Read Toraja-Sa'dan YESAYA 62 Bible Online

YESAYA 62 - Toraja-Sa'dan bible

YESAYA 62

¹Belanna Sion, anna tae’ kuma’pakappa sia belanna Yerusalem anna tae’ kutorroi ma’kada sae lako dellekna susi arrang masero tu kasalamaranna sia katilendokanna susi sulo marorrong.

²Anna tiroi mintu’ bangsa tu kasalamarammu sia natiroi mintu’ datu tu kamala’birammu, anna sangaiko sanga ba’ru tau, tu la Napamanassa randan pudukNa PUANG.

³Ammu dadi misa’ makota ballo diong pala’Na PUANG sia misa’ passapu kadatuan lan limanna Kapenombammu.

⁴Tae’mo nala ungkuangko tau kumua: To ditampe, sia tae’mo nala ussangai tau tu tondokmu Tondok talo; sangadinna la nasangaiko tau: To Kupopaiman, na iatu tondokmu disangai: To kemuanemo. Belanna Napopaimanko PUANG sia iatu padangmu la dipopendapo’.

⁵Belanna susi pia muane lolle’ umpobaine anak dara, susi dukato la sirampeangko to ma’tondok sia susito misa’ muane la diparampo ungkasinnai baine la narampanni kapa’, ten dukamoto tu Kapenombammu la umpopaimanko.

⁶E Yerusalem, Kupadaomo bentengmu tu pa’kampa, tu tang la ma’pakappa allo bongi tontong sae lakona. E kamu, tu umpakilalanna PUANG, da mimengkata’ka’len.

⁷Sia da mitore umpakilalaI, sae lako Napabendanna sule tu Yerusalem sia Napakapudian lan lino.

⁸Mangkamo umpalao sumpa tu PUANG ussa’bu’ lima kananNa sia takia’ bassinNa kumua: Tae’mo angKu la umpa’benni tu gandungmu lako ualimmu la napotuo sia tae’mo nala unniru’i to sae tu uai anggoro’ mukara’ta’imo.

⁹Sangadinna iatu to megandung, ia dukamo la ungkandei anna umpudi PUANG sia iatu to urrampunni, ia dukamo la unniru’i lan to’ tarampak banua maindanKu.

¹⁰Sunkomi, sunkomi lan mai babangan, pasakkaranni lalan tu tau iato, rantei, ranteimi tu batatta, alai tu mai batu, pabendanni tu bandera dio lu mintu’ bangsa.

¹¹Belanna Napa’perangian PUANG landa’ lako randan langi’, Nakua: Pokadanni anak dara Sion kumua: tiromi, iatu kasalamarammu la rampomo; iatu polean diomo Kalena sia iatu pepakkan dolomo dio oloNa.

¹²La digente’ Bangsa masero pindan tu tau iato mai, sia to Nalendokan PUANG; sia la disangaiko: Kota naporai tau sia kota tang ditampe.