Read Toraja-Sa'dan SURA’ KATOMINAAN 12 Bible Online

SURA’ KATOMINAAN 12 - Toraja-Sa'dan bible

SURA’ KATOMINAAN 12

¹Ma’kadami tu PUANG lako Musa Nakua:

²Ma’kadako lako to Israel mukua: Iake kianakki tu misa’ baine, anna dadian pia muane, la maruttak ia pitung allo; susi ke attu nakasunni rara la maruttak.

³Ianna allo ma’pengkaruamo la disunna’moto tu kuli’ salepe’ kasirisanna pia iato.

⁴Iatu baine iato la torropa tallungpulontallu allona lan a’gan rara kadipamaseroanna; moi misa’ tu maserona tae’ nama’din ungkaka’i sia tae’ nama’din tama inan maindan sae lako ganna’na tu mintu’ allo kadipamaseroanna.

⁵Apa iake undadianni pia baine, duang minggu la nanii maruttak, susi ke attunna nakasunni rara; la torropa annan pulona nnannan allona lan a’gan rara kadipamaseroanna.

⁶Iake ganna’mi tu mintu’ allo kadipamaseroanna, belanna pia muane ba’tu pia baine la nabaa tu misa’ anak domba sangtaunmo la dipopemala’ ditunu pu’pu’ sia misa’ anak dangan-dangan ba’tu bu’ku’ diposuru’ pengkalossoran, lako to’ ba’ba Tenda Kasitammuan, lako to minaa.

⁷Anna to minaa umpemalaranni dio oloNa PUANG sia umpadenanni kadiseroian kasalan; anna mane masero dio mai nakasunninna rara tonna kianak. Iamote tu atoran lako to undadian pia muane ba’tu pia baine.

⁸Apa iake tang nalambi’i peallinna tu misa’ anak domba, la naala tu da’dua bu’ku ba’tu da’dua anak dangan-dangan: misa’ dipopemala’ ditunu pu’pu’ sia misa’ diposuru’ pengkalossoran, anna to minaa la umpadenanni kadiseroian kasalan, namane masero.