Read Toraja-Sa'dan YESAYA 43 Bible Online

YESAYA 43 - Toraja-Sa'dan bible

YESAYA 43

¹Apa totemo, kadanNa PUANG, To tumampamu, e Yakub, sia To kumombongmu, e Israel, da mumataku’, belanna Akumo ullendokangko, Kutambaimo tu sangammu sia ikomo taungKu.

²Iake ussassangko uai, la Kurondongko, sia iake ullambanko salu, tae’ anna la ungkabu’ko; iake unnolaiko to’ api, tae’ anna la ungkandeko sia tae’ anna la’poiko.

³Belanna Akumo, PUANG, Kapenombammu, To maserona Israel, Pela’bakmu; Kusorong tu Mesir, Etiopia sola Syeba la dipasondana ulla’bakko.

⁴Belanna keangga’ko Kutiro sia mala’bi’ sia naalako penaangKu, angKu sorongi tu ba’tu pira-pira tau ussulleko, sia ba’tu pira-pira bangsa ussonda sunga’mu.

⁵Da mumataku’, belanna Kurondongko; la Kupasae dio mai rampe matallo tu mai bati’mu sia la Kukorok londongko dio mai rampe matampu’.

⁶La Kukua rekke ulunna salu; Pasulei, anna sau’ pollo’na uai: Da mupadapai, solanni sule tu mai anakKu muane dio mai padang mambela sia iatu mai anakKu baine dio mai randan langi’,

⁷mintu’ tu mai to disa’buran sangangKu, tu mangka Kupadadi la Kupomala’bi’, tu Kutampa sia Kukombong.

⁸Eloranni sun tu bangsa buta iato, moi anna kemata, sia iatu mai to taru, moi anna ketalinga.

⁹Sirampunmo tu mintu’ bangsa sia sipulungmo tu mintu’ to sangpetayanan. Mindara tu tau iato mai ma’din umpa’peissananni tu apa iate sia umpokadangki’ tu apa lendu’mo? Melo ke nabaai sae tu sa’binna, kumua anna disanda-tonganni; la narangi tau anna ma’kada nakua: Tonganna te.

¹⁰Kamumo, tu sa’bingKu sia taungKu, tu Kutonno’, kadanNa Puang, ammi issanni sia mipatonganNa’ sia mitandai, kumua Aku bangsiamote! Tae’ tu Kapenomban dipaden dolo na Aku, sia undinna na Aku, tae’ tu senga’na.

¹¹Aku, Akumote tu PUANG, nasaliananna Aku tae’ tu Pela’bak senga’.

¹²Akumo tu ma’patale’, manglendokan sia ma’kada; tangiaRa’ to salian lembang dio lu kamu; kamumora tu sa’bingKu, kadanNa PUANG, sia Akumora tu Puang Matua.

¹³Iake undinna Aku duka tu Puang Matua sia moi misa’ tau tae’ la urrampananni lan mai lisu pala’Ku. Iake Kupogau’i, mindara ma’din undampai?

¹⁴Nakua kadanNa PUANG, Pela’bakmi, To maserona Israel: Bannang dio kamu, angKu sua misa’ tau lako Babel, angKu ulai’ male tu mintu’ to Kasdim rokko kappala’, tu nanii massattuan sia kumalasi-lasi.

¹⁵Akumo tu PUANG, To maseromi, To tumampamana Israel, Datummi.

¹⁶Inde sia tu kadanNa PUANG, tu umpaden batatta lan tasik sia lalan lan to’ uai mariak;

¹⁷tu umpake’de’ kareta sia darang sia to petoe kassa’ sia to lalong; tu pada tallan, na tang umbelami malimbangun sule, pa’de potonmo sia pi’de susi bannang palita:

¹⁸Da mikilalai tu apa mangkamo dadi pirangbongi’, sia da mipalan lenni penaa tu apa lendu’mo;

¹⁹manassa la umpadenNa’ apa ba’ru, sia la mellolo; ma’apai ammi tang la unnissanni undinna? La Kupaden tu batatta dio lu padang aak sia salu dio lu padang talo.

²⁰Mintu’ olo’-olo’ dio lu padang la umpakala’bi’Na’, susi dukato tu serigala sia burung unta, belanna Kubenmo uai dio lu padang aak, sia salu dio lu padang, la Kupairusanni tu mai taungKu tu Kupilei langsa’.

²¹Iatu bangsa mangka Kukombong la umpakala’bi’Na, la umpatale’ kadipudiangKu.

²²Apa tae’ ammu meongli’ lako Kaleku, e Yakub, tae’ ammu issanni masara’ dio Aku, e Israel.

²³Tae’ra mubaanNa’ domba la dipopemala’ pantunu pu’pu’mu sia tae’ra mupakalangka’Na’ pemala’ pangrere’mu tae’ dukara Kupamatana’ko diona kande dipemalaran sia tae’ dukara Kutuntunko diona pantunu dupa.

²⁴Tae’ra doi’mu muallianNa’ bangle, tae’ra mupedia’iNa’ lompo pemala’ pangrere’mu sangadinna napamatana’Na’ kasalammu sia nabo’yo’iNa’ kakelokammu.

²⁵Aku, Akumote tu umpa’dei mintu’ kakadakeammu belanna iamo pa’poraiangKu sia tae’mo Kupalanni penaa tu kasalammu.

²⁶PakilalaNa’, anta sibisara melo, ma’kada bangmoko ammu disandatonganni.

²⁷Iatu bunga’ ambe’mu umpogau’mo kasalan, sia to ma’pangada’mu untengkaimo parentaKu.

²⁸Iamoto angKu sallangi tu mintu’ pangulu inan maindan, angKu eloranni tu Yakub disabu’i butung pepayu sia dilo’bo-lo’bo tu Israel.