikita lako.

⁸Mintu’ to mebale la sumarro sia ma’dosso-dosso, iamotu mintu’ to mamekan diong salu Nil, sia mintu’ to ma’dalla’ la sidongkongan.

⁹Mintu’ to manarang ungkallu’ kame nagaraga sampin lenang sia to untannun kapa’ la kasirisan.

¹⁰Mintu’ tulak sombana tondok la ka’tu rannu; mintu’ to sumaro kande tu’pe inaa.

¹¹Manassa tongan, kumua iatu mai arungna Zoan baga liu, iatu mai pa’bisara manakkana Firaun pa’timbangan baga. Umba la mikua ma’kada lako Firaun kumua: Akumo tu bati’ to paissan, akumo tu bati’ datu dolo?

¹²Umbamira totemo tu mai to paissanmi? Melo ke napa’peissananni mati’ kalemi tu apa Nalampak PUANGna mintu’ ma’dandan maritik lako Mesir, anna issanni tau.

¹³Dipabagamo tu mai arungna Zoan, salingmo tu mai arungna Nof; mintu’ tu mai tedong pariu’na lembangna umpapusamo to Mesir.

¹⁴Natua’mo PUANG tama ba’tengna tau iato mai tu misa’ inaa ma’pasaling, naurunganni umpapusai tu to Mesir lan mintu’ penggauranna, sangtinti to malango umpentombang luana.

¹⁵Tae’mo apa la nakarang to Mesir, tu ma’din la nakarang la ulu, la ikko’, la tangke koroma, la tille.

¹⁶Allo iato iatu to Mesir la sangtinti baine; la ma’parondo sia ungkataku’ lima tie’te’Na PUANGna mintu’ ma’dandan maritik, tu Nae’teran tau iato mai.

¹⁷Anna iatu tana Yehuda napotiramban to Mesir, ke denni tau ussa’bu’i tu sanganna, la tiramban tu to Mesir diona panglampakNa PUANGna mintu’ ma’dandan maritik lako tau iato mai.

¹⁸Attu iato la den lima kota dio Mesir tu la umpobasa basa Kanaan sia umpalao sumpa la mengkaola lako PUANGna mintu’ ma’dandan maritik, misa’i la disanga kota kasanggangan.

¹⁹Attu iato la den lan Mesir tu misa’ inan pemalaran lako PUANG sia dio passaparanna la diosok tu batu dipobatu silambi’ diona PUANG.

²⁰Iamote, tu misa’ tanda sia misa’ batu silambi’ lako PUANGna mintu’ ma’dandan maritik diosok lan tana Mesir. Iake meongli’i lako PUANG napobua’ to ma’pakario-rio, la Nasua Puang tu misa’ to patunduan sia to umpangeai tu la urrampananni.

²¹Anna umpa’petandan Kalena tu PUANG lako to Mesir, anna allo iato la natandai to Mesir tu PUANG; anna pennoloanni tau iato mai tu pemala’ pangrere’ sia kande dipemalaran sia la mangallonan lako PUANG, sia la napalesso’ tu pangallonanna.

²²Iatu to Mesir la Napa’dikki liu PUANG anNa pamondoi sule, anna mengkatoba’ lako PUANG sia la Natarima PUANG tu passambayangna sia la Napamondo sule.

²³Attu iato la den tu batatta lompo dio mai Mesir lako Asyur, anna olai tau dio mai Asyur, sae lako Mesir sia naolai to Mesir sae lako Asyur, anna pada-pada menomba tu to Mesir sola to Asyur (langngan PUANG).

²⁴Attu iato to Israel la ganna’ sipotallunna sola to Mesir sia to Asyur, la tulangdan dadi karongkosan lan kuli’na padang.

²⁵Belanna Napassakke PUANGna mintu’ ma’dandan maritik Nakua: Nasundun rongko’mora tu to Mesir orangKu, sia Asyur panggaraga limangKu, sia Israel mana’Ku.