Read Toraja-Sa'dan YESAYA 48 Bible Online

YESAYA 48 - Toraja-Sa'dan bible

YESAYA 48

¹Perangii te, e bati’na Yakub, tu ungganti kalena Israel, sia tu bu’tu lan mai kalimbuangna Yehuda, umposumpa sanganNa PUANG sia ungkatonganni Kapenombanna to Israel, — apa tae’ nasituang kamanapparan sia kamaloloan —

²ondongpi ungganti kalena kota maindan tu tau iato mai sia sande’ lako Kapenombanna to Israel; tu digente’ PUANGna mintu’ ma’dandan maritik.

³Iatu apa lendu’mo Kupa’peisanan dolomo lako kalemu, tu sun dio randan pudukKu sia Kupa’perangian lako kalemu; ta’pa Kupogau’ anna dadi.

⁴Belanna Kuissan, kumua matoroko sia iatu sokkongmu susi bassi kalebu sia iatu kidemu sangtinti tambaga,

⁵iamoto angKu pokada doloi lako kalemu sia Kupa’perangian tonna tae’pa nadadi, da muma’kada undinna, kumua: Kupa’deatainna umpogau’i tu mintu’ apa iato sia rapang-rapang dipodeata dipa’ku ba’tu rapang-rapang dipodeata dipati’no’ku umpa’pesuanni tu apa iato.

⁶Murangimo tu iannato; tiro meloi tu mintu’nato; tae’raka misipatu la ungkatonganni, kumua tongannate? Randuk totemo la Kuparangiiko tu apa ba’ru, iamotu mai rasia tu tae’pa muissanni.

⁷Mane totemori nadipaden, tae’ natempon dio mai, sia sae lako te allo iate tae’pa ammu rangi lenni, dikua da muma’kada kumua: Kuissanmo.

⁸Inang tae’pa murangi lenni sia tae’pa muissan lenni, sia dolona tae’pa naparangi len tu talingammu, belanna Kuissan kumua tang maruru’ tonganko sia nagente’ko tau to palutu tombang tempon lan mai pa’tambukanna indo’mu.

⁹Tete dio sangangKu angKu temme’pi tu ara’Ku sia diona kadipudiangKu angKu ta’tanpi tu Kaleku belanna mupomelona, dikua da angKu pisanniko.

¹⁰Kusa’pomoko, apa tang susi ussa’po salaka; Kusudimoko lan panglallangan kamaparrisan.

¹¹Tu belanna Akuri, ondongpi tu belanna Akuri, angKu pogau’i tu iannato moi umba nakua tu panglangdo; iatu kadipangkerangKu tae’ angKu eloranni lako to senga’.

¹²PerangiiNa’, e Yakub, e Israel, to Kutambai, Aku bangsiamoto, Akumo tu pamulanna, Aku dukamo tu ma’katampakanna.

¹³Sia limangKu duka mangka umparandanganni tu lino sia lima kanangKu umpalumbangi tu mai langi’, iake Kutambai, ma’dio ren nasangmi.

¹⁴Sipulung nasangkomi ammi perangii. Mindari tu tau iato mai tu mangka umpa’peissananni te mintu’ apa iate? Iatu to Nakamasei PUANG, iamo la umpogau’ pa’poraianNa PUANG lako to Babel sia umpa’pekitanan kuasanNa lako to Kasdim.

¹⁵Aku, Akumo tu mangka ma’kada, Aku bangsiamo tu untambai; Akumo tu umpasaei sia umpamaupa’i tu lalanna.

¹⁶Mengkareke’komi sola nasang lako Kaleku, ammi perangii te: Inang tae’ Kubuni tu apa Kupokada tempon dio mai; iatonna dadi to mai inang denMo’. Totemo Nasuana’ Puangta PUANG sola PenaanNa;

¹⁷Nakua kadanNa PUANG, Pela’bakmu, To maserona to Israel, nakua: Akumote tu PUANG, Kapenombammu, tu nenne’ umpatuduko, kumua ammu maupa’, sia Aku duka urrendenko lako lalan sipatu muolai.

¹⁸Iakemmu la umperangii tu mintu’ pepasanKu, manassa iatu kamarampasammu susito salu sia iatu kamaloloammu butung to bombang tasik;

¹⁹sia iatu bati’mu la susi karangan sia tarukmu la sangtinti bungin; tae’ anna la diputtai tu sanganna ba’tu dipisanni dio oloKu.

²⁰Tassu’komi lan mai Babel, mallaikomi dio mai to Kasdim; sikumalasilasiangkomi umpa’peissananni, sia umpa’perangianni sia umpatale’i sae lako randan langi’, kumua: Narampanammo PUANG tu Yakub, taunNa.

²¹Tang mekama’rang tu tau iato mai tonNa solanni unnola padang aak; Napalolongan uai lan mai buntu batu; Napiak tu buntu batu anna lolong uai lan mai.

²²Iatu to tang mekaaluk, tae’ kamarampasanna, kadanNa PUANG.