Read Toraja-Sa'dan YESAYA 57 Bible Online

YESAYA 57 - Toraja-Sa'dan bible

YESAYA 57

¹Iatu to malambu’ sanggang, natae’ bang misa’ tau ussailei, sia iatu to masallo’ diurakkimo, natae’ bang tau umpoinaai; belanna diona kakadakean, anna diurakki tu to malambu’;

²la male situang kamarampasan; iatu to lolang malambu’ la melayo diong dali’ patindoanna.

³Apa kamu, mengkareke’komi mai, e anakna baine ma’balik mata, bati’ muane umpoka rampanan kapa’ sia baine ma’pangan buni.

⁴Mindara tu mipetaa-taai, mindara tu minii umpatado pudukmi sia unnollon-ollon lilami? Tang anak dosarokomika sia bati’ kamo’rangan?

⁵E kamu, to umpasau kamoraiammi dio to’ garonto’ kayu tarpin sia diong lu mintu’ garonto’ kayu maluna; sia kamu tu urrere’ anakmi diong lu mintu’ lombok sia lan lu mintu’ sapak buntu batu.

⁶Dio lu to’ batu malangngo’ diong lombok nanii tu taa ma’parongko’mu; iamotu ussukaranni dalle’mu, lako batu iato munii untongkai tu pemala’ pantedok sia munii umbaa kande dipemalaran. La Kupomatanaraka tu apa iato?

⁷Umparandanko patindoammu dao kalandona buntu; ia dukato inan iato munii kendek umbaa pemala’ pangrere’.

⁸Dio boko’ sia ampang ba’ba munii umpale’ke’i tu tanda kapengkilalammu, belanna mupasaliananNa’ umparandan patindoammu, ammu kendek langngan, mupeloka’i tu patindoammu; siallu’mokomi la naben doi’ tu to musangamparan tu mutiromo kasirisanna.

⁹Saeko mennolo lako Molokh umbaa minna’ busarungngu’ sia mupasakka’ buda liu tu salap; sia musua tu mintu’ pesuammu male mambela, sia musua rokko lino to mate.

¹⁰Moi bo’yo’ko ma’lingka mambela, tae’ duka sia muma’kada kumua: Ka’tumo rannungku. Unnappa’ko kamatotoran ba’ru; iamoto anna tae’ mukopa.

¹¹Namindara tu mukagiang sia mukataku’, ammu tang maruru’mo sia tae’mo muingaranNa’ sia umpalan penaai tu iannato? Iaraka tu masaiNa’ kappa, ammu tang ungkataku’moRa’?

¹²La Kupa’peissanan tu kamaloloammu sia mintu’ penggaurammu, kumua iatu iannato tang kebattuan lako kalemu.

¹³Iake metambako, melo ke kabudanna deatammu urrampanangko. Apa mintu’nato napettiaran angin, pa’de dipenaai. Apa minda-minda tu umpentionganniNa’, iamo la umpomana’i tu padang iato sia la umpoapai tu buntu maindanKu.

¹⁴Attu iato den kada Nakua: Bumbunni, bumbunni, rantei tu lalan. Lolinni nasangi tu batu katitodoan dio mai lalanna taungKu.

¹⁵Belanna nakua kadanNa To patodoranna sia To sumpu mala’bi’, tu unnisung matontongan sia To masero sanganNa: Moi angKu untongkonni inan matande sia maindan, apa torro dukaNa’ urrondong to rantang buana sia to umpamadiongan penaanna, angKu papayai tu penaanna tu umpamadiongan penaanna sia penaanna to rantang buana.

¹⁶Belanna tae’ angKu la tontong sae lakona ullo’bo to lino sia tae’ nala tae’ upu’na tu kasengkeangKu; iake susito la ka’tu sunga’na tu to lino dio oloKu, anna Aku kalena umbenni penaa.

¹⁷Belanna kakadakean kabarakanna tau iato mai, anna pare’dekki tu ara’Ku, angKu pata’pai lima sia belanna kare’dekangKu angKu pentilindunganni. Apa moi nasusito, memboko’ duka dio mai Kaleku sia unturu’ lalan penaanna.

¹⁸Kutiromo tu lalanna tau iato mai, angKu pamatanai sia la Kurenden mana’pa, sia la Kupakatana pole’ sule tu mai masussana.

¹⁹Aku umpadenni tu pa’pudi-pudian nagente’ lila: Marampa’, marampa’ tu to mambela sia to mandappi’, kadanNa PUANG; sia la Kupamatana tu tau iato mai.

²⁰Apa iatu to tang mekaaluk susi tasik mariak, tu tae’ nakullei rapa’ na iatu uainna umpabu’tu pullan sia buka.

²¹Iatu to tang mekaaluk tae’ karapasanna, kadanNa Kapenombangku.