Read Toraja-Sa'dan YESAYA 28 Bible Online

YESAYA 28 - Toraja-Sa'dan bible

YESAYA 28

¹Upu’ allona tu makota matampona to malangona Efraim sia bunga-bunga malayu, napobelo maramba’ dao ulunna lombok malompo masapi, tu natongkonni to natumang uai anggoro’.

²La bu’tu dio mai Puang tu misa’ to matoto’ sia lalong, susito uran batu ma’kalle’dang-le’dang sia bara’ mesanggangi, susi uai saba’ mariak anna kabu’i tu mintu’na sia napemparrakan rokko padang.

³Na iato makota matampona to malangona Efraim la dilullu’-lullu’.

⁴Na iatu bunga-bunga malayu, napobelo maramba’ dao ulunna lombok malompo masapi, la susi bua ara matasak dolo, ke tae’pi anna attu pebua-kayuan; natirona sia tau, ta’pa naala anna sussu’i.

⁵Allo iato iatu PUANGna mintu’ ma’dandan maritik la napomakota sia la napobunga-bunga maramba’ mintu’ taunNa, tu tinampenapa.

⁶Sia la napopenaa ma’paolai salu mintu’ to unnisungi isungan pa’paolaian salu, sia la napomatoto’ to umpasoro’ kasirarian sae lako babangan.

⁷Ia duka te tau iate mai re’ba len napobua’ uai anggoro’ sia tumbang len naginta’ tuak palango; moi dukato minaa sia nabi re’ba len napobua’ tuak palango, pusa natumang uai anggoro’, tumbang len napobua’ tuak palango, tire’ba len lan patiro mendeata, titu’mu’ len untingayo pa’bisaran.

⁸Mintu’ meda nasitutu’i lua megi’giran, tae’mo inan tang natombang.

⁹Mindara la naada’i kapaissanan? sia mindara la nanii umbattuananni apa dipaombo’? Lakoraka pia sumarak susu? lakoraka pia mane disarak susu?

¹⁰Belanna iatu atoran sukaran aluk sanatompo-tompoinna sukaran aluk, atoran sukaran aluk natompoi atoran sukaran aluk, iatu parenta sanatompo-tompoinna parenta, parenta natompoi parenta; sidi’ inde te, sidi’ inde to.

¹¹Iamoto anna la ma’kada tu Puang lako bangsa iate unnoyong kada makalaen-laen sia basa to mambela.

¹²Tu Napokadamo lako tau iato mai kumua: Iamo kapelayoan te, benni kapelayoan tu to mata’ka’, iamote tu kamanamanan — apa tae’ anna perangii.

¹³Iamoto anna patui kadanNa PUANG tu tau iato mai, kumua: Iatu atoran sukaran aluk sanatompo-tompoinna sukaran aluk, atoran sukaran aluk natompoi atoran sukaran aluk, iatu parenta sanatompo-tompoinna parenta, parenta natompoi parenta; sidi’ inde te, sidi’ inde to, kumua anna bare boko’ tu tau iato mai, anna tisumbang sia tipessambak sia natekke poya anna ditingkan.

¹⁴Iamoto, e to mangelle’, perangimi tu kadanNa PUANG, e kamu pambaana bangsa iate, tu tonang lan Yerusalem.

¹⁵Belanna ma’kada nakua: Sibassemokan kamatean sia unnarra’ kada sola lino tomate, moi anna buda tongan tu peada’ masarrang urrampoi tu mai mintu’ tau, tae’ sia anna la ullambi’kanni, belanna iamotu kamorangan kipopentirerungan sia iamotu kakalando-pa’duan kipembunii.

¹⁶Iamoto anna ma’kada tu Puangta PUANG susite Nakua: Kutanan lan Sion tu batu parandangan, misa’ batu mangka disudi, misa’ batu petau keangga’, tu mangka dibantangi parandanganna; na minda-minda umpatonganni, tae’ anna tigiang len.

¹⁷Apa salunna la Kupadadi ulang pesuka’ sia kamaloloan la Kupadadi batu petimbang, anna attu iato iatu uran batu la ussoloi tu pentirerungan mo’rang sia la nakabu’ uai tu inan pembunian.

¹⁸Na iate bassemi sola kamatean la diputtai sia iatu lampa kadammi sola lino tomate tae’ anna la manda’; ia anna olaikomi peada’ masarrang, la nalullu’mokomi.

¹⁹Ke naolaiokomi, nala’ka’iokomi belanna melambi’oi la ma’kasea-seaoi sia kiallo sia kebongi; sia iatu to unnissanni tu kada ombo’, la ma’parondo.

²⁰Belanna iatu inan mamma’ la sumpu tau mamma’ dao, sia iatu parramba’ kaippa’ la nabungkuran kalena tau.

²¹Belanna la ke’de’ tu PUANG, susi tonna dao buntu Perasim sia kedo susi tonna dio lombok Gibeon, la ungkarang pengkaranganNa — iatu pengkaranganNa la memangngan; la umpogau’ penggauranNa — na iatu penggauranNa la makalaen-laen.

²²Kilalai, da mimangelle’, da ammi arra’i polei tu pungomi; belanna kurangimo dio mai Puang PUANGna mintu’ ma’dandan maritik, kumua den kasanggangan — sia tang podo’mo — la urrampoi mintu’ padang iate.

²³Tananni talinga sia perangii tu gamarangku; palan ara’i sia tanding talingai tu kadangku.

²⁴Denraka tu to la mangambo’ tontong bang ma’tengko, tontong bang ma’bungka’ sia massalaga?

²⁵Tang susiraka te kamu: iake mangkami narantei tu pa’lakna, naambo’imi salasi sia nabebo’i dintan sia natu’i gandung sia se’i sangsusuk sia natu’i dalle sisikan tu randanna male.

²⁶Sia Napatudu duka Kapenombanna tu lalan sipatunna sia Naada’i.

²⁷Belanna iatu salasi tae’ nadilullu’ pelullu’ sia iatu dintan tae’ nadipalentenni lentenan kareta, sangadinna iatu salasi dibamba kayu sia iatu dintan dibamba pepa’tong.

²⁸Iatu gandung dilullu’raka sae lako manisakna; tae’ sia natontong bang dilullu’. Moi anna palullu’i lentenan kareta sia darang, tae’ sia nadipemanissakki.

²⁹Susimoto tu apa bu’tu dio mai PUANGna mintu’ ma’dandan maritik; memangngan tu lalan penaanNa sia mandalan tongan tu lalan tangnga’Na.