Read Toraja-Sa'dan YESAYA 29 Bible Online

YESAYA 29 - Toraja-Sa'dan bible

YESAYA 29

¹Upu’ allona Pantunuan pemalaran, Pantunuan pemalaran, tu tondok nanii Daud ma’banua!; pasita’papi sangtaun tu sangtaun, da’ito anna runduananni tu gau’ allo kapuana.

²Apa la Kupakapu’duran tu Pantunuan pemalaran; attu iato iatu tau la sumarro sia unnurruk sia iatu Yerusalem la Kupopantunuan pemalaran.

³Sia la saeNa’ umpatama limbuiko sia la umpalilingiko to manglio’ sia la untananna’ tambakuku unneako.

⁴Attu iato la sumuko diong mai posi’ tana lambe’ sia tang masero tu kadammu dirangi diong mai litak; sia susi gamara bombo to mate ditambai, tu gamarammu diong mai padang sia iatu kadammu ma’kisi’-kisi’ diong mai litak.

⁵Apa attu iato iatu uali budammu la susi barra’-barra’ sia la susi ta’pian sisarombonan tu mintu’nato umpandasako, iatu iannate ta’pa la dadi lan sangkappidian mata.

⁶Iatu PUANGna mintu’ ma’dandan maritik la sae untunduiko guntu’ sia lino’ sia galugu kapua sia talimpuru’ sia bara’ na api ma’kande pu’pu’.

⁷Attu iato iatu mintu’ bangsa tu urrarii Pantunuan pemalaran la sangtinti to tindo sia patiro mamma’, iamo mintu’ to ullaoi sia ullaoi tambakukunna sia iatu mai to umpandasai.

⁸La susito topo ma’tindo kumande, apa iake pana’dingi tangdia’ bangsia ba’tu susito ma’rang ma’tindo mangiru’, apa iake pana’dingi inang longgo’ sia ma’rang bangsia; susi dukamoto tu mintu’ bangsa nasirarian Sion.

⁹Da’ito naalakomi pali sia simangnga, dai’to natitutu’ tu matammi sia maraun, iatu tau iato mai malango, apa tangia anggoro’ nairu’; re’ba len, apa tangia tuak palango nairu’.

¹⁰Belanna Naparampoimokomi penaa mamma’ kalupi-lupian PUANG sia Naparappak tu matammi, — iamotu mai nabimmi — sia Nabungku’ tu ulummi, — iamotu mai to patanda-tandammi.

¹¹Iamoto anna mintu’ tu apa dipasombo, la sangtinti kada lan sura’ dica’ lako kalemi, tu diben to manarang ma’basa nakua: Basaika ade’ te, apa mebali nakua: Tang kubela, belanna iate sura’ manda’ tica’.

¹²Ba’tu iatu sura’ iato diben to tang naissan ma’basa nakua: Basaika ade’ te, apa mebali nakua: Tang kuissan aku ma’basa.

¹³Sia susipate tu kadanNa Puang, nakua: Iate bangsa iate dio bangri pudukna umpengkareke’iNa’ sia dio bangri lilana umpakala’bi’Na’, apa iatu penaanna mambela dio mai Kaleku; iatu a’ganna ungkasiri’Na’, pepasan tolino bangri.

¹⁴Iamoto angKu la umpalanda’i lako bangsa iate mai tu apa kalle-kallean, apa memangngan sia makalaen-laen, belanna iatu kakinaanna tu mai to kinaanna la pa’de, sia iatu tangnga’ kinaanna tu mai to unnampui tangnga’ kinaa la merrabunan.

¹⁵Upu’ allona tu to ullammakanni PUANG tu lalan tangnga’na sia iatu mai to naluang kamalillinan tu gau’na sia iatu to ma’kada kumua: Mindara la untiroki’ sia mindara la unnissanki’?

¹⁶E kamu to leko’ penaammu! la dipapadaraka to ma’tampa kurin tu pitti’, naurunganni iatu panggaraga la umpokadai tu diona to unggaragai, kumua: Tae’ na ia unggaragana’? sia iatu apa dikombong la umpokadai tu diona to ungkombongi kumua: Tae’ namanarang?

¹⁷Tang sangattu’moraka anna dipopembali pa’lak ballo tu Libanon sia iatu pa’lak ballo totemo la dibilang pangala’ tamman attu iato?

¹⁸Attu iato iatu to taru la urrangi kadanna Sura’, sia mata to buta tang malillin sia tang pittukmo, la patiro.

¹⁹Attu iato to umpamadiong penaanna la saumpoparannu-rannunna PUANG sia iatu to tarru’ bongko la kumalassi-lasi tu diona To maserona to Israel.

²⁰Belanna attu iato iatu to kelok la pa’demo sia iatu to pabe’se la roto’mo sia mintu’ to untannun bang kakadakean la disabu’imo.

²¹Iamotu to umpasala tau diona sangbuku kada, sia iatu to untananni poya to untuntun salunna dio to’ babangan sia to lando pa’du untampun pusa’ kadanna to malambu’.

²²Iamoto iatu PUANG tu mangka urrampanan Abraham ma’kada lako bati’na Yakub kumua: Iatu Yakub tae’mo nala kasirisan sia pa’de deata.

²³Belanna ianna tiromi sia bati’na tu penggaurangKu dio lu tau iato mai, manassa la napamadatu tu sangangKu sia napamadatu tu To maserona Yakub sia napangke’ tu Kapenombanna to Israel.

²⁴Attu iato iatu to pusa penaanna la paissan sia mintu’ to ma’paropo’ la untarima pangadaran.