Read Toraja-Sa'dan YESAYA 26 Bible Online

YESAYA 26 - Toraja-Sa'dan bible

YESAYA 26

¹Allo iato iatu nanian iate la napopenani tau lan tana Yehuda nakua: Den kami tu kota matoto’ki; kamakarimmanan Nabentenganni sia Natambakukuanni Puang.

²Bungka’i tu ba’ba babangan, anna tama tu bangsa masallo’, tu untoe manda’ kamarurusan.

³Iatu to matu’tun penaanna Mikaduttu’ kamarampasan sundun, belanna sande’ mati’ Kalemi.

⁴Tontongkomi sande’ lako PUANG belanna Puangta PUANG iamo misa’ buntu batu sipuli padang.

⁵Belanna Napembuangan tu to unnisung dao madaona, iamotu to toppo’ dao benteng malangka’. Napopengkadiongan, Napopengkadiongan sae rokko padang, Napasirante padang.

⁶Naurunganni nalese-lese lentek, iamotu lentekna to mase-mase sia nasalembe’ len to bitti’.

⁷Iatu lalanna to malambu’ lappa’ bang; Kamumo tu umpamalappa’i tu lalanna to malambu’.

⁸Susi dukato dio lalan ukungamMi kipeagi bangkomi, o PUANG; mamali’ bang tu penaangki lako sangamMi sia lako kadikilalaiamMi.

⁹Kalebu tallang tu penaangku lan ungkamali’Komi ke bongi, ondongpi iatu ba’tengku lan undaka’ bangKomi; belanna iake rampomi tama lino tu mai ukungamMi, attu iato mintu’ issinna lino umpelada’i kamaloloan.

¹⁰Moi anna dikatirinnai tu to tang mekaaluk, inang tae’ anna pelada’i tu kamaloloan, sangadinna umpogau’ kakelokan illan tondok nanii kamalamburan sia tae’ duka anna tiroi tu kamala’biranNa PUANG.

¹¹O PUANG, tie’te’ tu limamMi, apa tae’ anna mengkilala; apa la mengkilala sia masiri’ diona kamakaritutuamMi lako bangsa iato. Ondongpi iatu api ungkande to umbaliKomi, la ungkande duka tau iato mai.

¹²O PUANG, Kamumo la umpabu’tuangkan kamarampasan belanna iatu mintu’ penggaurangki Kamu umpogaurangkan.

¹³O PUANG, Kapenombangki, naparentamokan tu mai puang senga’; apa sangamMi manna tu la kipangke’.

¹⁴Iatu to mate tae’mo anna tuo sule, iatu bombo to mate tae’mo anna malimbangun, iamoto Miukung, Misanggangi sia iatu mintu’ tanda kadikilalaianna tu tau iato mai Mipa’dei.

¹⁵Mipopemba’ka’mo, o PUANG, tu bangsa iate, Mipopemba’ka’mo, sia Mipamala’bi’mo tu Kalemi, mintu’ lili’ padangna Mipakalua’mo.

¹⁶O PUANG, iatonna mandasa tu tau iato mai, nadaka’moKomi, iatomMi ada’i, umpakendek kamama’mi passambayangna.

¹⁷Ten to baine ma’tambuk, iake nalambi’mi attunna, mangumbero sia sumarro mangurria’, ten dukamokan to, o PUANG, dio oloMi.

¹⁸Ma’tambuk dukakan, mangumbero dukakan, apa sangtintikan to ungkianakan angin; tae’ angki umpabu’tuan katilendokanna tana sia tae’ angki padadian la napoissinna lino.

¹⁹Mintu’ taumMi tu matenamo la tuo sule, sia batang rabukku duka; mintu’i la pada malimbangun. Millikkomi sia kumalasi-lasikomi, e kamu sola nasang, tu to diong litak! belanna iatu damo’Mi iamo damo’ paarrang; sia iatu litak la ullua mintu’ to mangka mate.

²⁰Maikomi, e taungku, tamakomi sumbung iringmi, ammi salli’i tu ba’bami: membunikomi sattu’, sae lako merena tu kasengkean.

²¹Belanna la sun tu PUANG lan mai inanNa la umpapakkanni kakadakeanna mintu’ issinna lino lako tau iato mai; la napasombo lino tu rara tibollona tau iato mai sia nokamo ussamboi tu mai batang rabukna tu mai to mate dipongko.