Read Toraja-Sa'dan YESAYA 34 Bible Online

YESAYA 34 - Toraja-Sa'dan bible

YESAYA 34

¹E mintu’ bangsa, mengkareke’mokomi ma’perangi, e mintu’ to sangpetayanan tanannimi talinga; melo ke ma’perangii tu lino sola mintu’ issinna sia kuli’na padang sola mintu’ tu tuona diong mai.

²Belanna sengke tu PUANG lako mintu’ bangsa sia magi’gi’ lako mintu’ tuntunanna; sia Napamanassamo la Nasabu’i sia Nasorongmo la direre’ tu tau iato mai.

³Iatu taunna tu mangka dipatei situlambenan sia bau batang rabukna mesongngon sia mintu’ tanete maso’mak napobua’ rarana.

⁴Attu iato mintu’ ma’dandan maritik la buruk sia mintu’ langi’ la tilulun susi misa’ sura’ sia mintu’ ma’dandan maritikna la rondon susi daun dio mai garonto’ anggoro’ sia susi daun dio mai garonto’ ara.

⁵Belanna malangomo tu la’bo’Ku lan suruga; tiromi la songlo’mo rokko Edom sia la unnukung misa’ bangsa tu Kupamanassamo la disabu’i butung pepayu.

⁶Naponnoi rara tu la’bo’Na PUANG, nalumu’i lompo sia rara anak domba sia bembe’ laki sia lompo bale’ke’ domba laki. Belanna dio Bozra Napogau’mo PUANG tu misa’ pemala’ sia misa’ pangreresan kapua dio Edom.

⁷Sia tibambangmo tu ba’tu pira-pira sapi lampung sola tu mai domba sia bembe’ sia ba’tu pira-pira sapi laki sia tedong, naurungan malango tu padangna napobua’ rarana sia naamma’ litak tu lompona.

⁸Belanna Naparampomo PUANG tu attu pa’pabala’ sia taun pa’pakkan la urra’ta’ kara-karana Sion.

⁹Attu iato mintu’ salu’-salu’na tondok iato membalimo gala-gala tu uainna, sia iatu litakna membalimo solo’, sia iatu padangna membalimo dama’ ma’lulu-lulu.

¹⁰Tu tang pa’de len, la allona la bonginna, sangadinna kendek tu rambunna tontong sae lakona; la tontong talo nasiosso’i tau, sia randuk tempon dio mai tontong sae lakona moi misa’ to lumio’ tae’ lendu’ inde to dio.

¹¹Sangadinna padang iato napoinan mundan sia kayo, na langau sia kadoya la torro lan, sia Nae’te’ Puang tu ulang pesuka’ kataloan daona lu sia batu petimbang kamakarorrongan.

¹²Iatu mai arungna tae’mo misa’ tu la untokko tau mendadi datu, sia tae’mo tu datunna, moi misa’.

¹³Lan mintu’ tongkonan layukna natuoi duri sia lan mintu’ tambakukunna den lelating sia a’da’; mintu’nato nanii torro serigala sia padang pa’porianna burung unta.

¹⁴Indemoto dio nanii siappa’ serigala buriko’ na asu lampung sia ampu padang sitammu-tammu; sia iamo nanii ta’pa po’pok sia unnappa’ inan katorroan.

¹⁵Inde dukato nanii tu ula’ rame messerang sia mentallo’ sia unnarranni tallo’na sia ungkaritutui dio to’ kaongananna; inde dukato nanii sirampun tu mintu’ manuk-manuk pa’duku’.

¹⁶Paressai tu sura’Na PUANG sia basai; moi misa’ tu mintu’nate tae’ pa’de, sia sikitanan nasang, belanna pudukNa kalena tu mangka ma’kada sia penaanNa tu urrampunni.

¹⁷Belanna Ia Kalenamo tu mangka untaa-taai lako olo’-olo’ iato mai sia limanNa Kalenamo tu mangka untintingi; olo’-olo’ iato mai la umpomana’i sae lakona sia la nasiosso’i torro lan.