Read Toraja-Sa'dan YESAYA 37 Bible Online

YESAYA 37 - Toraja-Sa'dan bible

YESAYA 37

¹Iatonna rangimi datu Hizkia tu iannato, naserek-serekmi tu tamangkalena anna ma’pakean karoro’, male tama banuanNa PUANG.

²Nasuami datu tu Elyakim, sandan uainna datu, sia Sebna pangulu to massura’, sia mintu’ to matua-tuanna to minaa ma’pote dibolong male umpellambi’i nabi Yesaya, anakna Amos.

³Ma’kadami tu tau iato mai lako, nakua: Susite tu kadanna datu Hizkia: Allo iate allo kapussakan, sia ukungan sia kadibelleran, belanna la sunmo tu pia, apa tang matoto’ tu indo’na la kianak.

⁴Naperangii sia manii PUANG, Kapenombangki tu mintu’ kadanna kolonel, tu nasua puangna, datu Asyur, uparampoangki’, kumua anna be’sei tu Puang Matua matontongan, anNa ukungi Puang tu belanna kada iato Narangimo PUANG, Kapenombammi; melo ke mipassambayanganni tu to torro siapa, tu denna siapa.

⁵Pakalan rampomi tu taunna datu Hizkia lako Yesaya.

⁶Ma’kadami Yesaya lako nakua: Inde sia tu kada la miparampoan puangmi, kumua: Iamote tu kadanNa PUANG Nakua: Da mukataku’i tu mintu’ kada, tu mangka murangi, tu napokada taunna datu Asyur umpa’kada solangiNa’.

⁷Akumo la umpaombo’i lan penaanna, naurunganni, ke urrangimi misa’ kareba, manassa la sule lako tondokna, anna lan tondokna Kunii umbambanganni nakande pa’dang.

⁸Iatonna sulemo tu kolonel narampoimi tu datu Asyur marassan sirari Libna, belanna denmo kareba narangi umpokadai, kumua ke’de’mo dio mai Lakhis.

⁹Narangimi tu kadanna tau diona Tirhaka, datu Etiopia, kumua: tassu’mo la sirari puangku. Iatonna rangimi tu kada iato, nasuami tu sumbungan puduk lako Hizkia, umpokadai nakua:

¹⁰Iate kada iate la miparampoan Hizkia, datu Yehuda, kumua: Da napakenakomi Kapenombammi, tu mirannuan, ammi kua: Iatu Yerusalem, tae’ nala disorongan datu Asyur.

¹¹Mirangi nasangmo tu mintu’ apa napogau’ datu Asyur lako mintu’ tondok, umba nakua ummangsanni; umbao nakua ammi la dilendokan?

¹²Nakulleraka tu deatanna mintu’ bangsa, tu nasabu’i nene’ to doloku, ullendokanni tu tau iato mai: iamotu Gozan sia Haran sia Rezef sia to umpa’tondokki Eden lan Telasar?

¹³Umbamira tu datu Hamat sia datu Arpad, sia datu kota Sefarwaim sia Hena sia Iwa?

¹⁴Natarimami Hizkia tu sura’ iato dio mai tu sumbungan puduk, na iatonna mangkamo umbasai, malemi langngan banuanNa PUANG, anna balla’i tu sura’ iato dio oloNa PUANG.

¹⁵Massambayangmi tu Hizkia dio oloNa PUANG, nakua:

¹⁶O PUANGna mintu’ ma’dandan maritik, o Kapenombanna to Israel, tu unnisung dao karubion! Kamu, Kamu mannari Puang Matua, pekapuanganna mintu’ kadatuan lan lino; Kamu duka tu mangka ungkombong langi’ sola lino.

¹⁷O PUANG, tananni talinga amMi ma’perangi, o PUANG pamillikki tu matamMi amMi tiroi sia perangii tu mintu’ kadanna Sanherib, tu mesua umparampoi, la umbe’se Puang Matua matontongan.

¹⁸O PUANG tonganna nasanggangimo ba’tu pira-pira datu Asyur tu mintu’ tondok sola mintu’ lili’na.

¹⁹Na iatu deatanna napembuangan tama api, belanna tangia deata, sangadinna panggaraga tolino bangsia, kayu sia batu nagaraga, iamoto anna sanggangi.

²⁰Iamoto, o PUANG, Kapenombangki, lendokangkan dio mai limanna, anna issanni mintu’ kadatuan lan te lino, kumua Kamu mannari, o PUANG, misa-misa tu Puang Matua.

²¹Attu iato mesuami Yesaya, anakna Amos, umpokadanni Hizkia kumua: Nakua kadanNa PUANG, Kapenombanna to Israel: Belanna passambayangmu lako Kaleku tu diona Sanherib, datu Asyur — ,

²²iamote tu kada Napokada PUANG diona datu iato, nakua: Iatu simbolong manik, iamo anak dara Sion, untapa’ko sia untelle-telleko; iatu anak dara Yerusalem unniling-iling dio boko’mu.

²³Mindara tu mube’se sia mupa’kada solangi, sia mindara mupekapuan gamarammu sia mupasolo’i matammu? Lako To maserona Israel!

²⁴Tete dio pudukna kalena taummu ammu be’sei tu PUANG, mukua: Kabudanna karetaku angku kendekki tu buntu malangka’ sae langngan bottona Libanon sia kulelleng tu mintu’ garonto’ arasi’ kalandona, sia mintu’ sanoba’ mellongna; sia la rampona’ langngan botto malangka’na sia tama pangala’ tamman makampunna.

²⁵Ia angku mambo’bok la unniru’na’ uai; sia mintu’ messarakna salu Nil lan Mesir kurangkei pala’ lentekku.

²⁶Tae’ lenparaka murangi, kumua mintu’na te Kulampakmo tempon dio mai sia randuk dio mai tipamulanna inang Kubori’mo? Totemo Kuparampo randannamo; manassa la musanggang tu mintu’ tambakuku matoto’, anna daun lauan nasang.

²⁷Iamo bannangna to na iatu to umpa’tondokki tang pakullemo unnea sia magiang sia kasirisan; tau iato mai susito merriunna dio lu padang, susito lolo mangura, susi riu dao papa, susi pa’lak gandung mane tuo.

²⁸Apa Kutandai tu diona kao’korammu sia lu tama lu lanmu mai sia kapabali-balian masarrangmu lako Kaleku.

²⁹Belanna kapabali-balian masarrangmu lako Kaleku sia kamatampoammu, tu rampomo tama pa’perangingKu, manassa Aku la umpalakoi kale’ke’Ku tu illongmu sia sanga’Ku tu sadangmu, angKu pasuleko lako tu lalan muola sae.

³⁰Iamote tu tanda lako kalemu, kumua: Lan taun iate la mukande tu apa tuo kalena, na taun ma’penduan iatu apa tuo poleo, apa lan taun ma’pentallun la mangambo’komi ammi megandung sia untanan garonto’ anggoro’ ammi kandei tu buanna.

³¹Sia iatu bati’na Yehuda tu tilendokna sia tinampena la mennuaka’ pole diong sia membua dao.

³²Belanna dio mai Yerusalem la nanii tassu’ tu tinampenapa sia dao mai buntu Sion tu tilendoknapa; kamakaritutuanNa PUANGna mintu’ ma’dandan maritik la umpadenni.

³³Iamoto nakua kadanNa PUANG diona datu Asyur, kumua: Inang tae’ anna la tama kota iate sia tae’ anna la umpassumpiran misa’ tinaran tama, sia tae’ anna la unnangkaran balulang ke palaoanni sia tae’ nala umpabendan tambakuku la urrukka’i.

³⁴La sulemo lako tu lalan naola sae, apa tae’ nala tama kota iate, kadanNa PUANG.

³⁵Sia la Kurinding pala’ te kota iate, angKu lendokanni, belanna sangangKu sia belanna Daud, taungKu.

³⁶Attu iato tassu’mi tu Malaeka’Na PUANG, Napateimi tu surodadunna to Asyur saratu’ karua pulona llima sa’bunna. Iatonna millik tu tau melambi’, natiroi tu mintu’nato, batang rabuk mannamo.

³⁷Sangtiangkarammi sule tu Sanherib, datu Asyur, anna torro dio Niniwe.

³⁸Den pissan tonna menomba lan banuanna Nisrokh tu napodeatanna, napakandeimi bassi mataran anakna, disanga Adramelekh sia Sarezer; anna mallai lussu’ sola duai lako padang Ararat, anna Esarhadon, anakna, dadi datu ussondai.