Read Toraja-Sa'dan YESAYA 5 Bible Online

YESAYA 5 - Toraja-Sa'dan bible

YESAYA 5

¹Totemo la umpopenanina’ misa’ nanian diona pa’kaboro’ku, gelongna pa’kaboro’ku diona pa’lak anggoro’na. Iatu pa’kaboro’ku den pa’lak anggoro’na dao tanete malompo.

²Mangkamo nakali sia napaserei tu mintu’ batu, anna tananni anggoro’ ballo sia napabendan tu misa’ lantang petayanan lan tangngana sia napa’ tu pa’parran anggoro’ lan; ma’peagi-agi bangmi kumua ba’tu la melo siai tu bua anggoro’na, apa membua langga’ manna.

³Na totemo, e kamu mintu’ pa’tondokan Yerusalem sia mintu’ muane to Yehuda, paolaiNa’ salu sola pa’lak anggoro’Ku.

⁴Apapara tu tang Kugauranni tu pa’lak anggoro’Ku? Matumbai tongKu peagi-agii tu bua anggoro’ anna bua langga’na manna bang?

⁵Iamoto la Kupokadangkomi totemo tu apa la Kugauranni tu pa’lak anggoro’Ku kumua: La Kulalakki tu rompo durinna, anna taloi olo’-olo’ sia la Kukakei tu tembo’na anna disilessakki.

⁶La Kupopempangala’ sia tae’ duka anna la dipetangkei sia la dibingkung, anna duri manna sola a’da’ tuo lan; la Kukuan duka tu salebu’ da anna pato’doi uran.

⁷Iatu pa’lak anggoro’Na PUANGna mintu’ ma’dandan maritik iamotu bati’na Israel na iatu mintu’ to Yehuda iamo misa’ tananan Naposende; untayan parenta malambu’, apa to’doan raraora; umpeagi kamalamburan, apa kamarukkanora narampoi.

⁸Upu’ allona tu to umpasirapi’-rapi’ banua sia to umpasikande-kande pa’lak, naurunganni tae’mo pa’pa’lakan sia kamu mannamo tau lan tondok.

⁹Mangkamo ma’kada lako kaleku tu PUANGna mintu’ ma’dandan maritik, kumua: Tae’ anna tang la pa’tombonan batu tu ba’tu pira-pira banua sia iatu mai banua kapua na maballo la lo’bangmo.

¹⁰Belanna iatu pa’lak anggoro’ sangpulo ayokana tedong untengkoi, sangba’ri tu alanna sia iatu mai lise’ misa’ ome misa’ri’ epa burana.

¹¹Upu’ allona tu to millik kale’ ke melambi’ undaka’ pangiru’ sia iatu to torro bang sae lako dannari mangiru’ anna sallui anggoro’.

¹²Iatu pa’maruasanna napamarua’ oni katapi, dandi, ganda’-ganda’ sia suling sia anggoro’, apa iatu penggauranNa PUANG tae’ anna palan ara’i sia tae’ anna sailei tu lalan limanNa.

¹³Iamoto anna dipali’ tu taungKu, belanna tae’ pengkilalanna sia mintu’ to mala’bi’na la mangelo sia iatu to kamban la mandasa-dasa diona kama’rangan.

¹⁴Iamoto anna la tibangnga sia la menganga tang sirua-rua tu lino to mate, anna tileak tama tu mintu’ kamala’biranna tau iato mai sola to kambanna sia kamaruasanna sia paningoanna.

¹⁵Attu iato mintu’ tau la dipamadiongan sia pia muane la dipasosso’ lu rokko, sia ia duka tu mata to matampo la dipampa lu rokko.

¹⁶Apa iatu PUANGna mintu’ ma’dandan maritik la dipakala’bi’ tete dio katonganan na iatu Puang Matua maindan la dipamaindan tete dio kamaloloan.

¹⁷Na iatu mai anak domba la ungkande riu dio lu sangtinti dio lu pa’pasanganna, sia to salian lembang la sae undaka’ barang apa dio to’ daun lauanna to malompo.

¹⁸Upu’ allona tu to urriu’i ulang kabulitukan tu penggauran sala sia ulang kareta pua nariusan kasalan.

¹⁹Tu ma’kada nakua: Melo ke madomi’-domi’I, melo ke Nasarra’-sarra’i tu penggauranNa, anta tiropi; melo ke samandappi’-dappi’nai tu apa Nalampakna To maserona to Israel, anta issanni.

²⁰Upu’ allona tu to unggente’i melo tu kadake sia kadake nagente’ melo; malillin nasanga masiang na masiang nasanga malillin; sia mapai’ nasanga matanik na matanik nasanga mapai’.

²¹Upu’ allona tu to ia kalena ussanga kalena kinaa sia ia kalena unggente’ kalena manarang.

²²Upu’ allona tu to lalong manna unniru’ anggoro’ sia to barani manna umpasigaru-garu pangiru’ melango.

²³Tu to untonganan to kadake belanna diona pappe’ sia umpasisayuran katongananna to malambu’.

²⁴Iamoto, susitu api mendelok unnimbakan dalame sia susi ria ditombon napopennau api, susi dukamoto tu aka’na tau iato mai la buruk sia iatu ta’binna la sisarombonan susi barra’-barra’, belanna naboko’imo tu Sukaran alukNa PUANGna mintu’ ma’dandan maritik sia nabelle’i tu kadanNa To maserona to Israel.

²⁵Iamoto anna re’dek tu ara’Na PUANG lako taunNa sia Nae’teran lima tu tau iato mai anNa pata’pai, naurunganni tiseno-seno tu mai buntu, na iatu mai batang rabukna tau iato mai butung rumpang situlambenan lako lalan. Moi anna susito iate mintu’na, tae’ anna poradanni kasengkeanNa Puang, sangadinna tontong bangpa tie’te’ tu limanNa.

²⁶La Napabendanan bate-bate tu mai to randan langi’ sia la Nakorok londong dio mai lelean uran; manassa inang madomi’ sia ta’pa la sae tu tau iato mai.

²⁷Iatu tau iato mai tae’i misa’ tu la kopa sia la titodo, tae’i misa’ la tikkaru’du’ ba’tu leppeng ba’tu ungko’ka’i salipi’na ba’tu la ka’tu tu ulang sepatunna.

²⁸Iatu tinaranna tontong bang matata’ sia iatu panana tontong bang digattang sia iatu kalungkung darangna sangtinti batu laulung sia iatu karetana la susito talimpuru’.

²⁹Angnga’na susi gamara singa birang, susi urrungna singa mangura; iatu tau iato mai unnarrak la undamak pangrampa anna pallaianni male, natae’ misa’ tau la urrampananni.

³⁰La narua angnga’ tu tau iato mai susito mongngo’na tasik; allo iato pittuk liu tu padang, iake mentiroi tu tau tiku lao kuli’na padang, kapittukan megiangan manna nata’pai matanna sia iatu arrang langi’ napapittuk saliu’.