Read Toraja-Sa'dan YESAYA 54 Bible Online

YESAYA 54 - Toraja-Sa'dan bible

YESAYA 54

¹Kumalasiko, e iko tu tamanangna, tu tae’na bangpa mukianak; unnarrakko sia unnangnga’ko, e iko tu tae’na lenpa mumangurria’, belanna iatu to tae’ balinna mandu buda anakna na iatu to mendapo’, kadanNa PUANG.

²Pekalua’i tu inan tendamu sia pamaluanganni muballa’ tu kulambu inan munii torro, da mudampai, pamalambe’i tu mintu’ pantokmu.

³Belanna la membaka’ka’ko lako kanan sia kairi sia la napomana’ bati’mu tu mintu’ bangsa sia ia la umpamapulu’ polei sule tu mintu’ kota daun lauanmo.

⁴Da mumataku’, belanna tae’ ammu kasirisan; da mumaila’, belanna tae’ ammu la matuna, sangadinna la mukalupaimo tu kamatunammu tommu mangura sia tang mukilalaimo tu kadibellerammu tommu balu.

⁵Belanna iatu muanemu, Iamo To tumampamu, PUANGna mintu’ ma’dandan maritik sanganNa; sia iatu Pela’bakmu, iamo To maserona to Israel, tu digente’ Kapenombanna mintu’ lino.

⁶Belanna Natambaimoko PUANG, susito misa’ baine ditampemo sia nalambi’ rosso inaa; sia ten to baine napobaine tau tonna mangurapa, apa nasayu undinna, kadanNa Kapenombammu.

⁷Sattu’roko Kutampe, apa tete dio kakapuanna mamaseKu, angKu alako sule.

⁸Diona kare’dekanna ara’Ku, angKu popentilindung lindoKu sattu’ dio mai kalemu, apa situang kamasokanan matontongan, angKu katuru-turuiko, kadanNa Pela’bakmu, Iamotu PUANG.

⁹Susi tonna linona Nuh, susi dukamo a’gangKu totemo; susi sumpaKu kumua tae’mo nala saba’ pole’ tu uai lan lino, susi tonna attunna Nuh, susi dukamo sumpaKu totemo to, kumua tae’mo Kula re’dek lako kalemu sia tae’mo Kula unggarrakko.

¹⁰Belanna moi nala tiberu tu mai buntu sia tigega’ tu mai tanete, apa iatu kamasokanangKu tae’ nala tiberu dio mai kalemu sia iatu basse kamarampasangKu tae’ anna la tigega’, kadanNa To maturu-turummu, iamotu PUANG.

¹¹E iko, to mandasa sia to narua angin bara’ sia to tang dipakatana, tiroi, la Kuato’ tu batummu Kupi’da’ batu tambaga sia la Kuparandanganniko parimata lasuri’.

¹²Sia mintu’ randan tembo’mu ake’ api Kugaraga sia mintu’ babanganmu ake’ ra’rak sia mintu’ rinding tembo’mu parimata intan.

¹³Na mintu’ tu anakmu la Naada’i PUANG sia la kapua kasalamaranna mintu’ anakmu.

¹⁴Tete dio kamaloloan ammu dipatangtibendon. Sia la muissan, kumua toyangko dio mai pa’pakario-rio belanna tae’ mumataku’, sia la toyangko dio mai ma’patirambanna belanna iatu iannato tae’ nala urreke’ko.

¹⁵Iake masarrangi tu tau ullaoiko, tae’ anna lu dio mai Kaleku to; minda-minda tu la ullaoiko, iko la napotibambang.

¹⁶Akumote tu umpadadi pande bassi tu ussau ruaya sia unggaraga pa’buno situang kamanaranganna, apa Aku dukamo tu umpadadi tu to pasanggang la pasanggangan.

¹⁷Mintu’ tu pa’buno digaraga la unneako, tae’ anna la lolo’ sia mintu’ lila unneako lan inan pa’paolaian salu, la musau’. Iamote tu taa mana’na mintu’ taunNa PUANG, sia patu borongna tau iato mai tu lu dio mai Kaleku, kadanNa PUANG.