Read Toraja-Sa'dan YESAYA 50 Bible Online

YESAYA 50 - Toraja-Sa'dan bible

YESAYA 50

¹Nakua kadanNa PUANG: Umbamira tu sura’ kasitantangan Kuben indo’mi, Kunii ussuai male? ba’tu umbannara tu to umpaindanniNa’ Kunii umbalukkomi? Sangadinna dionari kakelokammi angKu balukkomi sia bannang diori patengkammi anna disua male tu indo’mi.

²Ma’apai anna tae’ bang tau tongKu sae, sia tae’ bang tau mebali, tongKu metamba? Tarru’ kondi’raka tu limangKu la patunduan ba’tu tae’raka kamatotorangKu la parampanan? Manassa Kupakarrang tu tasik anna marangke sia Kupopempadang aak tu salu; naurunganni bubosi mate ma’rang tu mintu’ bale lan, belanna tae’mo uai diong.

³Aku duka umpakei pakean dibolong tu langi’ sia umparramba’i pangluluk.

⁴Nakamaseina’ Puangta PUANG kamalutean ma’kada, kumua angku issanni umpakatanai tu to bo’yo’: Napamillikna’ ke melambi’i, sia Napatanan tu talingangku, angku ma’perangi susito mai pia ma’guru.

⁵Napoparangimo Puangta PUANG tu talingangku, anna tae’ kumengkailing, sia tae’ kusorong boko’.

⁶Kupopa’elo’na tu boko’ku lako to umbambana’ sia popoku lako to urrotakki sambangku; sia tae’ kutampunni tu lindoku dilo’bo sia ditittudui.

⁷Apa Puangta PUANG untunduina’, iamoto anna tae’ angku matuna, sia ia dukamoto angku pasusii batu laulung tu lindoku, belanna kuissan, kumua tae’ angku la kasirisan.

⁸Mandappi’mo tu To ussanda-tongannina’; mindara tu la kusikara-karan? Maikomi anta pada mennolo. Mindara tu la umbalina’ ke sikara-karana’. Melo ke saei lako kaleku.

⁹Manassa Puangta PUANG untunduina’, mindara la umpasalana’? Iatu tau iato mai la susi nasang sampin buruk nakande busung.

¹⁰Mindarakomi tu ungkataku’ PUANG sia umperangii kadanna taunNa? Iake lumingkai nakabu’ kamalillinan sia tae’ kamasiangan dio, la urrannuan sanganNa PUANG sia sande’ lako Kapenombanna.

¹¹E kamu sola nasang tu to umpopa’laka-laka api sia to umpasakka’ tinaran padurru’, da’ito mimale tama to’ dukku apimmi sia tama to’ dama’ mipopa’laka-laka. Iatu iannato la dadi lako kalemi lu dio mai Kaleku, ammi sumpandan situang pa’di’.