Read Toraja-Sa'dan YESAYA 63 Bible Online

YESAYA 63 - Toraja-Sa'dan bible

YESAYA 63

¹Mindaraka tu sae dio mai Edom, tu lu dio mai Bozra ma’pakean rarrang, tu ma’pakean ballo, lumingka maamba-amba to lalong sia mawatang? Akumorato, tu umpokada kamaloloan sia matoto’ parampanan.

²Matumbari anna mararangra tu tamangkaleMi susito tamangkale to ma’parra anggoro’?

³Aku manna misa-misa tu ma’parra anggoro’, iatu mai mintu’ bangsa tae’ bangi misa’ Kusisolan, sia belanna kasengkeangKu angKu lullu’i tu tau iato mai sia kare’dekangKu angKu ponanakanni; iatu mai rarana umbura’ pakeangKu sia mintu’ tamangkaleKu natombang.

⁴Belanna iatu allo pa’pakkan lanmo penaangKu, na iatu taun kamangrampanangKu saemo.

⁵Mentiro tikuNa’, apa tae’ patunduan; magiangNa’, apa moi misa’ tau tae’ umbaliiNa’. Iamoto anna limangKu kalena untunduiNa’ sia kare’dekangKu umbaliiNa’.

⁶AngKu lullu’i kasengkeangKu tu mai bangsa iato sia Kupalangoi kare’dekangKu sia Kupatibollo tu rarana rokko padang.

⁷La ussa’bu’na pa’kamaseanNa PUANG sia penggauran kapudianNa PUANG sitinaya tu mintu’ Napogaurangki’ PUANG sia kamasokanan kapuaNa lako bati’na Israel, tu Napakitan tau iato mai sitinaya kamamaseanNa sia kabudanna pa’kaboro’Na.

⁸Nakuami: TaungKu duka tu tau iato mai, iamo pia tang la mo’rang, nasusito Iamo dadi To parampananna.

⁹Mintu’ kapu’duranna tau iato mai Napokapu’duran duka, na tau iato mai Narampanan Malaeka’ tu umpaombo’ Puang. Belanna pa’kaboro’Na sia kamamaseanNa Nala’bakki tu tau iato mai sia Naendekanni sia Naindo’i lan mintu’ attu tempon dio mai dolona.

¹⁰Apa tau iato mai pabali-balimo sia umpamasussa Penaa Masallo’Na; iamoto anNa balik mendadi ualinNa sia Ia kalena sirari tu tau iato mai.

¹¹Apa Nakilalai to attu mangka diboko’. Naingarammi tu Musa sia taunNa. Umbamira Ia tu To mangka ussolan to mangkambi’ baanan dombaNa diong mai to’ uai? Umbamira tu To mangka untua’ Penaa Masallo’Na tama ba’tengna tau iato mai?

¹²Lima mala’bi’Na Narendenanni tu lima kananna Musa sia umpasisarak uai dio tingayona tau iato mai, la umpatulangdanan Kalena misa’ sanga matontongan.

¹³Tu ussolan tau iato mai unnola liku mandalan? Tau iato mai tae’ natitodo ten to darang unnola padang lappa’?

¹⁴Susito patuoan ma’palurokko lombok susi dukamoto tu tau iato mai Napopelayo PenaanNa PUANG, susimoto tu kaurrendenamMi taumMi, la umpadenangKomi sanga mala’bi’.

¹⁵Pata’paKomi matamMi dao mai suruga sia tiroi lan mai inan maindan mala’bi’Mi. Umbamira tu kamakaritutuamMi sia penggauran matoto’Mi? Tang lattu’ lako kaleku tu karantangan buaMi sia kamamaseamMi?

¹⁶Kamumo tu Ambe’ki, belanna tae’mo naissankan Abraham, sia tae’mo natandaikan Israel; Kamumo, o PUANG, tu Ambe’ki, sia Pela’bakki tempon dio mai, susimoto tu sangamMi.

¹⁷O PUANG, ma’apai amMi elorangkan pusa dio mai lalanMi? Ma’apai amMi pamakarra’i tu penaangki, naurunganni tang ungkataku’Komi? SulemoKomi belanna mintu’ taumMi, sia mintu’ suku mana’Mi.

¹⁸Sattu’ri napoapai to maseroMi tu tondokMi; sia iatu inan maindanMi nasilullu’i ualingki.

¹⁹Iatu kami susi bang to tae’pa Miparentakan tempon dio mai, sia susi bang to tae’ lenpa nadisa’buran sangamMi.