Read Toraja-Sa'dan YESAYA 31 Bible Online

YESAYA 31 - Toraja-Sa'dan bible

YESAYA 31

¹Upu’ allona tu mintu’ to male rokko Mesir la umpalaku pa’tunduan, tu umposande’ darang sia urrannuan kareta, belanna buda, sia pakkanarang, belanna seba’ bilanganna, apa tae’ namengkamoya lako To maserona to Israel sia tae’ namekutana lako PUANG.

²Apa Ia duka tu Puang sundun kinaa, Iamo la umpasaei tu kasanggangan undinna sia tae’ Napere len; sangadinna la bendan unnea mintu’ to lan banuanna to umpogau’ kakadakean, sia unnea pa’tunduanna to umpogau’ kakelokan.

³Apa iatu to Mesir tolino duka, tangia Puang Matua, sia mintu’ darangna ma’a’gan duku’, tangia penaa; iake unnangka’i limanNa tu PUANG, titongko’ tu to patunduan anna songka tu to ditundui, anna sanggang sola nasangi.

⁴Inde sia tu kadanNa PUANG lako kaleku, nakua: Susito misa’ singa ba’tu anak singa umburrungi pealanna, moi anna pomarambai sangtuntunan pangkambi’, tae’ duka natiramban sia tae’ napomataku’i tu kamarambanna tau iato mai — , susi dukamoto tu PUANGna mintu’ ma’dandan maritik la mengkalao rokko buntu Sion sia tanetena la parari.

⁵Susi manuk-manuk mettia’, susi dukamoto tu PUANGna mintu’ ma’dandan maritik la umpetayanni Yerusalem, Narampanan sia Nakarimmanni, Nalendokan sia Nakaritutui.

⁶Mengkatoba’komi lako Kalena, tu mambela lalanmo nanii to Israel sorong boko’.

⁷Manassa allo iato pada la miboko’i tu rapang-rapang salaka dipodeata sia bulaan, tu migaragai la umpogau’ kasalan.

⁸Iatu Asyur la tibambang nakande pa’dang, tangia penai muane, sia la nakande tangia penai tolino, sia la mallai duka lussu’ dio mai penai iato sia mintu’ to manguranna la mengkanorong dipokaunan.

⁹Sia diona kamatakuran narondon tu buntu batunna sia mintu’ arung untampe bate-batena situang katirambanan; kadanNa PUANG, tu ma’api dio Sion sia ma’dapo’ dio Yerusalem.