Read Toraja-Sa'dan YESAYA 9 Bible Online

YESAYA 9 - Toraja-Sa'dan bible

YESAYA 9

¹Iatu to lolang lan kamalilinan, la untiro arrang kapua sia iatu mintu’ to naluang bayo-bayo kamatean la bu’tu tu arrang lako.

²Mipopemba’ka’mo te bangsa, amMi pekapuai tu kaparannuanna; la parannu paiman tu tau iato mai dio oloMi susi to kaparannuanna tau, ke pepareanni, sia sangtinti to sila’tekan, ke untaa-taai pangrampa.

³Belanna iatu ayoka napassan sia lemba dao palempengna sia ta’ba perambana Mirebongmo susi tonna allo (kaditaloanna) to Midian.

⁴Belanna mintu’ sepatu, tu tumutu mentarassa, sia mintu’ bayu lamba’ ussarrin rara, la ditunu napepurai api.

⁵Belanna dipadadiammiki’ misa’ Pia, misa’ Pia muane dikamaseangki’ umpobayu bayu kapayungan, sia iatu sanganNa nasa’bu’ tau: Rangga inaa kalle-kallean tu ma’patudu, Kapenomban kuasa, Ambe’ matontongan sia Datu pasali rampa’.

⁶La kapua tu parentaNa sia tae’ upu’na tu kamarampasan dao isungan kapayunganna Daud sia lan nalili’ parentaNa, la Napabantang sia Naparandanganni katonganan sia kamaloloan randuk totemo tontong sae lakona; kamamaliranNa PUANGna mintu’ ma’dandan maritik la umpogau’i tu ianna te.

⁷Napasonglo’mo Puang tu misa’ kada lako Yakub, nata’pa lan Israel.

⁸Iatu iannato la naissan makalima’na bangsa iato, to Efraim sia pa’tondokan Samaria umpamadao penaanna sia matampo ma’kada kumua:

⁹Rondonmo tu batu tela, apa batu dipa’ la tabangunanni sule; dilellengmo tu ara pangala’, apa kayu arasi la tatanan tasondanni!

¹⁰Iamoto anna mintu’ balinna Rezin la Napake’de’ PUANG la unnea tau iato mai sia la Nasarrang tu mintu’ ualinna:

¹¹Iamotu to Aram dio mai matallo, to Filistin dio mai matampu’, anna mummunni tama sadangna naampello’ tu to Israel. Moi anna susito iate mintu’na, tae’ anna poradanni kasengkeanNa Puang sangadinna tontong bangpa tie’te’ tu limanNa.

¹²Belanna tae’ anna mengkatoba’ te bangsa iate lako To umpa’dikki sia tae’ anna daka’i tu PUANGna mintu’ ma’dandan maritik.

¹³Iamoto anna sangallo bangri la Nanii PUANG unta’takki dio mai to Israel, la ulu, la ikko’, la tangke koroma, la tille.

¹⁴Iatu tedong pariu’ sia to la’bi’ iamo ulu, na iatu nabi umpa’pangadaran buttok iamo ikko’.

¹⁵Iatu mai panglalanna bangsa iate iamo panglalan sala, sia napapusa nasang tu tau nalalanan.

¹⁶Iamoto anna tang umposendei PUANG tu mai to manguranna, sia tae’ anNa katuru-turui tu mai pia biungna sia mintu’ baine balunna, belanna to untananni nasang boko’ Puang sia to bulituk sia kapanglangdoan sun dio pudukna. Moi anna susito iate mintu’na, tae’ anna poradanni kasengkeanNa Puang, sangadinna tontong bangpa tie’te’ tu limanNa.

¹⁷Belanna iatu katangmekaalukan ma’laka-laka butung api, tu ussopui duri sia a’da’ naballa, tu ummampu’i ranga’-ranga’ makamban lan pangala’, naurunganni kendek tu rambunna meumbun.

¹⁸Tu belanna kare’dekanna ara’Na PUANGna mintu’ ma’dandan maritik anna kandei api tu tana iato, anna potaai api tu pa’tondokan naurunganni tae’mo nakatirinnai siulu’na tu tau.

¹⁹Dio rampe kanan ma’karu’bek tu tau, apa topo sia, na dio kairi mangampello’ tu tau, apa tae’ sia anna dia’; pantan la ungkande bale-bale takia’na.

²⁰To Manasye anna to Efraim, sia to Efraim anna to Manasye; la umpapada penaa unnea to Yehuda. Moi anna susito iate mintu’na, tae’ anna poradanni kasengkeanNa Puang sangadinna tontong bangpa tie’te’ tu limanNa.