Read Toraja-Sa'dan YESAYA 39 Bible Online

YESAYA 39 - Toraja-Sa'dan bible

YESAYA 39

¹Attu ia dukato nasuami Merodakh-Baladan, anakna Baladan, datu Babel, tu tau la umbaa sura’ sia pakatu lako Hizkia, belanna denmo kareba narangi, kumua masaki tu datu anna malekemo.

²Parannumi penaanna Hizkia diona kasaeanna tau iato mai, anna patiroanni tu banua pangrampunan iananna, iamotu mintu’ salaka sia bulaan sia rampa-rampa sia minna’ keangga’ sia mintu’ inan pa’bunona sia mintu’ tu apa lan inan pangrampunan iananna. La iatu lanna tongkonan layukna, la iatu lanna mintu’ parentana, moi misa’ tae’ tang napa’petiroan Hizkia lako tau iato mai.

³Attu iato saemi nabi Yesaya mennolo lako datu Hizkia, anna ma’kada lako datu, nakua: Apara napokada tu tau iato mai sia umbara nanii sae ussitiroan puangku? Mebalimi Hizkia, nakua: Iatu tau iato sae lako kaleku lu dio mai tondok mambela, iamotu Babel.

⁴Ma’kadami Yesaya nakua: Apara natiro lan tongkonan layukna puangku? Mebalimi Hizkia, nakua: Natiro nasang tau iato mai tu mintu’ apa lan tongkonan layukku; moi misa’ tu lanna inan pangrampunan iananku, tae’ tang kupatiroanni.

⁵Ma’kadami Yesaya lako Hizkia, nakua: La naperangii puangku tu kadanNa PUANGna mintu’ ma’dandan maritik:

⁶Tonganna la sae tu allona, iamotu mintu’ lanna tongkonan layukmu sia mintu’ tu narampunna nene’ to dolomu tama inan pangrampunan ianan sae lako allo iate, iamo la dibaa lako Babel, moi misa’ tae’mo la torro, kadanNa PUANG.

⁷Sia la naala ba’tu pira-pira tu anakmu muane, tu sun dikalemu, tu mudadian, anna alai parea lan tongkonan layukna datu Babel.

⁸Ma’kadami Hizkia lako Yesaya, nakua: Melo tu kadanNa PUANG tu mipokada. Sia nakuapa: La tontongpa tu kamarampasan lan mintu’ allo katuoangku.