Read Toraja-Sa'dan YESAYA 58 Bible Online

YESAYA 58 - Toraja-Sa'dan bible

YESAYA 58

¹Pemandui metamba, da mupela’i, pekapuai tonganni tu gamarammu susi napiri tanduk ammu pokadanni taungKu tu kapatodo-tintinganna sia bati’na Yakub tu mintu’ kasalanna.

²Tang nadaka’Ra’ka tu tau iato mai kiallo-kiallo sia morai unnissan lalanKu, susitu misa’ bangsa umpogau’ kamaloloan sia tang ussa’biangan katongananna Kapenombanna. Tau iato mai mekutana lako Kaleku, nakua: umbanna tu sipato’ sia malambu’ sia morai umpengkareke’i Puang Matua.

³Nakua: Ma’apai angki ma’puasa anna tae’ Mitiroi, ma’apai angki urra’takki kaleki natae’ Miissanni? Tonganna iatommi ma’puasa ma’balilikomi ammi masero sia miparuku bang tu mintu’ to sumaromi mengkarang.

⁴Manassa ma’puasakomi la sigaga sia site’ge’ sia sengkekomi ammi sitambusuk; iatu puasa mipogau’ totemo tae’ nakullei umparampo pengkamoyami langngan inan matande.

⁵Kuporairaka te puasa susite, kumua umpa’dikki kalena tu tau lan sangallo: umpatuttu ulunna butung biang, ma’pakean karung, mamma’ diong to’ au? Iamoraka misanga puasa sia allo Naporai PUANG te?

⁶Tangiaraka te tu puasa Kuporai kumua: bukai tu pepungo kadake sia ko’karanni tu pepori ayoka, musua marampa’i male tu mintu’ to dipandasa, ammu rebong-rebongi tu mintu’ ayoka?

⁷Tangiaraka te tu puasa Kuporai kumua: la untaa-taako kandemu lako to tangdia’ sia umpopa’bongi to salamba salao mase-mase lan banuammu, iake untiroko misa’ to tang ma’tamangkale, la mupakei sia tae’ ammu la umpembunianni tu mai sangrara sangbu- kummu?

⁸Attu iato la bu’tu tu arrangmu susi allo dellek sia iatu bangkemu madomi’ la sikemun, anna dolo dio tingayomu tu kasalamaran sia kamala’biranNa PUANG la ussa’pi’ko.

⁹Iammu metamba, la nabaliko PUANG; iammu mengkamoya lako, la Nakuangko: Inde siaNa’. Iammu patoyangi dio mai kalemu tu mintu’ ayoka pa’pakario-rio sia pa’dullu-dullu sia kada pelo’bo,

¹⁰ke mubenni to tangdia’ tu apa muporai, sia mupedia’i tu to kapu’duran, iake mupogau’i to, la parrang tu maseromu lan malillinna sia iatu kamalillinammu membali masiang.

¹¹Sia PUANG tontong la urrendenko sia Napedia’i tu kalemu, moi ammu dio lu padang rangke sia la Napamawatang tu mai bukummu, ammu susito pa’lak disakka’i sia susito kalimbuang tang ma’ti.

¹²Sia solamu la umbangunni sule tu kota masai allomo daun lauan sia la muoton pole tu parandangan ra’da pariamamo, anna sangaiko tau: to umpemeloi tembo’ tuan sia to umpasule batatta.

¹³Iake tang ullullu’ko allo katorroan umpogau’ pengkarangammu, iamotu allo maindanKu, sangadinna ke musangai allo kasendeammu tu allo katorroan, sia mutanda bilangi tu allo dipamaindanan PUANG, tu sielle’ dipangke’ sia umpakala’bi’i tu allo iato tang unturu’ kalena lalanmu ba’tu umpogau’ pengkarangammu, ba’tu umpasun kada tang kebattuan,

¹⁴attu iato iatu penaammu la umpoparannu PUANG sia Aku la umpasumalongko ma’darang unnolai mintu’ matandena padang, angKu paketaako mana’na Yakub, nene’ to dolomu, belanna Nasa’bu’mo randan pudukNa PUANG.