Read Toraja-Sa'dan YESAYA 8 Bible Online

YESAYA 8 - Toraja-Sa'dan bible

YESAYA 8

¹Sia Nakuapa tu PUANG lako kaleku: Alako misa’ papan passurasan pua, sura’i passura’ biasa lako te kumua: Tang la marempamo unnala pangrampa, tang la malelanmo massarrin sisaling.

²Kualami tu sa’bi matappa’, iamotu to minaa Uria sola Zakharia, anakna Yeberekhya.

³Sangampa’mo’ nabi baine, anna ma’tambuk sia undadian misa’ pia muane. Nakuami tu PUANG ungkuanna’: La musanga: Maher-Syalal, Hash-Bas.

⁴Belanna iatonna tang unnisanpi tu pia iato umpokada: Ambe’!, ba’tu indo’!, manassa mintu’ ianan makamban lan Damsyik sia pangrampa lan Samaria la disorong lako olona datu Asyur.

⁵Napatarru’pa PUANG ma’kada lako kaleku susite:

⁶Tu belanna tang nabilang bangsa iate tu uai Syiloah, tu lolong unnentang, sia umposende diona Rezin na anakna Remalya,

⁷iamoto manassa la Napatu’ba’i Puang uai Salu pua, luang sia mandirri’ tu tau iato mai, iamotu datu Asyur sola mintu’ kamala’biranna, tu la ullempa’i pa’kalobangna sia ulleanni panampona.

⁸La tarru’ lu tama Yehuda anna tu’ba’i sia nalempa’i, naurungan ullambi’i tu barokona, anna samboi pani’na tu mintu’ padangmi, e Imanuel!

⁹Maparrangkomi palaoan, e kamu mintu’ bangsa, nake disabu’ikomi; patananni talinga e kamu to randan langi’; selle’i tu la’bo’mi, nake disabu’ikomi; selle’i tu la’bo’mi, nake disabu’ikomi.

¹⁰Iatu apa mikombongan, inang tang la danun; iatu kada misama turu’i, tang la lolo’, belanna Narondongkan Puang Matua.

¹¹Nakua tu kadanNa PUANG lako kaleku tonNa la’ka’ina’ sia Napakilalana’ kumua: da muturu’i tu lalanna te bangsa iate, nakua:

¹²Da misa’bu’ lenni tu kasiturusan pepayunna tu nasanga kasiturusan pepayu te bangsa iate, sia da mikataku’i tu nakataku’na sia da mikagiangi.

¹³Ia mannari tu PUANGna mintu’ ma’dandan maritik tu mipomaindan, sipatu Ia mikataku’ sia la mikagiang.

¹⁴Puangmo la mipoinan maindan, apa la napobatu katitodoan sia batu tongkon katilenderanna da’dua rapu tallangna Israel sia ba’tikan sola poya ulla’ka’i tu pa’tondokan Yerusalem.

¹⁵Budai tu tau iato mai la tisumbang sia tobang sia la mapipping sia la naluang bunde sia naala ba’tikan.

¹⁶Lulunni muporii tu kada dipaombo’ sia ca’i tu pepasan dio lu to’ anak gurungku.

¹⁷La kutayan tu PUANG, tu umpembuniammo bati’na Yakub, lako Kalena la kunii sande’.

¹⁸Tiromi, aku na iatu mai pia Nakamaseanna’ PUANG, iamo tanda sia tanda nubua’ dio lu to Israel dio mai PUANGna mintu’ ma’dandan maritik tu unnisung dao buntu Sion.

¹⁹Iake nakuangkomi tau kumua: Ma’petiro-tirokomi lako bombo to mate sia to sola-sola bombo tu kumissak-missak sia ma’nemu-nemu — tang Kapenombannaraka misa’ bangsa tu sipatu la nanii mekutana? Pato’raka dipekutanan lako to mate tu to tuo?

²⁰Lako (manna) pepasan sia kada dipaombo’! Minda-minda tu ma’kada tang sipatu kada iato, tae’ anna la sitiro arrang melambi’.

²¹Sangadinna la palong bang umperasai parri’ sia mangelo; ia anna topomo, maredemi tu ara’na sia unggatai datunna sia Kapenombanna. Ke mentingarai langan langi’,

²²ba’tu tukkui rokko padang, inang parri’ sia pittuk duka, kapittukan megi- angan, sia napatiramban len kama- lillinan.

²³Apa iatu padang maparri’ susito, tae’mo anna la kalillinan. Susi tonna dolona, Napamatuna tu tana Zebulon sia Naftali, ten dukamoto la Napakala’bi’, ke ma’katampakannai, tu lalan lako tasik, rampe lianna Yordan, lili’ to kapere’.