Read Toraja-Sa'dan YESAYA 40 Bible Online

YESAYA 40 - Toraja-Sa'dan bible

YESAYA 40

¹Pakatanai, pakatanai tu taungKu, kadanNa Kapenombammi.

²Ma’kadakomi la umpamanamanni tu penaanna to lan Yerusalem, pemandui meoli lako kalena, kumua upu’mo tu mintu’ kamasarasanna sia tila’bakmo tu mintu’ salana; naappa’mo penduan manglokkon dio mai limanNa PUANG belanna mintu’ kasalanna.

³Perangii, den gamaranna tau metamba-tamba, nakua: Pasakka’mi tu lalanNa PUANG lanlu padang pangallaran, ranteanni batatta dio padang talo tu Kapenombanta.

⁴Mintu’ lombok la dibumbun sia mintu’ buntu sia buttu-buttu la dirantei sia iatu mai batu ma’pongko’-pongko’ la mempadang marante.

⁵Iatu kamala’biranNa PUANG la dipaombo’ sia mintu’ tolino pada la untiroi, belanna sunmo dio pudukNa PUANG.

⁶Perangii, den tu gamara nakua: Metambako. Mebalimi, nakua: Apara la kupetamban? — Mintu’ to lino susi bangri to riu sia mintu’ kamala’biranna butung to bunga dio lu padang.

⁷Iatu riu malayu sia iatu bunga rondon, ke nairi’i penaanNa PUANG; tonganna iatu ma’rupa tau susi bangri to riu!

⁸Iatu riu malayu sia iatu bunga rondon, apa iatu kadanNa Kapenombanta tontong sae lakona.

⁹E Sion, ikomo tu umbaa kareba melo, la kendekko langngan misa’ buntu malangka’; e Yerusalem, ikomo tu umbaa kareba melo, pekapuai tonganni tu gamarammu; pekapuai tu gamarammu, da mumataku’; pokadanni mintu’ kota Yehuda kumua: Inde sia tu Kapenombammi!

¹⁰Manassa la sae tu Puangta PUANG situang kamawatangan, sia iatu limanNa umpalalo parenta. Iatu polean dio Kalena sia iatu pepakkan dolo dio oloNa.

¹¹La Nakambi’ tu baanan dombaNa susito mangkambi’, la Napasipulung tu anak domba tama limanNa, anNa sembe’i; ia duka tu umpasusunnapa anakna la Napela’-pela’ Naramba.

¹²Mindamora ussuka’i pala’na tu uai sia mindamora undangkanni limanna tu langi’ sia ungkararoi tu barra’-barra’ lan lino sia untimbangi dating tu mintu’ buntu sia umpalangnganni timbangan tu mai tanete?

¹³Mindamora tu mangka ullopianni tu PenaanNa Puang sia mindara tu tongkonan ada’Na umpatuduI?

¹⁴Mindamora tu Nanii undaka’ pa’timbangan la umbenNi pa’inaan la unnada’i lalan malolo, sia unnada’i kapaissanan sia umpatuduI diona lalan la ungkabu’tui tangnga’ kinaa?

¹⁵Iatu mintu’ bangsa dipasangtinti uai sangto’doan lan petimba sia pada to barra’-barra’ dao timbangan; iatu lebukan susito barra’-barra’ manisak titale’.

¹⁶Tae’ anna ganna’ tu kayunna Libanon la dipantunui sia iatu olo’-olo’na tae’ naganna’ dipemalaran ditunu pu’pu’.

¹⁷Iatu mintu’ bangsa dio oloNa Puang butung to tae’ bang apa, mintu’nato Nasanga susito apa tae’, sia tae’ gai’na.

¹⁸Mindara la mipasitintianNi tu Puang Matua sia rupa apara tu la mipasangrupanNi?

¹⁹Napati’norammi pande misa’ rapang-rapang dipodeata anna sapu’i bulaan pande bulaan, sia natampan ba’tu pira-pira rante salaka.

²⁰Iatu to tang palambi’ doi’na la unggaragai rapang-rapang dipa’deatainna, umpilei misa’ kayu tang manapo, anna daka’ misa’ pande manarang la umpatunannanganni misa’ rapang-rapang dipodeata tang tibendon.

²¹Tae’raka miissanni? Tae’raka mirangii? Tae’raka midipokadan tempon dio mai? Tae’raka miissanni tu diona parandanganna lino?

²²Iatu Puang unnisung dao lino malepong, na iatu tolino butung bangri batik. Ia umballa’ langi’ takua to sampin, Naballa’ susito tenda nanii torro.

²³Ia umputtai mintu’ to paa, sia mintu’ to ma’parenta dao kuli’na padang Napatangkebattuan.

²⁴Mane ra’pa’ ditanan, mane ra’pa’ diambo’, mane mennuaka’ rokko padang, anNa pamurru’i Puang, naurungan malayu tu tau iato mai, sia susi ongkan napettiaran angin bara’.

²⁵Mindara tu la mipasitintianNa’, kumua angKu sangtinti? kadanna To masero.

²⁶Mentingarakomi langngan, ammi tiroi; mindara umpadadi te mintu’ ma’dandan maritik dao? Iamotu Puang tu umpopa’lengkoanni tassu’ tu sangtuntunan kapua baananna sia tu untambai simisa’-misa’i sanganna tu mintu’nato tete dio kakapuanna matoto’Na sia kakapuanna paanNa; na moi misa’ tae’ torro.

²⁷Iamoto, e Yakub, ma’apai ammu kua, sia ma’apai ammu ma’kada, e Israel, kumua: Karerungan tu lalanku dio oloNa PUANG sia tae’ bang nadisaile tu katonganangku dio oloNa Kapenombangku.

²⁸Tae’raka ammu issanni, tae’paraka ammu rangii, kumua iatu PUANG, Iamo Kapenomban matontongan, To kumombongna mintu’ randan langi’. Tang mekaboyo’ sia tang mekata’ka’, tang dilambi’ tu kamanaranganNa.

²⁹Ia umpamawatangi tu to boyo’ sia urrangnganni kamatotoranna to tang pakullemo.

³⁰Iatu to mangura ma’din boyo’ sia longgo’ sia iatu pia muane ma’din tilende’ anna tobang.

³¹Apa iatu to untayan PUANG la umba’rui kamatotoranna, anna mettia’ kendek langngan susi langkan maega. Tau iato mai la lumingka tang mekaboyo’, la sumalong tang mekata’ka’.