Read Toraja-Sa'dan YESAYA 59 Bible Online

YESAYA 59 - Toraja-Sa'dan bible

YESAYA 59

¹Iatu limanNa PUANG tae’ nakondi’ la merampanan, sia tae’ natang maleso tu pa’peranginNa.

²Apa mintu’ kekelokammi umpasisarakkomi Kapenombammi sia belanna mintu’ kasalammi anNa buniangkomi lindoNa, Naurunganni tang umperangiikomi.

³Belanna iatu limammi sitombang rara sia iatu tarunomi ponno kakelokan; ma’kada mo’rang bangkomi sia iatu pudukmi ma’nemu-nemu bang ussa’bu’ tang malolona.

⁴Tae’ misa’ to ma’parapa’ situang kamalamburan sia tae’ misa’ to mangra’ta’ situru’ katonganan; urrannuan kada tang kebattuan sia ma’kada tang tongan, untambuk kamandasan sia untibussanan kasanggangan.

⁵Tau iato mai unnarranni tallo’ ula’ balu sia untannun banua laa-laa. Minda-minda ungkandei tu tallo’na, manassa la mate; iake ditessei tu tallo’ iato, tassu’mi lan mai tu misa’ ula’ rame.

⁶Iatu bannang laa-laa natannun, tae’ gai’na dipotamangkale, na iatu panggaraganna tae’ nakullei umpopakei; iatu penggauranna penggauran kakadakean sia iatu pa’pakario-rio lan limanna.

⁷Iatu lentekna matira’ la umpogau’ kakadakean sia madomi’ umpatibollo rarana to tang sala; mintu’ karangan inaanna, tangnga’ kabulitukan manna sia dio lalanna kasanggangan manna sia kamatilakan.

⁸Iatu lalan kamarampasan tae’ natandai, sia tae’ katonganan dio lu lalanna; lalan kelok bang naolai; tae’i misa’ tu to unnolai, untandai kamarampasan.

⁹Iamoto anna torro mambela tu katonganan dio mai kaleta sia tae’ anna lambi’ki kamaloloan. Umpeagiki’ kamasiangan, apa narampoiki’ kamalillinan; umpeagiki’ arrang masero, apa lolangoriki’ lan kapi’tukan.

¹⁰Kasapu-sapuki’ susito buta lako to’ rinding sia sumalappaki’ susito tang kemata. Tangnga allo anta titodo susi ke kasisalan taumi bongi, moi anta mane matangnga tau, apa butungmoki’ to mate.

¹¹Umburrung nasangki’ susito beruang sia ma’seppukuki’ susito bu’ku; umpeagiki’ katonganan, apa tae’; untayanki’ katilendokan, apa mambela dio mai kaleta.

¹²Belanna tang dikemba’mo tu kapatodo-tintingangki dio oloMi sia iatu kasalangki titanan sa’bimo umbalikan; belanna kisa’dingmo tu salaki sia kitandaimo tu kakelokangki;

¹³palutu tombangmoki’ sia umpeongannimiki’ PUANG sia sepangmoki’ dio mai Kapenombanta, umpokadamoki’ diona pa’pakario-rio sia sorong boko’ untannun sia umpasun kada mo’rang.

¹⁴Dipasorong boko’ tu katonganan sia iatu kamaloloan torro mambela, belanna iatu tonganna titodo dio lu tana lapang, sia tang narandan kabulo-lollongan.

¹⁵Iatu tonganna tang dipebayo lindomo sia minda-minda untoyangan kalena dio mai kakadakean dirampamo. Mintu’nate Natiromo PUANG, nakadake tongan Natiro, belanna tae’mo katonganan.

¹⁶Natiro kumua tae’ bangmo tau misa’, bangngomi ara’Na, belanna tae’mo misa’ tau umpangeai katonganan. LimanNa kalena umbenni pa’tunduan sia kamaloloanNa ussande’I.

¹⁷Umpotamangkale kamaloloan butung bayu rante sia umposongko’ songko’ bassi kasalamaran; umpotamangkale pepakkan butung bayu sia umpolullung kamakaritutuan butung bayu lamba’.

¹⁸La Napapakkanni sitinaya penggauranna: iamotu kamare’dekan lako to umbali-balii, sia pepakkan lako ualinNa; iatu mai ma’biring tasikna la Napabala’i.

¹⁹Attu iato la nakataku’ tau tu sanganNa PUANG diong lu kabotoan allo sia la nakabangnga’ tau tu kamala’biranNa lan kabu’tuan kulla’, belanna la sae susito uai saba’ natu’ba’ penaanNa PUANG.

²⁰Apa la sae tu Puang susi misa’ Pela’bak lako Sion sia lako mintu’ bati’na Yakub tu untobaran salana, kadanNa PUANG.

²¹Iatu Aku, inde sia tu basseKu sola tau iato mai, kadanNa PUANG, Nakua: Iatu penaangKu tu dio kalemu sia iatu kadangKu tu Kupadiomo pudukmu, tae’mo anna lessu’ dio mai pudukmu, ba’tu dio mai pudukna bati’mu, ba’tu dio mai pudukna tarukna bati’mu, kadanNa PUANG, randuk totemo tontong sae lakona.