Read Toraja-Sa'dan YESAYA 23 Bible Online

YESAYA 23 - Toraja-Sa'dan bible

YESAYA 23

¹Inde sia tu kada Napa’petanggungan Puang Matua diona Tirus. Siurrukangkomi e kamu kappala’ Tarsis, belanna sanggangmo tu tondokna, naurunganni tae’ bangmo banua te’dek; iate kareba narangi tonna sule dio mai tondok to Kitim.

²Rapa’komi, e to ma’biring tasik, tu napasugi’ to ma’balilinna to Sidon, tu biasa massombaran lan tu tasik;

³iatu tasik iamo dinii umpalamban bannena Sihor sae, iatu burana Nil iamo poleanna, iamo naalli mintu’ bangsa to.

⁴Sipatuko masiri’, e Sidon, belanna nakua tu tasik, tu tondok tasik kumua: Tae’ bangpa angku mangurria’, tae’ bangpa angku kianak, tae’ bangpa angku pelobo’i pia muane, tae’ bangpa angku daranai pia baine.

⁵Iake rampoi lako Mesir te kareba, la ma’parondo tu tau urrangii tu kareba diona Tirus.

⁶Lambankomi lian Tarsis, siurrukangkomi, e to ma’biring tasik!

⁷Iamoraka tondok rua’mi te, tu tempon dio mai, tu nabaa lentekna male mambela, la torro dio lu butung to mempue?

⁸Mindara ullampakki lako Tirus te dalle’ iate, tu malutemo ma’papantanni makota, sia iatu mai to ma’balilinna butungi to mai arung, sia iatu to ma’baluk-balukna sangtinti to la’bi’ lan lino?

⁹Iatu ullampakki, iamo PUANGna mintu’ ma’dandan maritik, la umpa’dei tu kamala’biranna nasattuan, sia umpamatuna mintu’ to la’bi’ lan te lino.

¹⁰Samboi tu padangmu susi salu Nil, e anak dara Tarsis, tae’mo panampo.

¹¹Napopengkorongmo Puang tu limanNa tama tasik. Napasipa’parondoammo tu mintu’ parenta; mesuamo Puang tu diona Kanaan la ussanggangi tu mai bentengna.

¹²Sia ma’kadamo Nakua: Tae’mo ammu la mela’tek, e anak dara Sidon, anak dara matuna. Ke’de’ko ammu lamban lian Kitim; moi sambalin, tae’ duka ammu torro manaman.

¹³Palan ara’i tu tondok to Kasdim, tae’mo te bangsa iate tulangdan; napopempadang pendurukan olo’-olo’mo to Asyur; tau iato mai umpabendan lempona, nasanggang tu mai tambakukunna — , napopendadi susi batu disaeran.

¹⁴Sipatukomi siurrukan, e mintu’ kappala’ Tarsis, belanna iatu tambakukummi sang- gangmo.

¹⁵Attu iato, iatu Tirus la dikalupai pitungpulo taunna, susito kama’parentanna misa’ datu; iake upu’mi pitungpulo taunna, lalomi lako Tirus susito sengo lako baine bualang, nakua:

¹⁶Angkaranni tu katapi, lumilingko lan lu kota, e baine bualang tang dipa’apaimo! Pemeloi tu paningoammu, popa’rupa-rupai tu mai sengo, anna kilalaiko tau sule.

¹⁷Ke upu’mi pitungpulo taunna, la rampo PUANG unnukung to Tirus, naurunganni tibalik sule lako pandakaran passulo bonginna, anna sigau’ sala pole mintu’ parenta lan lino dao kuli’na padang.

¹⁸Na attu iato, iatu pandakaranna sia saro passulo bonginna la dipamarimbanganan PUANG, tae’ anna patorroi ba’tu naanna, sangadinna iatu saro pa’pabu’tunna la dipalulako to tongkon dio oloNa PUANG, anna kandei sadia’na sia napetamangkale balloi.