Read Toraja-Sa'dan YESAYA 2 Bible Online

YESAYA 2 - Toraja-Sa'dan bible

YESAYA 2

¹Inde sia tu kada, tu ombo’ lako Yesaya, anakna Amos, tu diona Yehuda sola Yerusalem.

²La dadi undinna, kumua iatu buntu nanii banuanNa PUANG, la bantang ten to buntu malangka’ untongloi mintu’ buntu, anna mintu’ bangsa lolong lako.

³Buda bangsa la ke’de’ male anna ma’kada nakua: Maikomi, anta male langngan buntunNa PUANG, langngan banuanNa Kapenombanna Yakub, anNa ada’iki’ tu diona mintu’ lalanNa, sia anta olai tu mai lalanNa, belanna lan mai Sion la nanii bu’tu sukaran aluk sia kadanna PUANG lan mai Yerusalem.

⁴Sia Ia la umpaolai salunna tu mai mintu’ bangsa sia urra’ta’ kara-karana mintu’ bangsa kapua; tau iato mai la’bo’na nagaraga tengko bassi, sia iatu dokena nagaraga sae’; iatu mai bangsa tang la umbua’mo la’bo’na la unnea bangsa senga’ sia tae’mo anna la melada’ tu tau parari.

⁵Maikomi, e bati’na Yakub, la lolang lanki’ arrangNa PUANG.

⁶Apa Mitampemo tu taumMi, tu bati’na Yakub, belanna ponnomo aluk to rampe matallo sia umpogau’ balik mata susito Filistin sia sikadamak to salian lembang.

⁷Ponno salaka sia bulaan tu tondokna sia tang dipura tu mai iananna, sia ponno darang tu tondokna sia tang dikemba’ tu mai karetana.

⁸Sia ponno rapang-rapang dipodeata tu tondokna. Tau iato mai umpenombai panggaraga limanna sia panampa rangka’na.

⁹Susimoto nanii tu tau umpamatuna kalena sia iato mai muane umpamadiongan kalena, iamoto da Mipa’dei tu kasalanna tau iato mai.

¹⁰Mallaiko tama sapak batu, sia mallaiko rokko garuang umpembunian kametakuranNa PUANG sia kamala’biran kapayunganNa.

¹¹Mintu’ patiro solo’na tau la dipamadiongan, sia kamatampoanna to mala’bi’ la dipampa lu rokko, anna allo iato PUANG manna tu la layuk misa.

¹²Belanna mangkamo Napamanassa PUANGna mintu’ ma’dandan maritik tu allo la urrampoi mintu’ to umpamadao penaanna sia to matampo sia mintu’ to ussattuan kalena, kumua anna dipampa lu rokko.

¹³Sia urrampoi mintu’ kayu arasi’ dio Libanon tu layuk sia malangka’, sia sininna kayu jati dio Basan.

¹⁴Sia urrampoi mintu’ malangka’na buntu sia layukna tanete.

¹⁵Sia urrampoi mintu’ menara malangka’ sia benteng tang dilambi’.

¹⁶Sia urrampoi mintu’ kappala’ Tarsis sia mintu’ ianan ballo.

¹⁷Allo iato la dipatunduk tu mintu’ kamasuangganna tolino sia la dipampa lu rokko tu mintu’ kamatampoanna pia muane, PUANG manna tu layuk misa.

¹⁸Mintu’ dipa’deatainna la pa’de nasang.

¹⁹Allo iato iatu mai tau la mallai tama lo’ko’ batu sia rokko garuang tu belanna kametakuranna kamala’biranna kapaanNa, ke ke’de’I umpatiramban mintu’ issinna lino.

²⁰Allo ia dukato iatu mai tau la untibe mintu’ rapang-rapang dipodeata salaka sia bulaan tu nagaraga la napenombai, nabuangan balao sola ledo.

²¹Anna mallai tama lo’ko’ buntu batu sia sapak batu, tu belanna metakuranNa PUANG sia belanna kamala’biran kapayunganNa, ke ke’de’I umpatiramban mintu’ issinna lino.

²²Dadi da’mo ammi sande’ lako tolino, tu den penaa lan illongna, belanna apara la dinii unnangga’i?