Read Toraja-Sa'dan SURA’ KATOMINAAN 11 Bible Online

SURA’ KATOMINAAN 11 - Toraja-Sa'dan bible

SURA’ KATOMINAAN 11

¹Ma’kadami tu PUANG lako Musa sia Harun, Nakua ungkuanni:

²Ma’kadakomi lako mintu’ to Israel kumua: Inde sia tu olo’-olo’ ma’din mikande dio mai mintu’ olo’-olo’ lan lino.

³Mintu’ tu olo’olo’ ma’kasapak kalungkungna, iamotu olo’-olo’ tipa’dua kalungkungna, sia lenga’, ma’din mikande.

⁴Inde sia tu mintu’ olo’-olo’ lenga’ ba’tu ma’kasapakna kalungkungna tae’ mima’din la ungkandei, iamotu unta, belanna moi anna lenga’, apa tae’ nama’kasapak kalungkungna; manassa la maruttak to lako kalemi.

⁵Sia kalinti to’ batu, belanna moi anna lenga’, apa tae’ nama’kasapak tu kalungkungna; manassa maruttak to lako kalemi.

⁶Sia ia duka tu kalinti, belanna moi anna lenga’, apa tae’ nama’kasapak tu kalungkungna; manassa maruttak to lako kalemi.

⁷Sia ia duka tu bai, belanna moi anna ma’kasapak kalungkungna ondongpi tipa’dua kalungkungna, apa tae’ nalenga’; manassa maruttak to lako kalemi.

⁸Da mikandei tu duku’na, sia da duka mikaka’i tu batang rabukna; manassa maruttak to lako kalemi.

⁹Inde sia tu ma’din mikande tu mintu’ apa tuo diong lu to’ uai, iamotu mai kekaa-kaana sia kesissikna, tu diong lu to’ uai, sia diong lu tasik sia diong lu salu, iatu iannato ma’din mikande.

¹⁰Apa iatu mai tang kekaa-kaana sia tang kesissikna, diong lu tasik sia diong lu salu, tu mintu’na dio mai mintu’ apa siberongan lan to’ uai sia iatu mintu’ apa kepenaa diong lu to’ uai, la mipomagiang nasang tu mintu’nato.

¹¹Tonganna la mipomagiang to; da mikandei tu duku’na sia la mikagi’gi’ tu batang rabukna.

¹²Mintu’ tu tang kekaa-kaana sia tang kesissikna diong lu to’ uai, la mipomagiang tu iannato.

¹³Inde sia tu mintu’ manuk-manuk la mikagi’gi’ tu tae’ nama’din dikande belanna dipomagiang, iamotu langkan maega, langkan sia langkan tasik,

¹⁴tengnge’ sia mintu’ pa’bulan sanda rupanna,

¹⁵mintu’ kadoya sanda rupanna,

¹⁶burung unta, totosik, manuk-manuk tasik sia mintu’ tarru’ sanda rupanna.

¹⁷Sia iatu langau to’ batu, koro’-koro’, langau sia langau mabusa,

¹⁸kayo, alo,

¹⁹tambolang ballau, mintu’ tambolang sanda rupanna, dora’ na ledo.

²⁰Sia mintu’, olo’-olo’ pandiu tu kepani’na, iamotu umpopellese a’pa’ lette’na, mintu’nato la mipomagallian.

²¹Inde sia tu mintu’ olo’-olo’ pandiu tu kepani’na, iamotu umpopellese a’pa’ lette’na ma’din mikande, iamotu mai olo’-olo’ kepupu daona lu lette’na tu napopekkondong dao kuli’na padang.

²²Inde sia tu ma’dinna mikande, iamotu mintu’ batik sanda rupanna, mintu’ pokkamurrung sanda rupanna, mintu’ batik padang sanda rupanna sia mintu’ pokkalondong sanda rupanna.

²³Apa iatu mintu’ olo’-olo’ pandiu tu kepani’na, iamotu umpopellese a’pa’ lette’na la mipomagiang.

²⁴Iamote tu mipobannang maruttak; minda-minda ungkaka’i tu batang rabukna manassa la maruttak sae lako makaroen,

²⁵sia minda-minda unnangka’i tu batang rabukna, la nabusukki tu pakeanna, sia la maruttak sae lako makaroen.

²⁶Iatu mintu’ olo’-olo’ ma’kasapak tu kalungkungna, apa tae’ natipa’dua kalungkungna, ba’tu tae’ nalenga’, iamo maruttak lako kalemi; minda-minda ungkaka’i la maruttak.

²⁷Iatu mintu’ olo’-olo’ a’pa’ lette’na tu umpopellese pala’ lette’na, iamo maruttak lako kalemi; minda-minda ungkaka’i tu batang rabukna, la maruttak sae lako makaroen.

²⁸Sia minda-minda unnangka’i tu batang rabukna, la nabusukki tu pakeanna sia la maruttak sae lako makaroen; mintu’nato maruttak lako kalemi.

²⁹Inde sia tu maruttak lako kalemi tu mintu’na olo’-olo’ pandiu, tu pandiu dao kuli’na padang, iamotu tangali, balao sia mintu’ koko sanda rupanna;

³⁰iatu anaka,[2] puarang sia bulilik, bukoyo sia bulilik membali-bali rupanna.

³¹Iatu iannate tu mintu’na olo’-olo’ pandiu la maruttak lako kalemi; minda-minda ungkaka’i, ke matemi, la maruttak sae lako makaroen.

³²Mintu’ tu apa natobangi olo’-olo’ iato, ke matei, manassa la maruttak; iatu mintu’ pa’pannian kayu ba’tu pakean ba’tu balulang ba’tu karung, pantanni tu mintu’ pareanan la dipatama to’ uai sia la maruttak sae lako makaroen; mangkato namane masero sule.

³³Sia iatu pareanan litak natobangi olo’-olo’ iato — mintu’ tu apa lan la maruttak, ammi pokai tu pareanan iato.

³⁴Mintu’ kande lan pa’pannian iato, tu ma’din dikande, namennuai la maruttak; sia mintu’ apa diiru’, tu ma’din diiru’ tu lan pa’pannian iato la maruttak.

³⁵Sia mintu’ apa natobangi batang rabuk iato la maruttak: iatu dapo’ sia lalikan la dipoka; inang maruttak ia sia la mipomaruttak.

³⁶Apa misa’ kalimbuang ba’tu misa’ bubun batu, iamotu pa’pannian uai la masero; apa minda-minda ungkaka’i tu batang rabuk iato, la maruttak.

³⁷Iake denni tu batang rabuk iato, untobangi banne la diambo’, la tontong masero.

³⁸Apa iake dibolloi uai tu banne iato, anna tobangi tu batang rabuk iato, la maruttak lako kalemi.

³⁹Iatu olo’-olo’ mikandena, ke matei misa’, naminda-minda ungkaka’i tu batang rabukna, la maruttak sae lako makaroen.

⁴⁰Sia minda-minda ungkandei tu duku’na la umbusukki pakeanna, sia maruttak sae lako makaroen; la susi duka minda-minda unnangka’i tu batang rabukna la umbusukki pakeanna sia maruttak sae lako makaroen.

⁴¹Sia mintu’ olo’-olo’ pandiu, tu pandiu dao kuli’na padang, la megiangan, tae’ nama’din dikande.

⁴²Iatu mintu’ olo’-olo’ mendonglo’ sia mintu’ olo’-olo’ menono’ umpopellese a’pa’ lette’na, susi duka tu apa buda lette’na, iamotu mintu’ olo’-olo’ pandiu sanda rupanna, tu pandiu dao kuli’na padang, da mikandei, belanna megiangan.

⁴³Iamoto da mipamako’do’ kalemi napobua’ ba’tumba olo’-olo’ pandiu sia da miruttakki kalemi diona olo’-olo’ iato.

⁴⁴Belanna Akumo tu PUANG, Kapenombammi; pamaserokomi kalemi ammi masero belanna Aku te masero; da miruttakki kalemi napobua’ olo’-olo’ pandiu sanda rupanna, tu situtu’ dao kuli’na padang.

⁴⁵Belanna Akumo PUANG tu ussolangkomi sun lan mai tondok Mesir, kumua Akumo tu Kapenombammi; la maserokomi, belanna Aku te masero.

⁴⁶Iamote tu atoran diona mintu’ patuoan sia mintu’ manuk-manuk sia mintu’ a’gan kepenaanna tu sibi’tokan lan to’ uai sia mintu’ a’gan kepenaanna tu pandiu dao kuli’na padang —

⁴⁷la umpasisengaranni tu maruttakna na iatu maserona, iamotu olo’-olo’ ma’din dikande na iatu tae’na nama’din dikande.