Read Toraja-Sa'dan YESAYA 65 Bible Online

YESAYA 65 - Toraja-Sa'dan bible

YESAYA 65

¹TumayaMo’ la umpebalii to tang umpekutananNa’, ma’dinNa’ la nakabu’tui to tang undaka’Na’; Kukua lako bangsa tang ussa’bu’ sangangKu: Inde siaNa’, inde siaNa’.

²Kiallo-kiallo umpakorongNa’ limangKu lako misa’ bangsa pabali-bali, tu unnola lalan tang sipatu sia tu unturu’ tangnga’ misanna.

³Tu misa’ bangsa tontong umpamagalli ara’Ku dio mempaanna belanna memala’ lan pa’lak sia mantunu dupa dao batu tela.

⁴Sia to unno’ko’ diong lamunan sia to ma’bongi lan kabunianna sia to ungkande duku’ bai sia iatu kande megallian diong nasang lu kandianna.

⁵Sia to ma’kada susite nakua: Mari’piKomi indetu, da Mireke’na’, belanna aku te to tang direke’. Iate tau iate susito rambu lan illongKu sia sangtinti api dukku tu’tu’allo.

⁶Manassa tisura’ te iannate dio oloKu; tae’ angKu ma’loko-loko, sangadinna la Kupabala’i; la Kupakkan nasang tama rianna tau iato mai,

⁷la kakadakeammi, la iatu kakadakeanna nene’ to dolomi, kadanNa PUANG; belanna untunumo dupa dao buntu sia umbe’seNa’ dao mintu’ tanete, iamoto anna ia bunga’na la Kusuka’ tama rianna tu pakkan penggauranna.

⁸Nakua kadanNa PUANG: Susi ke den siapi uai anggoro’ lan tu eteng bua anggoro’, nakua tau: da mibala’ bala’i, belanna den siapa rongko’ lan susi dukamoto tu penggaurangKu belanna mintu’ taungKu tae’ angKu la ussanggang nasangi.

⁹Aku la umpabu’tupi tu bati’ dio mai Yakub sia dio mai Yehuda tu misa’ to la umpomana’ mintu’ buntungKu; sia mintu’ to Kutonno’ la ussiosso’i napomana’ sia mintu’ taungKu la torro dio.

¹⁰Iatu Saron la panglambaran domba sia iatu lombok Akhor la pa’palengaran sapi, la napomana’ mintu’ taungKu, tu undaka’Na’.

¹¹Apa iatu kamu, e mintu’ to untampe PUANG, tu tang ungkilalai buntu maindanKu, sia to umpasakkaran kande Gad sia to umbolikan apa dipairusan Meni.

¹²Kupamanassakomi la nakande pa’dang sia la umpatukkukomi kalemi la direre’ belanna metambaNa’, apa tae’ mipebalii, ma’kadaNa’, apa tae’ miperangii, sangadinna umpogau’komi apa kadake dio pentiroKu sia miporai tu apa tang naala penaangKu.

¹³Iamoto anNa kuai tu Puangta PUANG: Manassa iatu mai taungKu la kumande apa iatu kamu la tangdia’; iatu mai taungKu la mangiru’, apa iatu kamu la ma’rang; iatu mai taungKu la parannu-rannu, apa iatu kamu la kasirisan.

¹⁴Manassa iatu mai taungKu la kumalasi-lasi belanna parannu penaanna, apa iatu kamu silallakan belanna masussa sia siurrukan belanna rantang buami.

¹⁵Iatu sangammi mitampean to ditonno’Ku, la dipake unggatai tau: Napateimoko PUANG. Apa iatu mintu’ taunNa’ la Nakamasean misa’ sanga senga’,

¹⁶naurunganni minda-minda tu umpalakuan kamasakkean kalena, iamo la umpalakuan kamasakkean kalena ussa’bu’ Kapenomban oto’na kamanapparan lan tondok iato, sia minda-minda tu la massumpa lan te tondok, la massumpa ussa’bu’ Puang Matua oto’na kamanapparan, belanna tae’mo nadikilalai tu kamaparrisan dolona sia Kupasalaimo matangKu.

¹⁷Belanna inang la ungkombongNa’ langi’ ba’ru sia lino ba’ru; iatu mintu’ apa dolo tae’mo nadianna batu silambi’ lan penaa.

¹⁸Apa la parannu-rannukomi sia la kumalasi-lasikomi tontong sae lakona diona tu apa Kukombong, belanna Kupadadi tu Yerusalem la dipomela’tek sia iatu pa’tondokanna la diposende.

¹⁹La kumalasi-lasiNa’ diona Yerusalem sia sende-sendeNa’ diona taungKu. Tae’mo anna la dirangi len lan tu tangi’ sia urruk.

²⁰Iatu pia sumusupa lan tae’mo nala kondi’ sunga’, ba’tu to matua tae’mo tu tang la umpasundun kadadianna, belanna iatu to saratu’mo taunna anna mate, kalollerannapa, moi na iatu to umparri-parri kasalan, saratu’pi taunna namane urruai tampak ropu.

²¹Tau iato mai la umpabendan banua anna nii torro, la untanan anggoro’ anna kandei tu buanna.

²²Tae’ anna pabendanni tau iato mai tu banua, kumua natau senga’ unnii torro, tae’ anna mantanan, kumua natau senga’ umpurai nakande tu buanna, belanna susitu kamasaianna garonto’ kayu, susi dukamoto tu katuoanna mintu’ taungKu sia la ungkande bunga rangka’na.

²³Tau iato mai tae’ nala mara’ta’ punala bang ba’tu kianakki anna mate mangura, belanna tau iato mai bati’ Napassakke PUANG sola lanto mimi’na.

²⁴La dadi, iake tae’pi nameongli’ tu tau iato mai, la mebaliMo’ sia iake marassan bangsiai ma’kada, la Kutarimamo.

²⁵Iatu guruk na domba sibaa ungkande riu, sia iatu singa la ungkande dalame susi sapi, sia iatu barra’-barra’ la napotuo ula’; tae’ nala umpogau’ kadake sia tae’ nala umpabu’tui tu mesangganginna dao lili’na buntu maindanKu, kadanNa PUANG.