Read Toraja-Sa'dan YESAYA 42 Bible Online

YESAYA 42 - Toraja-Sa'dan bible

YESAYA 42

¹Tiromi tu taungKu, tu Kusande’ boko’na, tu Kutonno’, tu naala penangKu, Kupatamaimo Penaangku; Iamo la umpatiroanni malolona tu mintu’ bangsa.

²Tae’ anna la melalla-lalla, ba’tu umpekapuai gamaranna, ba’tu napa’- perangian dio lu batatta.

³Iatu tille kumpang tae’ nara’pakki sia iatu palita ma’millo mannamo tae’ napa’dei; la umpapayan katonganan situru’ kamanapparan.

⁴Tae’ anna la ma’millo mannamo ba’tu dira’pak sae lako napantokna tu malolona lan lino; na mintu’ biring tasik la untayanni tu pangadaranna diona sukaran aluk.

⁵Inde sia tu kadanNa Puang Matua, Iamotu PUANG, tu umpadadi sia umpalumbang batara, tu umballa’ lipu daenan sia mintu’ apa tuo lan; tu umpatamai penaa mintu’ to untongkonni kuli’na padang sia umpatamai sumanga’ tu mintu’ to lolang lan.

⁶Akumo, tu PUANG, tu mangka untambaiko situru’ kamaloloan, Kutoe tu limammu sia Kurinding pala’ko, sia Kupatulangdanko mendadi misa’ basse lako bangsa iato sia napomasiang mintu’ sangpetayanan;

⁷la umpamillik mata to buta, la untassu’i to ditarungku lan mai pa’tarungkuan sia la urrampananni lan mai pa’pattangan tu to unno’ko’ lan kamalillinan.

⁸Akumo tu PUANG, iamoto tu sangangKu sia kamala’birangKu tae’ angKu benni to senga’, sia iatu kadipudiangKu tae’ angKu palulakoi rapang-rapang dipodeata dipa’.

⁹Tiromi, iatu apa dolo, saemo, anna totemo Kupokadangkomi tu apa ba’ru tae’pa namentaruk angKu paissannikomi.

¹⁰PakendekanNi nanian ba’ru tu PUANG, sia kadipudianNa dio mai mintu’ randan langi’, e kamu to massombaran lan lu tasik sia mintu’ tu issinna; e kamu randan tasik sia mintu’ to umpa’tondokki.

¹¹Melo ke umpekapuai gamaranna tu padang aak sia tondokna, sia mintu’ to’ tenda nanii to Kedar torro; melo ke sikumalasi-lasianni tu to ma’tondok dao buntu batu sia siarrakan dao mai bottona buntu.

¹²Sipatu la napakala’bi’ tu PUANG sia la nasa’bu’ tu kadipudianNa dio lu mintu’ randan tasik.

¹³Iatu PUANG tassu’ susi misa’ pa’barani, Natukka’ ara’Na anNa maparrang susito parari; la unnarrak-arrak parari, metalillingan tongan; la umpa’petiroan kalalonganNa unnea ualinNa.

¹⁴MasaiMo’ ma’pakappa, sia ma’loko-loko, sia untemme’ ara’Ku; totemo la kumarrakNa’ susi baine mangurria’; la seka’-seka’Na’ napupu’ ara’Ku.

¹⁵La Kupamampu’ tu mai buntu sia tanete sia la Kupamalayu tu mai to’ kayunna, la Kupopenggantanan tu salu sia la Kupama’ti tu limbong.

¹⁶AngKu rendenni tu to buta dio lu lalan tang natandai, sia la Kupopa’lingka dio lu batatta tang nalesepa; la Kupopembali masiang tu malillin dio tingayona sia la Kurantean lalan. Mintu’na apa iate, la Kupadadi sia tae’ Kula tang umpogau’i.

¹⁷La sorong boko’ sia la kasirisan tu mintu’ to sande’ lako rapang-rapang dipodeata dipa’; tu to ma’kada lako rapang-rapang dipodeata dipati’no’, kumua: Kamumo tu deatangki.

¹⁸E to taru, ma’perangikomi, e to buta, bungka’i tu matammi ammi mentiro.

¹⁹Mindara tu buta susi taungKu sia taru susi pesuangKu, tu Kusua? Mindara tu buta susito tae’ sayuanna sia buta susi taunNa PUANG?

²⁰Buda tonganmo mutiro, apa tae’ mupalan penaai; tibungka’ tu talingammu, apa tae’ ammu parangi.

²¹Belanna kamaloloanNa anna alai penaanNa PUANG umbenni pangadaran kapua sia mala’bi’.

²²Apa tau iate misa’ bangsa dipangrampai sia dipanglo’do’i, napungomi tau sola nasang lan lo’ko’, anna patamai pa’tarungkuan; iatu tau iato mai butungmo apa dirampa, na moi misa’ tau tae’mo urrampananni; iatu tau iato mai butungmo apa dilo’do’i, na moi misa’ tau tae’mo ma’kada, kumua: Pasulei.

²³Mindarakomi tu untananni talinga te, sia umpalan penaai sia umperangii undinna?

²⁴Mindara ussorongi tu Yakub la dipangrampai sia Israel lako to manglo’do’i? Tang lakoraka PUANG tu tanii umpogau’ kasalan? Belanna tae’ namorai tu tau iato mai unnolai lalanNa sia tae’ anna perangii tu Sukaran alukNa?

²⁵Iamoto anNa barrakanni lako tau iato mai tu kare’dekanNa sia rari maparrang. Iamo umpadukkui tiku lao, apa tae’ nadampangi; ondongpi namampu’i, apa tae’ duka anna sopatianni.