Read Toraja-Sa'dan YESAYA 22 Bible Online

YESAYA 22 - Toraja-Sa'dan bible

YESAYA 22

¹Inde sia tu kada Napa’petanggungan Puang Matua diona lombok ditiro mendeata. Ma’apakomi ammi kendekra sola nasang langngan bubungan?

²E kota ponno arrak sia angnga’, e tambakuku ponno kasolleran! Iatu mintu’ taummu mate, tang mate nakande bassi sia tang songka lan tananan ra’.

³Mintu’ pa’baranimmu pada mallaimo; tau iato mai dirampa tang umpalao tinaranna; mintu’ko tu to dilambiran dipasirampa nasang, moi anna mambelamo naolai.

⁴Iamoto angku ma’kada kukua: Da mitirona’, da’ito angku unnade-ade tumangi’; da miparukuna’ mipakatana diona tu kasangganganna anak dara bangsaku.

⁵Belanna iamoto tu allo kamarukkan sia kasanggangan sia sumpu sumandak, illan lombok ditiro mendeata, tu napabu’tu Puang, PUANGna mintu’ ma’dandan maritik: dikakei tu benteng, sia lallakna tau dirangi langan padang ma’buntunna.

⁶Belanna naangkarammo Elam tu tambila, sia sakka’mo Aram tu kareta sia tau sia pakkanarang, sia napatassu’ Kir tu mai balulang.

⁷Na iatu lombok ballomu la naponnoi kareta, sia iatu pakkanarang mangatta tingo lako babangan,

⁸sia Naalai Puang tu pererungna Yehuda — anna attu iato marannu lakoko pa’buno dianna lan banua pangala’.

⁹Mitiromo tu kotana Daud silo’po’-lo’po’ tu bentengna, sia mipopa’misa tu uai diong mai limbong madiongna lu.

¹⁰Sia miia’ tu mai banua lan Yerusalem, ammi rondonni tu pira la mipamalangkaranni tu mai benteng sanggang.

¹¹Migaragan limbongan naparitangnga benteng tembo’, mipaolanni tu uai dio mai limbong dolo; apa tae’ ammi mentingara langngan To mangka umpadenni, sia tae’ ammi mentiro lako To mangka ullampakki tempon dio mai.

¹²Manassa allo iato Natambaimokomi Puang, PUANGna mintu’ ma’dandan maritik, la tumangi’ sia la umbating, sia la ma’galettung sia la ma’pote dibolong.

¹³Apa tiromi, tontong bang tu kasende-sendean sia kamaruasan, untunu sapi sia urrere’ domba, ammi ungkande duku’ sia unniru’ anggoro’, mikua: Maikomi anta kumande sia mangiru’, belanna masiang matemiki’.

¹⁴Apa Napasombomo PUANGna mintu’ ma’dandan maritik kurangi tu kadanNa, Nakua: Inang manassa kumua iate kasalan iate tae’ anna la diseroi dio kalemi, sae lako matemi, kadanNa Puang, PUANGna mintu’ ma’dandan maritik.

¹⁵Nakua kadanNa Puang, PUANGna mintu’ ma’dandan maritik: Maleko umpellambi’i pangulu sandan uai, iamotu Sebna, tu umpoissan tongkonan layuk, ammu pokadanni kumua:

¹⁶Ma’aparoko inde te, ba’tu mindara mupotete inde te, ammu garaganra liang kalemu inde te? Umpa’moko liang dao inan madao sia unggaragamoko tang merambu lan buntu batu!

¹⁷Tiromi, la Napengkolakangko PUANG susito pa’kolakna muane, sia la Nalemun-lemunko Napemaporii.

¹⁸Manda’ko nalemun susi panglemun, (Napembuangangko) susi raga lako padang tang dikita randanna; inde to la munii mate, anna la matumbami tu mai kareta ballomu, e! iko tu untumang banuanna puangmu!

¹⁹Sia la Kutassu’iko lan mai toemu, sia la Napasisayurangko pangka’mu.

²⁰Attu iato, la Kutambai tu Elyakim, anakna Hilkia, taungKu.

²¹AngKu pabayui bayummu, sia la Kupasalempangi salempangmu, sia mintu’ poissanmu la Kusorong tama lisu pala’na; iamo la naposulle ambe’ mintu’ to Yerusalem sia mintu’ to Yehuda.

²²Sia iatu gonting ba’ba tongkonan layukna Daud, la Kupalangngan palempengna, anna bungka’i, natae’ misa’ tau la untutu’i sule, anna tutu’i, natae’ misa’ tau la umbungka’i.

²³Sia la Kupentanaran susi paku dio to’ inan makarra’, anna tulangdan dadi isungan kamala’biran lako rapunna.

²⁴Dio nasang kalena dinii ussedanni tu kamala’biranna rapunna, tarukna sia mimi’na, mintu’ pareanan dikandeinna, randuk dio mai dulang sae lako diiru’ina.

²⁵Attu iato, kadanNa PUANGna mintu’ ma’dandan maritik, kumua iatu paku dio to’ inan makarra’ la lento, anna le’to sia ronno’, na iatu mai apa tisedan dio la sanggang, belanna mangka Napokada PUANG.