Read Toraja-Sa'dan YESAYA 38 Bible Online

YESAYA 38 - Toraja-Sa'dan bible

YESAYA 38

¹Allo iato masanna’mi sakinna tu Hizkia, la mate mannamo; saemi nabi Yesaya, anakna Amos mennolo lako datu, anna ma’kada nakua: Inde sia tu kadanNa PUANG Nakua: Mepasanmoko lako mintu’ to lan tongkonan layukmu, belanna la matemoko sia tae’mo mula tuo.

²Messailemi tu Hizkia lako to’ rinding namassambayang lako PUANG.

³Nakua: O PUANG, la Mikilalai kumua umba kukua lolang maruru’ dio oloMi sia lantuk penaangku sia kupogau’ tu apa melo dio pentiroMi. Pakalan si’dan-si’danmi tumangi’ tu Hizkia.

⁴Saemi tu kadanNa PUANG lako Yesaya, nakua:

⁵Maleko, pokadanni Hizkia, kumua: Inde sia tu kadanNa PUANG, Kapenombanna nene’ to dolomu Daud: Kurangimo tu passambayangmu sia Kutiromo tu mintu’ uai matammu; tonganna la Kurangngannipa tu umuru’mu sangpulo lima taunna.

⁶Sia aku la ullendokangko dio mai kuasanna datu Asyur, susi dukato tu kota iate sia la urrinding pala’i te kota iate.

⁷Iamote tu la dadi tanda lako kalemu dio mai PUANG la umpogau’i tu apa mangka Napokada, nakua:

⁸Iatu bayo-bayo mata allo, tu solo’mo dio eranna Ahas, la Kukondoran sule sangpulo pellesean. Kendekmi sule tu mata allo sangpulo pellesean diong mai tu naninna solo’.

⁹Iamote tu sura’na Hizkia, datu Yehuda, tonna mangka masaki anna maleke.

¹⁰Kukua: Mane tauna’ angku la lumingkamo lako babangan lino tomate, iatu apa torro dio mai mintu’ katuoangku la sisayuranna’.

¹¹Kukua: Tae’mo kula untiro PUANG iamotu PUANG lan tondok to tuo, tae’mo kula untiro tolino sia torro sisola issinna lino.

¹²Iatu pa’bongiangku dirondonmo sia dilendokammo dio mai kaleku susito tenda to mangkambi’; ullulunmo’ katuoangku butung to ma’tannun: Nara’ta’mo’ Puang dio mai tandaan. Misa’bianganmo’ allo bongi.

¹³Sae lako melambi’na kunii undaka’i tu kamanamanan. Susito singa tu Puang ulle’to mintu’ bukungku. Misa’bianganmo’ allo bongi.

¹⁴Susi kaluppini’ ma’kisi’-kisi’, susi dukamoto tu gamarangku. Mamali’na’ mentingara lu langngan, o PUANG; mataku’na’, Kamu la unnindo’ina.

¹⁵Apara la kupokada, apa ma’kadamo tu Puang lako kaleku sia mangkamo Napogau’ tu iannato? La kupela’-pela’ lumingka lan tu taun kadadiangkupa, belanna kamapa’diranna penaangku.

¹⁶O Puang, tete dio te mintu’na apa iate natuo tu tolino sia lan mintu’na te nanii tuo deatangku, kumua Puang umpamalekena’ sia umpatuona’.

¹⁷Iatu kamaparrisan kapuaku membalimo kasalamarangku. Puangmo tu ullendokanna’ dio mai patuang lambe’ nanii kaburukan, belanna mintu’ kasalangku Mitibemo lako boko’Mi.

¹⁸Belanna iatu lino to mate tae’ napudi-pudiKomi sia iatu kamatean tae’ napakala’bi’Komi; minda-minda tu rokkomo lamunan tae’ narannuanni tu kamarurusamMi.

¹⁹Sangadinna iatu to tuo, tu to tuo umpudi-pudiKomi, susite aku umpudiKomi totemo; iatu mai ambe’ la umpokadai tu kamarurusamMi lako mintu’ anakna.

²⁰Tumayamo tu PUANG la untunduina’, iamoto la undedekki’ katapi lan mintu’ allo katuoanta lan banuanNa PUANG.

²¹Iatu Yesaya mangkamo ma’kada, nakua: La naala tau tu bua ara nagaragai petamba’ sia napalako bundang iato, anna mondo.

²²Iatu Hizkia mangkamo ma’kada, nakua: Apara la dadi tandana, kumua la kendekna’ langngan banuanNa PUANG?