Read Toraja-Sa'dan YESAYA 64 Bible Online

YESAYA 64 - Toraja-Sa'dan bible

YESAYA 64

¹Aa, kemMi bangngai tu mintu’ langi’, amMi songlo’, anna tigega’ tu mintu’ buntu dio oloMi,

²susi api undukkui ranga’-ranga’ sia ten to api umpopa’kalimbuang uai la umpa’peissananni tu sangamMi lako mintu’ ualimMi, kumua anna ma’parondo mintu’ bangsa dio oloMi,

³belanna Mipaden tu penggauran metakuran tu tae’ kikapangi; kemMi songlo’, anna tigega’ tu mintu’ buntu dio oloMi.

⁴Tempon dio mai tae’ anna rangi lenni tau ba’tu tama talinga sia tae’ natiroi mata tu misa’ Kapenomban senga’ anna Kamu, tu sae umpalalao pa’tunduan lako to untayanNi.

⁵Mitammui tu to sende penaanna umpogau’ kamaloloan, iamotu mintu’ tau ungkilalaiKomi dio lu mintu’ lalanMi. Manassa sengkeKomi, belanna palutu tombangmokan sia tontong bangkanni lan a’gan iato; iake susito, la tilendok siarakannika?

⁶Kami sola nasang dadimokanni susito maruttak sia mintu’ kamaloloangki susito sanglamba’ sampin masarepa; iamoto angki rondon susi daun kayu sia nabaakan kakadakeangki susito napentiaran angin.

⁷Sia tae’mo misa’ tu to ussa’bu’ sangamMi sia umpamukkun kalena la la’ka’ lako Kalemi; belanna Mibuniangkan tu lindoMi, sia Mipopa’elo’nakan lako kuasanna mintu’ kakadakeangki.

⁸Apa totemo, o PUANG, Kamumo tu Ambe’ki; pitti’kan te, na Kamu tu To tumampaki, sia kami sola nasang panggaraga limamMikanni.

⁹O PUANG, da Misengke tarru’ bang sia da Mitontong ungkilalai tu kakadakeangki. Tiromi sia mantami: kami sola nasang te, taumMi.

¹⁰Iatu kota maindanMi mempadang aakmo, ia duka tu Sion mempadang aakmo sia iatu Yerusalem kariuammo.

¹¹Iatu banua maindanki sia mala’bi’ tu nanii nene’ to doloki umpudi-pudiKomi, puramo naballa api sia mintu’ apa keangga’ki daun lauan nasangmo.

¹²O PUANG, la Mima’tanan bangraka penaa te mintu’ apa iate? Ma’apai amMi la ma’pakappa’ bang sia la umpopengkadiongan tarru’ bangkan?