Read Toraja-Sa'dan YESAYA 7 Bible Online

YESAYA 7 - Toraja-Sa'dan bible

YESAYA 7

¹Den pissan tonna linona Ahas, anakna Yotam, anakna Uzia, datu Yehuda, ke’de’mi tu Rezin, datu Aram sola Pekah, anakna Remalya, datu Israel, anna male langngan Yerusalem, la ullaoi tu tondok iato, apa tae’ nabelai natalo.

²Tonna pokadami tau lako to lan banuanna Daud kumua: Nasamboimo Aram tu Efraim, ma’bara-barami tu penaanna datu sola mintu’ to kambanna, butung to kayu lan pangala’ nairi’ angin.

³Ma’kadami tu PUANG lako Yesaya Nakua: Maleko sola anakmu muane Syear Yasyub umpessitammui Ahas lako saruran limbong iringna daona lu, lu lako lalan padang pamusoran sampin bulu domba,

⁴ammu kuanni kumua: Ma’penandakomi sia parapa’i tu penaammi; da mimataku’ sia da naranggang tu penaammi diona te da’dua lalotin merambu, iamora kare’dekanna kasengkeanna Rezin sola mintu’ to Aram sia anakna Remalya.

⁵Belanna nadakarangkomi kadake to Aram sola to Efraim na anakna Remalya nakua:

⁶Maikomi take’de’i tu to Yehuda anta patirambanni sia tarampai tu tondokna anna iatu anakna Tabeel tapatama datu dio.

⁷Apa susite tu kadanNa Puangta PUANG: Iatu iannato tae’ anna la dadi sia tae’ anna la lalo.

⁸Sangadinna iatu Damsyik la tontong napopennuluan tondok Aram na Rezin napokambuno kapayungan Damsyik; — annanpa pulona llima taunna anna disanggang tu Efraim, naurunganni tae’mo anna tulangdan misa’ bangsa tu tau iato mai. —

⁹Sia iatu Samaria la tontong napopennuluan Efraim na Remalya napokambuno kapayungan Samaria. Iake tae’i ammi katappa’i, manassa tae’ ammi dipamarendeng.

¹⁰Napatarru’mi PUANG ma’kada lako Ahas, Nakua:

¹¹Palakuko misa’ tanda lako PUANG. Kapenombammu, palakui tu tanda diong mai mangapi’na lino, ba’tu lu dao mai masuanggana.

¹²Mebalimi tu Ahas nakua: Mokana’ umpalakui, mokana’ ussandak PUANG.

¹³Nakuami: Perangiimi totemo, e kamu bati’na Daud! Misanga tang ganna’paraka ussara’i tau, ammi sara’i siapara Kapenombangku?

¹⁴Iamoto anNa PUANG kaleNa la umbenkomi tanda kumua: La ma’tambuk tu anak dara iato anna dadian misa’ pia muane, la nasangai Imanuel.

¹⁵Bumbungan pa’pamakko sola tani’ enoan nakande, ke naissanmi ussuale kadake anna alai tu maelona.

¹⁶Belanna iake tae’pi anna issanni te pia iate ussuale kadakena anna alai tu maelona, manassa la lo’bangmo tu tondokna da’dua datu mikataku’.

¹⁷Apa iatu kamu sia bangsami sia to lan banuanna ambe’mi la Naparampoi PUANG ba’tu pira-pira attu, tu tae’ bangpa anna den susinna temponna sisarak to Efraim tu to Yehuda, — lu dio mai datu Asyur.

¹⁸Allo iato la Natambai PUANG sae tu mintu’ kasisi’ dio messarakna salu Nil dio Mesir sia tabuan dio tondok Asyur.

¹⁹Mintu’i to la sae ta’pa ussamboi aa’ mi’lan sia lan lu to’ sapak batu, sia dio lu to’ duri, sia dio lu mintu’ to’ kauaianna.

²⁰Allo ia dukato la Naku’ku’i PUANG piso peku’ku’ diindan dio mai sappia’ salu, iamotu datu Asyur, tu beluak sia mintu’ bulu lentek sae lako danggo’ la Naku’ku’i.

²¹Allo ia duka bangsiato, ke denni tau umpatuo misa’ anak sapi sia da’dua domba,

²²tu belanna kamasekkaranna susunna, iamoto anna la ungkande bumbungan pa’pamakko; belanna minda-minda tu torropa lan tondok iato iamo la ungkande bumbungan pa’pamakko sola tani’ enoan.

²³Sia la dadi dukato allo iato, kumua iato pa’lak nanii sangsa’bu garonto’ anggoro’ dolona, tu keangga’ sangsa’bu batunna salaka, la nanii duka tuo duri sia a’da’.

²⁴Indeto la nanii tau male sibaa len tinaran sia pana, belanna makalima’na padang iato nanii tuo duri sola a’da’.

²⁵Sia mintu’ buntu tu nabingkung tau dolona, tae’mo nalesei tau lako, belanna ungkataku’ duri sia a’da’, sangadinna la dipanglamba’i sapi sia la dipalullu’i domba.