Read Toraja-Sa'dan YESAYA 21 Bible Online

YESAYA 21 - Toraja-Sa'dan bible

YESAYA 21

¹Inde sia tu kada Napa’petanggungan Puang Matua diona padang aak dio randan tasik. Susito talimpuru’ ma’pamumbuk Lo’ mai pollo’na uai, lu dio mai padang aak, dio mai padang mekarrangan bulu.

²Misa’ patiro mendeata metakuran dipaomboranna’: To ungkalo’tokan tondok tonang ungkalo’tokan tondok, to pasanggang tonang pasanggangan. Ke’de’ko male, e Elam! Tiangka’ko manglio, e Madai! Mintu’ sarro Aku umparadanni.

³Iamoto anna ma’parondo nasang tu aakku, naruana’ pa’di’ maparri’, susi pa’di’na baine mangurria’; ma’pakukku’na’, belanna urrangii, sia tiramban tonganna’, belanna untiroi tu iannato.

⁴Ma’bara-bara tongan tu penaangku sia narampoina’ taku’; napopembalianna’ kamatakuran tu ulu karoen kukamali’.

⁵La dipasakka’raka tu meda, diballa’raka tu ampa’ la kumanderaka sia mangiru’ tu mai tau? — Ke’de’komi e arung, ammi boka’i tu mai balulang!

⁶Belanna nakua kadanNa Puang lako kaleku: Maleko patontongi tu to ma’peniro; la napa’peissanan tu mai apa natiro.

⁷Ianna tiroi tu pakkanarang ma’baanan sida’dua, sia to ussakei keledai, sia to ussakei onta, la napemaranga namanta-manta tongan.

⁸Anna metamba nakua: Tiromi, PUANG, tontong bangna’ bendan kiallo dao menara pa’kampan, sia mareana’ dio to’ pa’peniroangku kebongi.

⁹Tiromi, anna saemo sangtuntunan muane, iamotu sangtuntunan pakkanarang, sibaa sida’dua-dua. Ta’kala nama’kada pole nakua: Ro’pokmo, ro’pokmo tu Babel, sia mintu’ rapang-rapang dipodeata dipa’na Napemparrakammo Puang rokko padang.

¹⁰E to dilullu’ku sia to dipandasaku, iatu apa kurangi dio mai PUANGna mintu’ ma’dandan maritik, Kapenombanna to Israel, ia dukamo kupokadangkomi.

¹¹Inde sia tu kada Napa’petanggungan Puang Matua tu diona Duma. Metambami tu tau dio mai Seir lako kaleku, nakua: E, pa’kampa, sangapapi tu bongi? E, pa’kampa, sangapapi tu bongi?

¹²Mebalimi tu pa’kampa nakua: Tilalekmo masiang, apa malillinpa. Iake la mipekutananni, ma’din mekutana, apa misae polemora.

¹³Inde sia tu kada Napa’petanggungan Puang Matua diona kasangganganna Arabia. Lan pangala’ tammanna Arabia la minii ma’bongi, e mintu’ to Dedan ma’lio’.

¹⁴Tammui tu to ma’rang, mibaanni uai, e pa’tondokan tana Tema; tadoanni roti tu to mallai.

¹⁵Belanna diona bassi mataran sia la’bo’ tibua’ anna mallai, sia tinaran digattang sia diona kamaparranganna lempo kasirarian.

¹⁶Belanna nakua tu kadanNa PUANG lako kaleku: Sangtaunpi, susi taun to sumaro, anna pa’de nasang tu kamala’biranna Kedar.

¹⁷Sidi’mora tinampe tu bilanganna tu mai pa’tinaran lalongna to Kedar, belanna mangkamo Napokada PUANG, Kapenombanna to Israel.