Read Toraja-Sa'dan SURA’ KATOMINAAN 14 Bible Online

SURA’ KATOMINAAN 14 - Toraja-Sa'dan bible

SURA’ KATOMINAAN 14

²Inde sia tu la dadi atoran lako to golenan ke allo kadipamaseroanna: la dipopentingayo lako to minaa,

³sia iatu to minaa la sun lako salianna to’ tenda. Iake natiroi to minaa kumua mondomo tu golen sia soro’mo dio mai to golenan,

⁴la napesuan to minaa unnala da’dua manuk-manuk masero sia kayu arasi’, bannang karamisi sia supa.

⁵Anna mesua to minaa urrere’i tu manuk-manuk misa’ daona lu kurin litak nanii uai kalimbuang.

⁶Mangkato la naala tu manuk-manuk misa’ tu tuonapa sia kayu arasi’, bannang karamisi sia supa anna otonni sola tu manuk-manuk tuopa tama rara manuk-manuk direre’ dao uai kalimbuang.

⁷Anna pi’pikki pempitu lako tu to la dipamasero dio mai golenna, sia napamasero, sia la narampanan tu manuk-manuk tuo mettia’ dio lu padang.

⁸Iatu to dipamasero la umbusukki pakeanna sia la ungku’ku’i mintu’ beluakna sola bulunna sia la mendio’ namane masero; mangkato namane ma’din tama inan to’ tenda, apa la torropa pitung allo dio salian tendana.

⁹Iake ma’pitung allomi la naku’ku’i tu mintu’ beluakna sia bulunna: iamotu dao ulunna, danggo’na sia kanning matanna; mintu’ beluakna sola bulunna la naku’ku’i, sia la nabusukki tu pakeanna sia la nadio’ tu kalena, anna masero.

¹⁰Ianna allo ma’pengkaruamo la unnala domba da’dua tu tae’ tattanna sia domba birang sangtaunmo tu tae’ tattanna sia tallung taan sangpulona epa[3] ta’pung mani’sa’ dipasigerok minna’ la dipokande dipemalaran, sia misa’ logo[4] minna’.

¹¹Iatu to minaa tu umpamaseroi tu tau iato la umpopennoloi tu tau iato sola mintu’ pemala’ iato dio oloNa PUANG, dio to’ ba’ba Tenda Kasitammuan.

¹²La naala to minaa tu domba misa’, anna pemalaranni sola tu minna’ sanglogo, diposuru’ pangakuan sala, anna sorongi sia untarimai sule dipopemala’ disorong ditarima sule dio oloNa PUANG.

¹³La narere’ tu domba iato dio inan nanii tau urrere’ suru’ pengkalossoran sia iatu pemala’ ditunu pu’pu’, dio to’ inan maindan, belanna susi suru’ pengkalossoran susi dukamoto tu suru’ pangakuan sala, napotaa to minaa, iamoto tu tarru’ maindan.

¹⁴La naala to minaa pira tu rara suru’ pangakuan sala anna raranni baba’ talinga kananna to la dipamasero sia iatu indo’ rakka’ lima kananna sia iatu indo’ rakka’ lentek kananna.

¹⁵La naala dukato minaa pira dio mai tu minna’ sanglogo, anna bolloanni rokko pala’ kairinna.

¹⁶Anna otonni to minna’ tu rakka’ lima kananna rokko minna’ diong pala’ kairinna, anna pa’pi’pikanni pempitu tu minna’ iato dio oloNa PUANG.

¹⁷Iatu minna’ torropa diong pala’na la nasussuan to minaa tu baba’ talinga kananna to la dipamasero, sia iatu indo’ rakka’ lima kananna sia iatu indo’ rakka’ lentek kananna, daona lu rara suru’ pangakuan sala.

¹⁸Iatu minna’ torropa diong pala’na to minaa la napalangngan ulunna to la dipamasero; susimoto tu to minaa umpadenanni kadiseroian kasalan dio oloNa PUANG.

¹⁹Mangkato la napasakka’ to minaa tu suru’ pengkalossoran sia umpadenan kadiseroian kasalan to la dipamasero dio mai kamaruttakanna, namane urrere’i tu pemala’ ditunu pu’pu’.

²⁰Iatu pemala’ ditunu pu’pu’ sia kande dipemalaran la napemalaran to minaa dao inan pemalaran. La napadenan kadiseroian kasalan to minaa, anna masero.

²¹Apa iake bongkoi tu tau iato sia tae’ napa’bela, nang la umpaden misa’ domba diposuru’ pangakuan sala, la dipopemala’ disorong sia ditarima sule la umpadenanni kadiseroian kasalan, sisola epa sangtaa sangpulona ta’pung mani’sa’ dipasigerok minna’ sia misa’ logo minna’.

²²Sia bu’ku’ duka da’dua ba’tu anak dangan-dangan da’dua sitinaya pa’belanna, iatu misa’ la diposuru’ pengkalossoran na iatu misa’ la dipopemala’ ditunu pu’pu’.

²³La napopangalukan kadipamaseroanna, ke allo ma’pengkarua, anna baai lako to minaa dio to’ ba’ba Tenda Kasitammuan dio oloNa PUANG.

²⁴La naala to minaa tu domba diposuru’ pangakuan sala sia iatu minna’ sanglogo, anna to minaa ussorongi sia untarimai sule la dipopemala’ disorong ditarima sule dio oloNa PUANG.

²⁵Mangkato la narere’ tu domba diposuru’ pangakuan sala, sia naala to minaa pira tu rara suru’ pangakuan sala, nararanni tu baba’ talinga kananna tu to la dipamasero, sia iatu indo’ rakka’ lima kananna sia iatu indo’ rakka’ lentek kananna.

²⁶Iatu minna’ pira la nabolloan to minaa rokko pala’ kairinna.

²⁷Mangkato rakka’ kanannami to minaa unnalai tu minna’ diong pala’ kairinna napa’pi’pikanni pempitu dio oloNa PUANG.

²⁸Iatu minna’ pira diong pala’na to minaa, la nasussuan tu baba’ talinga kananna to la dipamasero sia iatu indo’ rakka’ lentek kananna dio to’ inan rara suru’ pangakuan sala.

²⁹Iatu minna’ torropa diong pala’na to minaa la napalangngan ulunna to la dipadenan kadiseroian kasalan dio oloNa PUANG.

³⁰Mangkato la umpasakka’ misa’ bu’ku’ ba’tu misa’ dangan-dangan, iamotu apa sitinaya pa’belanna;

³¹iatu apa sitinaya pa’belanna, iatu misa’ la naposuru’ pengkalossoran sia iatu misa’na la napopemala’ ditunu pu’pu’ sisola kande dipemalaran; anna to minaa la umpadenanni kadiseroian kasalan tu to la dipamasero dio oloNa PUANG.

³²Iamote tu atoran lako to narua golen tu tang pa’bela umpaden apa, sitinayanna kadipamaseroanna.

³³Ma’kadami tu PUANG lako Musa sola Harun Nakua:

³⁴Iake tamakomi tondok Kanaan, tu la Kukamaseangkomi la mipomana’, angKu pasae golen tama misa’ banua lan tondok mana’mi,

³⁵la sae tu puangna banua umpokadanni to minaa anna ma’kada nakua: Dio to’ banuangku den kutiro susito golen.

³⁶La mesua to minaa ullo’bangi dolo tu banua iato, namane sae to minaa untiroi tu saki kapua iato, kumua da namaruttak nasang tu apa lan banua; mangkato namane sae to minaa untiroi.

³⁷La natiro tu saki kapua iato; ianna payan, kumua den saki kapua dio to’ rinding banua iato susito to’tok bitti’ maido-ido ba’tu mararang-rarang, tu kanaan ditiro mandu mandalan na rinding,

³⁸la tassu’ tu to minaa lan mai banua iato unnola ba’ba, anna tutu’i tu banua iato pitung allo.

³⁹Ianna ma’pitung allomo sae poleomi tu to minaa; iake natiroi tu iannato sia payan kumua iatu saki kapua manglalla’ dio to’ rinding banua iato,

⁴⁰la mesua to minaa ussu’be’i tu batu narua saki kapua iato, anna tibei lako misa’ inan maruttak dio salian tondok.

⁴¹Sia la mesua ungkarrukki tu lanna lu banua iato tiku lao, na iatu losso’ pitti’ nakarrukki tau la mesua umbaai lako salian tondok sia umbolloanni rokko misa’ inan maruttak.

⁴²Mangkato la mesua unnala batu senga’ nasondanni tu batu disu’be’i sia unnala losso’ pitti’ senga’ nasapuranni tu banua iato.

⁴³Apa iake den pole’i tu saki kapua lan banua iato, ke mangkami nasu’be’i tau tu batunna sia nakarrukki tu banua iato sia nasapu’ kapu’,

⁴⁴anna sae to minaa, natiroi sia payan kumua iatu saki kapua iato manglalla’ lan banua, manassa den golen masang lan banua iato, iamoto namaruttak ia.

⁴⁵La narondonni tau tu banua iato, iatu mai batunna, sia kayunna sia mintu’ losso’ pitti’na banua iato, la nabaa tau lan mai kota lako misa’ inan maruttak.

⁴⁶Minda-minda tama banua iato lan allo dinii untutu’i, maruttak tu tau iato sae lako makaroen.

⁴⁷Sia minda-minda mamma’ lan banua iato la umbusukki tamangkalena sia minda-minda kumande lan banua iato, la umbusukki duka tamangkalena.

⁴⁸Apa iake saei tu to minaa natiroi, anna payan kumua iatu saki kapua tae’ namanglalla’ lan banua iato tonna mangkamo disapu’ kapu’, la napamanassa to minaa kumua maseromo, belanna pa’demo tu saki kapua iato.

⁴⁹La naala tu da’dua manuk-manuk, kayu arasi’, bannang karamisi sia supa, kumua anna seroi tu banua iato dio mai sala.

⁵⁰Iatu misa’ manuk-manuk la narere’ dao kurin litak nanii uai kalimbuang.

⁵¹Sia naala tu kayu arasi’, supa, bannang karamisi sia iatu manuk-manuk tuopa, anna otonni tama to’ rara manuk-manuk direre’, tu sisola uai kalimbuang, anna pempi’pikanni pempitu lako banua iato.

⁵²Susimoto la naseroi tu banua iato dio mai sala tete dio rara manuk-manuk, uai kalimbuang, manuk-manuk tuo, kayu arasi’, supa sia bannang karamisi.

⁵³Sia iatu manuk-manuk tuo la narampanan namale mentia’ lako padang dio salian tondok; susimoto nanii umpadenanni kadiseroian kasalan tu banua iato, anna masero.

⁵⁴Iamote tu atoran diona ma’rupa-rupa golen, sia diona kele dao ulunna tau,

⁵⁵sia golen dio tamangkale sia dio lu banua,

⁵⁶sia kambang, sia kele sia pano —

⁵⁷la umpatudui kumua attu apa namaruttak tu tau sia attu apa namasero sule; iamote tu atoran diona golen.