Read Toraja-Sa'dan YESAYA 32 Bible Online

YESAYA 32 - Toraja-Sa'dan bible

YESAYA 32

¹Tonganna misa’ datu la ma’parenta unnallonni kamaloloan sia mintu’ arung la untoe parenta, tang pakayun bimbang.

²Tau iato la susi pentirerungan dio mai angin bara’ sia pentilindungan dio mai uai luang sia butung to salu’-salu’ dio padang ba’ta’ sia susi bayo-bayo buntu batu kapua dio padang karangkean.

³Attu iato iatu matanna to pakita tae’mo apa ussiloi, sia iatu talinganna to parangi la ma’perangi;

⁴sia penaa to tang mengkilala la untandai kapaissanan sia lila tang ra’pa’ ma’kada la matira’ ma’kada sia maleso.

⁵Iatu to baga tae’mo nala disanga to la’bi’ sia to lando pa’du tae’mo nala disanga to kapua.

⁶Belanna iatu to baga ma’kada baga sia iatu penaanna umpabu’tu kakelokan: la umpogau’ katangmekaalukan sia umpatale’ kasorong-bokosan dio mai PUANG sia tang ussaile to tangdia’ sia tae’ napairu’i tu to ma’rang.

⁷Iatu to pa’pakenan, kadake tu mintu’ tangnga’na: kabulitukan manna natangnga’, ma’kada tang tongan la ussanggangi to bongko, moi anna tuntun salunna tu to bongko.

⁸Apa iatu to la’bi’ untangnga’ penggauran mala’bi’ sia bantang umpangeai tu apa mala’bi’.

⁹Millikmokomi, e mintu’ baine tang magiang: perangiimi tu gamarangku, e mintu’ anak dara mangin-mangin; tananni talinga tu kadangku.

¹⁰Sangtaunpi sia ba’tu pirang-pirang allopi ammi ma’paganggang, e kamu to mangin-mangin, belanna puramo tu peanggorosan sia tae’mo nala den tu kama’pupuan kapua.

¹¹Ma’rundedekomi, e baine tang magiang, ma’paganggangkomi, e kamu to mangin-mangin! Lendokanni tu pakeammi, sia ma’kale-kalekomi, ammi ma’dodo karoro’.

¹²La ussa’pa-sa’pakomi ara’mi, belan- na mintu’ pa’lak malunak sia belanna mintu’ garonto’ anggoro’ tarri’ bu- anna;

¹³sia belanna pa’lakna taungKu tu natuoi duri sia a’da’ sia belanna mintu’ banua nanii pa’maruasan lan tondok sode-sodena.

¹⁴Belanna iatu tambakuku mendadimo kota talo ditampe, iatu kamaruasanna kota membalimo biung-biungan. Sia iatu Ofel sia Menara pa’kampan mendadi lo’ko’mo tontong sae lakona, napoparannu keledai lampung sia nanii baanan sapi sola domba siga’luan undaka’ kande.

¹⁵Sae lako attu ditua’na lako kaleta tu Penaa dao mai inan madaona. Attu iato padang rangke la membali pa’lak lunak sia iatu pa’lak lunak la susi pangala’.

¹⁶Attu iato la unnisung tu katonganan lan padang pangallaran sia la tongkon tu kamaloloan lan pa’lak ballo.

¹⁷Iatu buanna kamaloloan iamotu kasikaeloan sia iatu poleanna kamaloloan iamo kasode-sodean sia karapasan tontong sae lakona.

¹⁸Iatu taungKu la torro lan inan kamarampasan sia lan banua nanii kasode-sodean, lan inan karapasan tu tang narandan kamasussan.

¹⁹La sae tu uran batu naurungan songka tu kayu lan lu pangala’ sia la lamma’ tu kota rokko inan mandalan.

²⁰Maupa’komi tu to mangambo’ dio randanna mintu’ uai sia tu umpopassangka penaammi ullamba’ sapi sia keledaimmi lako mintu’ inan.