Read Toraja-Sa'dan SURA’ KATOMINAAN 10 Bible Online

SURA’ KATOMINAAN 10 - Toraja-Sa'dan bible

SURA’ KATOMINAAN 10

¹Iatu anakna Harun iamotu Nadab sola Abihu, pantan unnala peruayanna, naparokkoi api sia napatoppo’i dupa; susimoto nanii umbaai tu api tang sipatu lako oloNa PUANG, tu tang Napepasanan Puang lako kalena.

²Tassu’mi tu api dio mai oloNa PUANG, anna kandei te tau sola duai, namate dio oloNa PUANG.

³Ma’kadami tu Musa lako Harun nakua: Inde sia tu Napokada PUANG Nakua: Lako tu tau rengke’ tongan dio Kaleku, la Kupamanassan kumua MaindanNa’ sia dio pentirona mintu’ bangsa la Kupapayan tu kamala’birangKu. Kappami tu Harun.

⁴Natambaimi Musa tu Misael sia Elsafan, anakna Uziel, pa’amberanna Harun, anna ma’kada lako nakua: Mengkareke’komi, alai te siulu’mi dio mai tingayo inan maindan ammi solanni tassu’ lako salianna to’ tenda.

⁵Saemi mengkareke’ anna baai situang pakean lanna lu tassu’ lako salianna to’ tenda susitu mangka napokada Musa.

⁶Ma’kadami tu Musa lako Harun sia Eleazar sia Itamar, anakna Harun, nakua: Da miserangan beluakmi sia da miserek pakeammi, kumua da ammi mate sia da Nasengkei PUANG tu mintu’ kasirampunan iate; sangadinna mintu’ siulu’mi, iamotu mintu’ to Israel ma’din untangi’i tu apa naballa api tu Napadukku PUANG.

⁷Sia da mitassu’ dio mai to’ ba’ba Tenda Kasitammuan, kumua da ammi mate, belanna dio kalemi tu minna’ pa’tokkoanNa PUANG. Napogau’mi tau iato mai susitu kadanna Musa.

⁸Ma’kadami tu PUANG lako Harun Nakua:

⁹Da muiru’ uai anggoro’ ba’tu pangiru’ mepamalango, moi iko moi anakmu, ke tamakomi Tenda Kasitammuan, kumua da ammi mate — iamote tu apa dipondok matontongan la misiosso’i;

¹⁰kumua ammi ma’din umpasisengaranni tu apa maindan anna apa tang maindan sia apa maruttak anna apa tang maruttak,

¹¹sia ammi ma’din unnada’i to Israel diona mintu’ apa dipondok, tu mangka Napokada PUANG lako to Israel nalopian Musa.

¹²Ma’kadami tu Musa lako Harun sia lako Eleazar sia Itamar, iamotu anak torronapa nakua: Alai tu kande dipemalaran tu torrona dio mai pemala’ pantunu tu dipemalaran lako PUANG, ammi kandei tu iannato butung roti tang diragii, dio sa’de inan pemalaran, belanna tarru’ maindan.

¹³La mikande dio to’ inan maindan, belanna iamoto tu taa dipamanassangko sola anakmu muane dio mai mintu’ pemala’ pantunu, tu dipemalaran lako PUANG; susimoto tu dipepasanan lako kaleku.

¹⁴Iatu dada disorong ditarima sule sia iatu pesese dipamarimbangan la mikande dio inan maindan, iamotu iko sola tu mai anakmu muane sia baine; belanna iamoto tu taa dio mai pemala’ kasalamaranna to Israel, tu dibenko sia diben anakmu.

¹⁵Iatu pesese dipamarimbangan sia iatu dada disorong ditarima sule la napennoloan sola tu lompotiira’na dipopemala’ pantunu, la disorong ditarima sule dio oloNa PUANG dipopemala’ disorong ditarima sule. Iamote tu aluk dipondok matontongan lako kalemu sia lako anakmu, susitu mangka Napepasanan PUANG.

¹⁶Attu iato nadaka’ tonganmi Musa tu bembe’ laki diposuru’ pengkalossoran, apa manassa ditunu mampu’mo. Sengke tonganmi tu Musa lako Eleazar sia Itamar, anak torronapa Harun, anna ma’kada, nakua:

¹⁷Ma’apai natae’ mikandei tu suru’ pengkalossoran dio to’ inan maindan? Belanna iamoto tu tarru’ maindan, sia Nabenkomi PUANG la ullendokanni tu kakadakeanna kasitammuan iato sia la mipadenan kadiseroian ksalan dio oloNa PUANG.

¹⁸Manassa iatu rarana tae’ nadibaa tama inan maindan lanna lu; sipatu mikande lan inan maindan, susitu kupepasanammo.

¹⁹Ma’kadami tu Harun lako Musa nakua: Tonganna allo ia dukate napemalaranni tau iato mai tu suru’ pengkalossoranna sia iatu pemala’ ditunu pu’pu’na dio oloNa PUANG, anna rampoimo’ tu apa susite; iake kukandemi te allo iate tu suru’ pengkalossoran, la meloraka tu iannato dio pentiroNa PUANG?

²⁰Iatonna rangimi Musa te kada iate, melomi dio pentirona.