Read Toraja-Sa'dan YESAYA 56 Bible Online

YESAYA 56 - Toraja-Sa'dan bible

YESAYA 56

¹Nakua kadanNa PUANG: Karitutui tu katonganan sia pogau’i tu kamaloloan, belanna iatu kasalamaran lu dio mai Kaleku la saemo sia iatu kamaloloan lu dio mai Kaleku sattu’mora anna dipaombo’.

²Maupa’ tu to umpogau’i te iannate sia ma’rupa tau tu untoe manda’i; tu ungkaritutui allo katorroan, naurunganni tang naruttakki sia ungkampai limanna da napogau’i tu mai kadakena.

³Da anna ma’kada tu to sae tu mengkaola lako PUANG kumua: Manassa nasarakki tonganna’ PUANG dio mai taunNa; sia da duka nama’kada tu to dibalianni kumua: Aku te sangto’ kayu marangke.

⁴Belanna nakua kadanNa PUANG: Diona tu to dibalianni, tu ungkaritutui mintu’ allo katorroangKu sia umpalosong pa’poraiangKu sia untoe manda’ basseKu.

⁵La Kuben tanda kapengkilalan sia sanga tu tau iato mai mandu melo anna mintu’ pia muane sia baine lan banuangKu sia lanna lu nalili’ rinding tembo’Ku; Kubenmo misa’ sanga matontongan sia tang la dipa’dei.

⁶Na mintu’ tu to sae tu mengkaola lako PUANG la menomba sia ungkamali’ sanganNa PUANG, sia la morai mendadi taunNa, iamotu mintu’ to ungkaritutui allo katorroan, naurunganni tang naruttakki sia iatu to untoe manda’ basseKu:

⁷manassa la Kusolan lako buntu maindanKu sia la Kupasende tu penaanna lan banua passambayangangKu; iatu pemala’ ditunu pu’pu’na sia pemala’ pangrere’na tau iato mai la naala penaangKu dao inan pemalarangKu, belanna iatu banuangKu disanga banua passambayanganna mintu’ bangsa.

⁸Inde sia tu kadanNa Puangta PUANG, tu umpasipulung mintu’ to Israel, tu diula’imo lan mai tondokna, nakua: La Kupasipulung lako tau iato mai tu to senga’, losong na iatu dipasipulungnamo.

⁹E mintu’ olo’-olo’ dio lu padang sia mintu’ olo’-olo’ lan pangala’ tamman, maikomi kumande!

¹⁰Iatu mintu’ tu to ma’kampana tau iato mai buta, moi misa’ tae’ natandai, mintu’i susi asu mamang, tu tang naissan ma’buroro; tikkaru’du’ anna umbambang rokko, sia naporai bang mamma’.

¹¹Sia asu iate soko, tae’ natandai dia’; iatu tau iato mai iamoto mangkambi’ tang makaritutu, pada unturu’ kalena lalanna, pada umparinaa kalena sarona, tae’ misa’i dipasalian rinding.

¹²(Ma’kadami nakua): Maikomi, angku alangkomi uai anggoro’, anta iru’ pangiru’ mepamalango; susite allo totemo, susi dukato masiang, mandu pole’pa marua’na.