Read Toraja-Sa'dan YESAYA 52 Bible Online

YESAYA 52 - Toraja-Sa'dan bible

YESAYA 52

¹Matangkinko, matangkinko, pakei tu kamawatangammu, e Sion; pakei tu pakean ballomu, e Yerusalem, tondok maindan. Belanna tae’mo anna la tama mati’ tu to tang disunna’ ba’tu to maruttak.

²Tambakki tu barra’-barra’ dio mai kalemu, maiko ammu unno’ko’, e Yerusalem, e anak dara Sion, tu dirampa.

³Belanna nakua tu kadanNa PUANG: Dibalukkomi, apa tae’ tu allimmi, iamoto ammi la dila’bak, tang dipaolai doi’.

⁴Belanna nakua tu kadanNa Puangta PUANG: Iatonna dolo-dolona male nasang tu taungKu rokko Mesir la mentiruran sia napakario-rio Asyur moi tae’ bannangna.

⁵Apa totemo apara kukarampoi inde te? kadanNa PUANG. Belanna iatu taungKu dibaa moi tae’ bannangna, sia mintu’ tu to untaloi maramba, kadanNa PUANG, sia tontong dipa’kada solangi tu sangangKu tu’tu’ allo.

⁶Iamoto la natandai mintu’ taungKu tu sangangKu allo iato anna issanni, kumua Akumo, tu ma’kada kumua: Tiroi, la dioNa’ ren.

⁷Tang pada melona dao lu buntu tu lentekna to umpatale’ kareba diona kasendean tu umpa’peissanan kamarampasan, tu umbaa kareba melo, tu umpakalelean kasalamaran, tu ma’kada lako Sion, nakua: Iatu Kapenombammu iamo Datu.

⁸Perangii, pa’kampamu umpekapuai gamaranna, sia pada sikumalasian, belanna matanna kalena untiroi tu PUANG sule lako Sion.

⁹Unnangnga’komi sia pada sikumalasiangkomi, e mintu’ kota daun lauanna Yerusalem, belanna Napakatanamo PUANG tu taunNa sia Nala’bak tu Yerusalem.

¹⁰Nakalili’mo PUANG tu takia’ maseroNa dio tingayona mintu’ bangsa sia la natiro mintu’ randan langi’ tu kasalamaran dio mai Kapenombanta.

¹¹Ke’de’komi, ke’de’komi, tassu’komi dio mai; da mirumbui lako tu apa maruttak, tassu’komi lan mai tondok iato, seroi kalemi, e kamu to umbulle pareaNa PUANG.

¹²Belanna tae’ ammi la tikara-kara sun sia tae’ ammi la ussarra’i lumingka, belanna PUANG tu la undoloangkomi sia Kapenombanna to Israel tu la undi dio boko’mi.

¹³Manassa, la maupa’ tu taungKu, la diangka’ sia dipalaang tanduk, anna tarru’ matande.

¹⁴Susi buda tau ka’ba’ bulunna untiroko — lendu’ ia kadakena tu pa’kaleanna, tang tibala taumo ditiro sia iatu rupanna tang susimo ma’rupa tau —

¹⁵susi dukato buda bangsa la bangngo ara’na, sia la napotangtiku’bi’ pudukna mintu’ datu, belanna iatu apa tang nauleleanpa tau, nata’paimo matanna, sia iatu apa tang tamapa talinganna, naissanmo.